1 Samson Timnah ga nghung, nah pa Timnah nam gade relei gede ngaulu, Philistinme napuidung kakgade. 2 Pecai pa caili nghang dai eh pe pei penai pe pui dage paubeu eh pa ranggai, "Ih relei gede Timnah gade ngaulie, Philistinme napuidung kakgade. Cine Ih pecu anau kera rengei beulo." 3 Pe pei penai pe pui pe sam keligai, "Anui kibaume kakga relei nage de gah ni, mede a minadung pelane kakga, iciu eh nang hegeurum kemak Philistinme dade henau ge lu launi?" Samson pe pei dage ranggai, "A ziemne pecu ngngwa gwang beulo, kedanemene pa au a dwade petau lu." 4 Dede pe pei penai pe pui au makie aide RAMPAUBE dade kegwang ci bam ma, kedanemene pa au Philistinme de renia gai kera peting keyi ge pei bam kecune. Cidau tingdau Philistinme Israel reu kedi tei kebamne.

5 Pecai Samson pe pei penai pe pui de nzang Timnah kubeluh kemdei ga mie, nah ainie, hingho nage mrah eh pe taiga gwanglu. 6 RAMPAUBE Rabe pecu tei ngkieng süt beu, nah pa cide hemeuna gede teurak kecu nzwa teurak kecaidi, pe ba ga magade gah dede pa pe pei mede pe pui dage pa tei kedide ranglia ma. 7 Pecai pa tet nghung releipui dage marang, nah Samson pecu pesui di.✝ 8 Pecai pa matie mene pecu ngngwalu kera cailigwang. Pa hingho pau de piegai kera lampui de pütdi eh tet pet, ge ainie, cika hingho ketsai paau de ga tegeine maage bwabam nah heliadui bam. 9 Pa cide pe badeu kena le keulwe tetmie, tyei jüja pe pei penai pe pui da mie. Pa penaide kesa de peugai cine penai de tyeilu, dede pa penai de pa hingho pau gade heliadui kuimpet lu dilie kecu ranglia ma.

10 Pecai pe pei releipui lungh kebam de ga miedi, nah cika Samson kesak ngyi ge telei gai, kedanemene rehangmedung cinzwa teigai kelane. 11 Ge penui pecu ngau luge, penui kangngwa nnatume rehangme mina camrei ge de ngngwa gwanglwe penui pecu ngngwa bam kera. 12 Samson penui dage ranggai, "Acu maregwa ge nnui dage peu rang gailo. Magade nnui cide kesak ngyi lang henane ting gage acu rangmci lia kesang lucai, nah nnui peei siakte lucai Ih nnuide langcimpaidung cwareu camrei nah paikereleu camrei peu zie. 13 Dede nnui a dage rangmci kegai teiluta dicai, nnui acu langcimpaidung cwareu camrei nah paidung kereleu camrei peu zie nnuikatei." Penui pedage ranggai, "N regwa de ranggai cu, anui cide siulu kerane." 14 Pa penui dage ranggai,

"Ketyeikau dade taktyei lwapet;

nah kengkieng ge dade kekum lwapet."

Dede penui langcum ne gade maregwa de rangmci lu tadi.

15 Pecai lang henane benai penui Samson nau dage rangdi, "N nahpei de kemeu gailo ciude pa anuide maregwa de rangai beuzie, mecai anui mi teu eh ncu nah n pei kelak de ru dizie. Nang anuide gwa di kerane qu gai ni?" 16 Pecai Samson nau petai gade hap eh pa rangdi "Nang au acu ngkau kesang! Nang acu hung ma! Nang maregwa ge a ramme peidung dage ranggai, dede nang acu ranglia ma." Pa pedage ranggai, "Ainie, Ih a pei mede a pui dage de ranglia ma, Ih ncu ranglia kerabe ni?" 17 Pa pe taigade penui kesak ngyi lang henane tingde hap jüja bamdi. Ge lang henane benai pa pedage ranglia gai kedanemene pa pecu ranglia lo keteu ketang eh bam kedine, iciuge pa pe rehangmedung dage maregwa cide pa ranglia beu. 18 Ge namdibe ga mipeidung lang henane benai tingnaimiak nlüt kemak dwa pe dage ranggai,

"Daipai heliadui swa kumki no?

Nah daipai hingho swa ngkieng no?"

Cine pa penui dage ranggai,

"Nnui a tumlei le puh maige,*

nnui a regwa de pei mpet gailak nage."

19 Pecai RAMPAUBE Rabe pecu tei ngkieng süt beu. Pa Ashkelon nam ga nghung lu delwe penui mina camrei de gidi. Pa mi ma tuilu delwe pa maregwa gade pai kereleudung de peudi. Pa pe rata sütdi, nah pa pe pei ki ga nghangdi. 20 Pecai Samson nau de pe pei ne Samson de ngngwa kelabe, pe zangna yitube de nau peudi.