1 Cidau tingdau Israel ga hegwangpei ge de gah. Cidau Dan leuhme penui lungh kerane hangdeu ge peeila, kedanemene penui Israelme leuh kakga de hangdeu gum kera gede ngaulu mereu kecune. 2 Dan namedung penui kelak gade mina hangmengei de langgai, penui kakgade mipeidung, mina kekuume, Zorah nah Eshtaol nam gade, hepi le hangdeu pei tetkera, nah cide pei sünnelu kerane. Penui penui dade rangdi, "Miecu! Hangdeu de pie sünnelu." Penui hangdeutu deudi Ephraim ga gwanglu, kemdei Micah ki kecang ga, nah penui cipau ziude cika bamdi. 3 Penui Micah ki ga kebam dau, penui Levime rehangpei kwa cilu. Cine penui cika nreupet delwe penui pe dage rangdi, "Caune ncu aika ngngwa gwang no? Nang heni aika daipai teibam no? Nang aika daitei bamno?" 4 Pa penui dage keligai, "Ainzwa eh Micah a ziemne teigai, pa a zie luilu nah Ih au pe cingkupei lie." 5 Penui pe dage rangdi, "keteulo, kehereide, Tinggwang dade, iciude anui ci luzie anui beuh ngkienglu kera, anui cu mbeuhmie kelade." 6 Cingkupei penui dage rangdi, "Helung nciep eh miecu, nnui mie kela beuh de ga RAMPAUBE nnui dwaga lalie."

7 Pecai penui hang mengei baude tetdi delwe penui Laish nam ga gwanglu. Penui cika kelunghme kakga kwak eh Sidonmedung nzwa, nciep nah kwak eh lungh kebam ngaulu. Hangdeu cika migede penuide hengam teibeu kecu bam ma. Ketiplwe, penui au Sidonmedung dade mdei di nah cika penui mikedadung de ngngwa kencüt kecu gah. 8 Pecai penui Zorah penai Eshtaol ga penui sinamedung da miedi. Penui sinamedung penui da rangdi, "Nnui dai ngaulu dino?" 9 Penui sam keligai, "Cuh zette lu, anui mie penuide renia lu kerane! Kedanemene anui hangdeu de ngauda nah ainie, cide au yisüt lie. Dede nnui au mlai ma. Nnui hangdeu de gumlu kera lüt kera lunghau eh bam kerabe ma. 10 Nnui kemie dau, nnui minadung lungh ntiprip kebamme da gwangzie, nah hangdeu cide lule ailam gade nzasüt! Kedanemene Tinggwang kideu ga magede gah kecu heni ge nnui ba gage kaibeu dida."

11 Cine penui cikade hebeuh teitet di, mipei hai herok Dan leuhme kelak gade, Zorah penai Eshtaol gade mpet lu, hereuketei reunetdung teu lu eh. 12 Penui tet hanglwe Judah deu ga Kiriath Jearim gage ramzeuki teilu. Heni cide de Mahaneh Dan* lie henai kecang qula. Cide Kiriath Jearim naimiak kenlütle ga bamla. 13 Penui cikade hangdeutu deudi Ephraim ga kahgwang di, nah penui Micah ki ga nghanglu.

14 Pecai mina nghang mengei bau penui pile Laish ga hangdeu peeipet eh mie kedime penui sinamedung sam keli eh ranggai, "Nnui ki aidung ga hekeutupai ge, kelak mamiedung, mamie heri kelu ge, nah mamie kemai kelu ge bam kecu ci meni? Cine cu, cet gailo nnui daipai teizie bi?" 15 Cine penui cika nreu lüt nah penui rehangpei Levime pei, Micah ki ga gwanglu, nah penui pa yibam ha keteu gai. 16 Cu mipei hai herok Dan namedung dade lunghgwang kelu, penui reunetdung kai kelume, herieki kimui ga bamlu. 17 Kideu hepile peipet eh mie kedime hang mengei bau cuhlu, penui cika gwanglu. Penui herikelu miede keulu, hekeutupai de, kelak mamiedung, nah kemaikelu miede, nah cidau cingkupei au hereu ziemne mina hai herok hereunetdung kai kelume de ngngwa eh herieki kimui ga sapbam. 18 Aidungde Micah ki ga lüt luge, nah penui mamie herikelude keulu, hekeutupai de, kelak mamiedung de, nah kemai kelu miede keu luge, cingkupei penui dage rangdi, "Nnui daipai tei lano?" 19 Penui pe dage rangdi, "Matu so! N ba pwa n mui kebalu delwe anuide nzanggwang lulo, nah anui ziemne mipei ge nah cingkupei ge lulo. Nang mige ki kelak cingkupei keteibe nziemne cide yiki mi mede nang heleuh cingkupei nah Israel ga kelak ge cingkupei be n ziemne yiki no?" 20 Cingkupei pe suiyi sütlu, cine pa hekeutupai, kelak mamiedung, nah mamie herikelu de keulu, delwe pa minadung kakga miedi.

21 Pecai penui nreulu delwe penui tetdi. Penui hena keceunadung, kauruine, nah mania keyibe penui dwage kailu. 22 Penui Micah ki gade mdei süt kecu ga miedi, cidau Micah ki taiga mina ki ga kebammedung de qu hekwalu, delwe penui Dan namedung dwa railu. 23 Penui Dan namedung de qulu. Penui zudung nreu gwang eh penui Micah dage rangdi, "Ncu daipai teidi eh nnui gwang ngkwa bam no?" 24 Pa keligai, "Ih a rabedung tei kelude nang keu luda, nah cingkupei, nah nang tet dida. Ih daipai bamsi reuno? Ciciu cai nang dainzwa nah acu ainzwa keteulu buino, ‘Ncu daipai teidi deno?’"✝ 25 Dan namedung pe sam keligai, "Nang anui kakga ge n kwa peu siu kerabe ma, mecai rata kesiamedung gwang ncu ngngwa renia dizie lu, iciude nang n teilung nah n kibaume teilung cide le kengkap nang rum zielu." 26 Cine Dan namedung penui lampuile miedi kedanemene penui au peswa ngkiengki lie kecu Micah cet kelune. Pa nreu cailidi nah pa pe ki ga cailigwangdi.

27 Cu penui Micah ne teikegaide keulu, nah pe gu cingkupei, nah penui Laish ga gwanglu, mina kebwak mene lunghkebam nah kwak eh kebamme kakga. Penui kingtie mui le penuide gidi nah penui namdi de mile rudi. 28 Cika kelikelube gede bam ma cide Sidon gade mdei kedine, nah penui migede de ngngwa ncüt kera gahdi. Cide langkam Beth Rehob nam taiga bam. Penui namdi de tei dailu delwe penui cika lunghdi. 29 Penui namdi zi Dan qulu, penui pau Dan zi kerüt gade, pa Israel dade lungh gwang kelube. Dede raitu dau namdi zi au Laish. 30 Dan namedung penui ziemne mamie heri kelude pwacuhlu. Jonathan, Gershom napei, Manasseh napei, pa nah penamedung penui deu tuipwa di kemakta Dan leuhme ziemne cingkupei tei eh gwang.✝ 31 Cine penui ziemne Micah ne teikelu pegu herikelu mamie de pwacuhlu, Tinggwang de kerecaki paiki de Shiloh nam ga kebamtane.✝