1 RAMPAUBE gwabe Gilgal cuikui gade Bokim cuikui ga nghang eh rangdi, "Ih Egypt gade n lampui sau nghang beuda, nah Ih nnui paume dage rang kebeube deu de ga nnuide ngngwa gwang luda. Ih ranggai da, ‘Ih kelungta nnuide ngngwa samkak kelude gade nreu dilak. 2 Hangdeu aika lungh kebam kedame de nnui ngngwa samkak gede teilak. Penui recabamdung nnui teipang bi di maisia.’ Dede nnui a kwa kingnei ma. Nnui ai dai teidi deno? 3 Aide Ih rangsi gai, ‘Ih nnui dwa gade penuide gwampet dilak, dede penui au nnui ngauraumme dizie, nah penui rabedung au hetak tei kenzeu ge nzwa nnuide renia zie’." 4 RAMPAUBE gwabe sam aidungde Israel name pelane dage rang kedi dau, minadung penui kwa sahbak eh hapdi. 5 Cine penui heni cide de Bokim* qudi, nah penui cikade RAMPAUBE de ratak ge teibeu.

6 Pecai Joshua minadung de peu tetdi, nah Israel namedung kideu gumlu kerane pe magum riep ga miedi. 7 Minadung RAMPAUBE gwa teilu Joshua keringting pelane nah hangkiame Joshua cai lungtie kebamme keringting pelane, RAMPAUBE Israel ziemne tei kegai bata kedi pelane ngau kelume. 8 Joshua, Nun napei, RAMPAUBE kilabe, mmi hai ge kerei dau tsaidi. 9 Pecai penui pecu Timnath Heres ga pe mabam deurai lunggage kungdi, kideutu deudi Ephraim gage, Gaash Deutu tingpeule ge. 10 Joshua ceheu pelane penui paumedung da gwang ngkwa keludau, ceheu keda ge penui cai lunghcuh dailu, penui RAMPAUBE de cima nah pa Israel ziemne tei kegai tadung de.✝

11 Israel namedung RAMPAUBE dwade kemau teidi nah penui Baal miedung gwa teidi. 12 Iciu eh penui RAMPAUBE de pütdi, penui paume Tinggwang de, penuide Egypt gade ngngwa mpet kebeube. Penui hera kedadung cai suidi penuide twagwa kebam rabedung, nah penui da keu mie penui. Penui RAMPAUBE rata teidi. 13 Penui RAMPAUBE de pütdi nah penui Baal mie nah Ashtoreth rabepui mie de reca teidi. 14 Pecai RAMPAUBE Israelme de pe rata sütdi, cine pa penuide ngauraume ba gage kaidi, nah ngauraume ne penuide ngkapdi. Pa peu penui de twagwa pung kebam penui ngauraume leune ba gage kaidi, peu penui ngauraume dwaga sap silu tadi kerane. 15 Kehei gade, penui keheidau tet kepet dau RAMPAUBE kengkieng penuide renia eh teingkap kerane, RAMPAUBE rang kebeu nzwa nah RAMPAUBE penui dage sampet kebeu nzwa. Iciu eh pa penuide ketang sünne gai.

16 Pecai RAMPAUBE tutiakmedung* de teucuh lu, nah penuine Israelme de kengkapme ba gade kelilu. 17 Penui au tutiakmedung samde kingnei tadi. Penui au kemmha ta tei eh hera kedadung caisui di nah penui au penui da keumie di. Penui au penui peime lampui tet kegwangde gade nreu zette di. Penui cinzwa eh RAMPAUBE ajadung tei mzai nah kingnei tadi. 18 RAMPAUBE penui ziemne tutiakme teucuh keludau, RAMPAUBE au tutiakme de ngngwa la nah pa penuide tutiakmedung ting pelane ga penui ngauraumedung ba gade kelibeu. Kedanemene RAMPAUBE au penui ngauraume penuide sa nah tei keherei eh mrah kecu ngau eh pe lung sia di kelane. 19 Tutiakbe tsaidi ge, penui au caili eh penui paumedung swade penui zai siaki dila, hera kedadung caisui eh penui gwatei nah penui da keumie dila. Penui bata kesia ketde püt lama mede penui hengamkegah zai reli leunede. 20 Cine RAMPAUBE rata Israel reu gwangdi, nah pa rangdi, "Heleuh aide Ih penui paume de rangkebeu a samkak gileu kedine, dede penui a sam kingnei kemakne, 21 Ih de penui kebam gade Joshua tsai kedi dau pa kaikenzeu heleuhdung de ketde gwa mpet silak da. 22 Penuide teu eh Israel de kedeipie kera, penui RAMPAUBE lampui nzui lami me bi, penui paume mnei kela nzwa mi mebi kecu." 23 Cine RAMPAUBE heleuh cidungde de peu lungh bamdi, penuide gwagi nzet di mene, nah pa penuide Joshua ba gage kaibeu dima.