1 Israel namedung kemauta aidungde RAMPAUBE dwa gade tei jüja ladi, cine RAMPAUBE penuide mmi riakdai ge Philistinme ba gage kai beudi.

2 Cika Zorah renam gade kegwang mipei ge la, Dan leuh gade, nah pe zi Manoah. Pe nau au hena gah nah pa madaude mna ma. 3 RAMPAUBE gwabe pe naude peu pecu ngaugai delwe pa pe dage rangdi, "Ainie, kehereide, nang hena gah nah nang hena mna ma, dede nang au tetlak luzie delwe nang mipeina ge mna luzie.✝ 4 Ciziemne nang zau mede kengkiengbe zau sak kelak sünne lulo, nah nang mci kemak keheibe de tyei so.✝ 5 Kedanemene nang tetlak luzie da nah mipeina ge mna luzie. Tangkane gede pe peu reu gage kailak, kedanemene neki be gade Nazarite* ge eh Tinggwang ziemne keuntsam kelu ge dizie lu. Pa Israelme de Philistinme ba gade kelibeu zie." 6 Pecai mipuide nlütlwe nah pa pe nahpei dage rangmci liagai, "Tinggwang mina be ada gwang lie. Ih pecu hing sütdi kedanemene pa Tinggwang samgwabe rehi nzwa kecune, cine pa daiga de gwangbi Ih pecu keteu ma. Pa pe zi a dage ranglia ma. 7 Pecai pa ada de rangdi, ‘Nang tetlak lu zie nah nang mipeina ge de mna luzie. Cine cu au nang zau mede kengkieng zau sak so, nah nang mcikemak mage de tyei so, kedanemene hena nabe neki gade gwang ketsai tingba kecang Tinggwang gu Naziritme ge zielu.’"✝

8 Pecai Manoah RAMPAUBE dage kekie teigai nah pa rangdi, "Oh kehereide, a RAMPAUBO, kehereide nang langkegai Tinggwang minabe de peu anai da gwang dailo iciude lungh gwang lai kebam nade ziemne anai daipai teilu maisiabi pa ranglia lu kerane." 9 Tinggwang au Manoah kwa kingnei lu, nah Tinggwang samgwabe mipui cide luh ga ntum kebam dau pe da gwangdai. Dede pe nahpei Manoah au pecu ngngwa bam ma. 10 Cine mipui be kelwa pakgwang eh pe nahpei de pau beu, nah pa pe dade rangdi, "Pielo! Cipaunai ada kegwangbe de pecu peu ngaudai gaida!" 11 Cine Manoah cuhlwe pa pe nau caisui miedi. Pa minabe da gwang luge pa pe dage keteudi, "Aipau pui dage marang kegaibe de nang deni?" Pa keligai, "Ih da." 12 Pecai Manoah ranggai, "N samdung de gwang canglu de. Mipeina daipai tei maisia no, nah pe bata daipai zie no?" 13 RAMPAUBE samgwabe Manoah sam keligai, "Kedanemene mipui be dage Ih rang kebeu pelane ziemne, pa pekatei pecu teu sünne lu maisia. 14 Zau teilu kela kubetsi gade kegwang keheibe de, pa tyei kerabe ma. Pa zau mede zau kengkiengbe sak lak, nah mcikemak keheibe de tyeilak. Ih pedage rang kebeu leune, pa teilu maisia."

15 Pecai Manoah au RAMPAUBE samgwabe dage ranggai, "Anai ncu peu bam kecu teineu bamlie, anai hemeuna ge de peu ncu tyei kera langbeulu kemaktane." 16 RAMPAUBE samgwabe Manoah sam keligai, "Nnai acu peu bamsi liede, Ih nnai tangku tyeilak. Dede nnai RAMPAUBE ziemne keru ratak mtei neucai, nnai cide peugai lubui." Manoah pa RAMPAUBE samgwabe lie kecu ci kemakne. 17 Pecai Manoah RAMPAUBE samgwabe dage ranggai, "N zi cauno, n samdung teicang gwangde anai ncu rütlu kerane?" 18 RAMPAUBE samgwabe pe sam keligai "Nang daitei, a zi keteu au no, dede cide au cicanglulak!" 19 Manoah hemeu hau gade hemeuna de nah reca de pwalu delwe RAMPAUBE de reca bam reu gage ratak de pwabeu lu. Cidau pa au miswakegah bata ge teigai lai kebamdau Manoah penai penau au pie bamdi. 20 Recabam gade miheu le tinggimdung lamge cu kegaidau, Manoah penai pe nau pie kebam gade RAMPAUBE samgwabe recabam miheu gade cuhdi. Cine penai keumie eh reca bamdi.

21 Dede RAMPAUBE samgwabe au Manoah mede pe nau dage pecu liasi tadi. Ge Manoah pa RAMPAUBE samgwabe lie kecu cilu. 22 Manoah pe nau dage ranggai, "Anai tsai bizie da kedanemene anai Tinggwang de ngaudi delu!" 23 Dede pe nau pe sam keligai "RAMPAUBE anai de teitset neu cai, pa anai ba gade keru reca de nah reca peu kegaide luu lak. Pa a naide ma aidung pelane pwalia lak, nah aipau ting ga pa anaide peu aipau hade siu lak nage." 24 Mipui be mipei nage mna lu, nah pa pe zi Samson msiaklu. Hena nabe ngkieng cuhlu nah RAMPAUBE pecu samlam beu. 25 Cu RAMPAUBE Rabe ne Mahaneh Dan, Zorah penai Eshtaol nam kakga kebam ni gade pecu teingkieng beu cuhdi.