1 Abimelech tsai kedicai, Tola, Puah napei, Dodo tsapei, Issachar leuhme ge, Israelme de kelilu kerane muiteu teilu. Pa Shamir nam ga lunghla, kideutu deudi Ephraim ga. 2 Pa mmi ngkaiekecum Israel tutiak. Pa tsaidi nah pecu Shamir gage kungdi.

3 Pecai Gileadme Jair pecai cuhlu. Pa mmi ngkaiekena Israel tutiak. 4 Pa pena mipei camrei bam, gadadung camrei reu cwa eh. Penui ziemne namdidung camrei bamla, penui cidungde henai kecangde Havvoth Jair lie qula, cidungde Gilead deu ga bam. 5 Pecai Jair tsaidi nah pecu Kamon nam gage kungdi.

6 Israel namedung RAMPAUBE dwade kemau tei jüja ladi: penui Baaldung de reca, nah Ashtorethdung nah Aram rabedung, nah Sidon rabedung, nah Moab rabedung, nah Ammon namedung rabedung, nah Philistinme rabedung. Penui RAMPAUBE de gidi nah pe gwatei ma. 7 RAMPAUBE Israel de pe rata sütdi, cine pa penuide Philistinme ba gage kaidi nah Ammon namedung ba gage. 8 Penui cipau kumde Israel namedung de, nah mmi kereieheset ge Israel name pelane Jordan Reuki kemcwa gwale Gilead ga kebam Amoritme deu ga kelungme pelane teimsia nah tei kehereidi. 9 Pecai Ammon namedung de Judah de regi kerane Jordan kahpet lu, Benjamin de renia kera, nah Ephraim kelak de renia kera nah cine Israel ziemne keherei süt kecu ge teidi.

10 Pecai Israel namedung RAMPAUBE dage hap gai eh ranggai, "Anui ndage kemau teigai dida, kedanemene anui au anui Tinggwang de gidi eh Baaldung gwa teidi kedine." 11 Pecai RAMPAUBE Israel namedung dage rangdi, "Egyptme dade meni, nah Ammoritme dade nah Ammon namedung dade, nah Philistinme dade, 12 nah Sidonme nah Amalekme nah Maonme dade, penui nnuide teikeherei gai eh nnui a dage mrah kegai dau, nah penui ba gade Ih nnuide keli beu meni? 13 Dede nnui acu pütdi eh keda rabedung gwatei dida. Ciziemne, Ih nnuide kelibeu si lakta. 14 Mie eh nnui kedetkelu rabedung dage hapgai lulo. Penui nnui keherei keludau keli beu kerabe." 15 Pecai Israel namedung RAMPAUBE dage rangdi, "Anui kemau tei dida. Nang anui dage n dwade keyibe leune teigai lulo. Dede kehereide henai anuide keli beulo." 16 Penui kakgade sangme rabedung de keugidi delwe penui RAMPAUBE de recadi. Pecai pa Israel reide ziemne Pe lung siadi.

17 Cu Ammon namedung de qugai eh penui Gilead deu ga ramzeuki teilu. Cine Israel namedung gwang ngkwa lwe Mizpah nam ga ramzeuki teilu. 18 Pecai minadung nah Gilead ga hegwangnadung penui kakgade ketket dage keteudi, "Ammonme de ngngwa regi kera caune anui reugwame de teuswa laino? Pa au Gilead nam ga lungh kebamme pelane muiteube tei dizie."