1 Heleuh cidungde de teu eh Israel de kedei kerane RAMPAUBE ne kaipwa kebamme, penui pelane Canaan reutakdung ketde cibam ma, 2 Israel name ceheu ziemne hereu keteiciem ledeu kera, cidungde ndaade ci kemakmedung, 3 Philistinme deuceudime hangmengei, nah Canaanme pelane, Sidonme, nah Lebanon deutu ga lunghkebam Hivitme, Baal Hermon Deutu gade Lebo Hamath kecang kemdei ga. 4 Penuide teu eh Israel de kedei kera, penui RAMPAUBE ajadung kingnei zie mi lak bi cilu kerane, Pa cide Moses ba gade penui peimedung dage rang kebeude. 5 Cine Israel namedung Canaanme, Hittime, nah Amoritme, nah Perizzitme, nah Hivitme, nah Jebusitme kakga lunghdi.✝ 6 Israelme napeidung kesa penui napuidungde de keu penau teilu, nah Israelme napuidungde de penui napeime nau di kera pwa peu, cinzwa eh penui sangme rabedung de reca di.

7 Cine Israel namedung RAMPAUBE dwa gade kemau aide tei di nah penui RAMPAUBE penui Tinggwang de nsungtadi. Penui Baal nah Asherah miedung de reca teidi. 8 Ciziemne, RAMPAUBE Israelme de pe rata sütdi, ciciu eh pa penuide Aram Naharaim me gwangpei Cushan-Rishathaim ba gage zwa gaidi.* Israel namedung mmi heset Cushan-Rishathaim gwatei. 9 Israel namedung RAMPAUBE dage hap kegai dau, RAMPAUBE Israel namedung ziemne kelikelube ge teucuh beu, nah pa penuide kelibeu: Othniel, Kenaz napei, Caleb caihereibe. 10 RAMPAUBE rabe pe reuga gwanglu, nah pa Israel tutiak. Pa hereu ga tetpet nah RAMPAUBE Cushan-Rishathaim, Aram gwangpei de, pe ba gage kaibeu. Iciu eh Cushan-Rishathaim reu pe bane ngkieng lu.✝ 11 Cine Israel deudi ga mmi riakdai lungciep bamlu. Pecai Kenaz napei Othniel tsaidi.

12 Pecai Israel namedung kemau aidungde RAMPAUBE dwade teidai cuhdi. Cine RAMPAUBE Eglon de kengkieng peu, Moab gwangpei Israel de renia kera, kedanemene penui RAMPAUBE dwade kemau aide tei kedine. 13 Pecai Eglon au Ammon penai Amalek namedung de kelanglu delwe mie Israel de renia, nah penui palm bang namdi Jericho de gumlu. 14 Cine Israel namedung mmi kereieheset Moab gwangpei Eglon gwatei.

15 Israel namedung RAMPAUBE dage hapgai ge, RAMPAUBE penui ziemne kelikelube ge teucu beu, Ehud, Gera napei, Benjamin leuh ge, pa pe ba hile heziu mege. Israel namedung Moab gwangpei, Eglon dage ceha peba gage langgai beula.✝ 16 Pecai Ehud pe ziemne kingtie pemui lule ailam kebam ge teilu, pe tie keige. Pa cide pe mnie zetle reuga pe paikang gage kezui lu. 17 Pecai pa ceha de Eglon, Moab gwangpei taiga teugwang lu. Eglon au mina pelui yisüt kecu kauge. 18 Ehud ceha de teugwang kelu ta tei cangdi ge, pa ceha pwa kegwang minadung de langgi di. 19 Dede pa be Gilgal taiga tsupang bam gade caili di, nah hegwangpei ranggai, "Ih nziemne kengkiem samge lalei, O hegwangpei." Cine hegwangpei pe mina da rangdi, "Matuso!" Cine pecu sap twagwa kebam leune pe dade tetdi. 20 Cine Ehud peda gwanglu. Pa pe katei bam kela kipeu ga kibung kengkung ga bam. Ehud rangdi, "Ih nziemne Tinggwang dade samge lalei," nah pa pebam gade cuhlu. 21 Pecai Ehud pe ba hile ketwa pet pe mnie zetle reu gade kingtie de keulu, nah pa cide pe za gage reugai. 22 Kingtie tang si eh nlütdi, pa kingtie de pe za gade züt di kemak ziemne hekietang de peca ne gumpwadi. Pecai pa kigu gage tet gaidi, 23 Nah Ehud kigu gwale mpetlu nah pa kibung kipeu pecai kikamdung ngkuidi nah ncapdi.

24 Pa hegwale mpet luge, hegwangpei kilamedung gwanglu. Penui pie gaige, kipeu bungde kikamdung cap kenzeu ngaulu. Cine pe kilame rangdi, "Pa au kengkung ki bung ga pe pideu kezui pwa bam kesang auzie." 25 Penui petauta kedi kecang kwa bam, dede pa au kipeubung kikamdung ngkei tadi. Cine penui chabi keulu delwe cidung de ngkeilu, nah penui gwangpei tsai eh kipi ga kauzeu kecu ngaulu.

26 Cidau penui kwa eh kebam dau Ehud pakdi nah tsupang bam tetkah lu, pecai pa Seirah namdi gage pak gaidi. 27 Pa kegwang dau, pa kideutu deudi Ephraim gade teluibe kwagai. Ge Israel namedung kideutu deudi gade pecu ngngwa eh nghung, nah pa au penui dwaga la. 28 Pecai pa penui dage rangdi, "A cai suilu, kedanemene RAMPAUBE nnui ba gage nnui ngauraume, Moab de kaibeu di kecune." Cine penui pecu sui nghung delwe penui Moab mcwa kebam Jordan kapet kera ni de tuilu. Iciu eh penui peu migede de tetkah kedi tei ma. 29 Cine cidau penui Moab de ngkapdi, mina cangkerei kenzwa ge. Pelane ntiprip nah pelane ngkieng, dede migede pak luma. 30 Cipaunai Israelme ba gade Moab kaudi, nah mmi riakheset ge Israel deudi ga lungciep bamlu.

31 Pecai Shamgar, Anath napei, nah pane Philistinme de teitsetdi, tumkwa tuitie gele mina haiherok de. Iciu eh pa de Israel de kelilu.