1 Cipau tingdau, Israel deudi reu hegwang ge de kegah dau, cika Levime pei ge hangdeutu deudi Ephraim mdeitu ga lunghla. Pa pe ziemne Judah ga Bethlehem gade kegwang mipui gede, pe nauseupui tei kera luulu. 2 Ciuliede, pe nauseupui pedage kemau tei eh kemmhata teidi nah pa pecu ngngwa kebam gade tetpwa Judah ga Bethlehem ga miedi. Pa cika tingkak ge ladi, kei mdai ge. 3 Pecai pe nahpei cuhlu delwe pecu suimie, pecu pezaiyi eh mpau gai kera nah pecu ngngwa cailigwang dailu kerane. Pe rehangpei ge pecu ngngwala, nah gadadung gede si eh. Pa pecu pe pei ki ga ngngwa nlüt lu, nah mipuide pei pecu ngau luge, pa pecu redau kelune pesuiyi di. 4 Pe nau pei, mipuide pei, pecu bam lulo di cine pa lang cumne peda bamdi. Penui matyei masak, nah penui cika cipau ziu de bamdi. 5 Pecai lang mdaine benai penui tingcang nuge cuhlu, delwe pa tetdi kera cuhlu, ciuliede releipui pei pe napui nahpei dage rangdi, "Tangku kwak ge tyeilu ciude nang ngkieng eh mbeuhlu kerane, ciciulu caine nang tet luzie." 6 Cine penai ntum lwe ngngwa matyei nah sak. Pecai mipuide pei pedade rangdi, "Kehereide neunga eh tingmui ziu bam lulo iciu eh peu n mlung renga gai lu reilo." 7 Pecai minabe tet kera cuhlu, ciuliede pe nau pei pecu bamlu lodi. Cine pa bamdi nah cipau ziude cika bamdi. 8 Pa tingcang nuge cuhlu lang mengei benai tetgai kerane, dede mipuide peibe rangdi, "Kehereide matyei lu rei ciu eh ngkieng eh mbeuhlu kerane." Cine penai tet kera tingna kecang kwabamdi, delwe penai matyeilu. 9 Minabe tet kera cuh luge, pa nah pe nauseupui nah pe rehangpei, pe nau pei, mipui pei pe dage rangdi, "Pielo, kehereide, henai tinghegi dida. Kehereide heziu bamlu rei lo. Pielo, tingbazie cangdi lauda. Aika tingmuiziu bam lulo, ciu eh n mlung tei renga lu rei lo. Pecai ncünne n beuh ziemne nang tingcang nuge cuhlu delwe n kilung ga mie lulo."

10 Dede minabe cipau ziu bamsi neuta di. Cine pa cuhlu delwe pa tetdi. Pa cuikui cide mcwa kebam kemdei Jebus ga gwanglu, cide Jerusalem ga. Pecu ngngwa kelamedung au paklu kebui gada maage la. Nah pe nauseupui de pecu ngngwala. 11 Penui Jebus nna di, nah tingna kebaa de mnei sütdi. Cine rehangbe pe mpaube dage rangdi, "Gwanglu, kehereide, anui Jebusitme namdi aide ga nreu nlüt eh cika tingmuiziu bam maisiada." 12 Ciuliede pe mpaupei pe dage rangdi, "Anui sangme namdi ge ga nreu nlüt lak, cika Israel name migede gah. Menane anui Gibeah nam ga canglu kemaktane kah gwangzie." 13 Pecai pa pe rehangpei dage ranggai, "Gwanglu, anui heni aidung ket be ga nna gwanglu go, nah anui Gibeah mecai Ramah nam ga heziu bam dizie." 14 Cine penui tetkah eh jüja gwangdi. Dede penui Benjamin leuhme deu Gibeah cuikui ga gwang nna luge tingnaimiak nlütdi. 15 Iciu eh penui cikade nreu pwa Gibeah deukui cipau ziude zeudi kera gwanglu. Penui gwanglu delwe namdi sum renei ga ntumlu, dede migede pezeuziu bam kera penuide luulu ma.

16 Cu, ainie, kecing pei ge peta gade gwangla, tinghegi luh gade. Cipaude de hangdeutu Ephraim gade gwang, pa au Gibeah deukui ga lunghla. Dede cipau deu ga kelunghmedung au Benjamin leuhmedung. 17 Pa ngang cuh piegai nah pa namdi sumrenei ga mina hebeutei kelame gede ngaulu. Kecing pei de rangdi, "Daiga nang mie launo nah daiga de gwang lano?" 18 Pa pe dade, "Anui au Judah ga Bethlehem gade kemdei lambie hangdeutu Ephraim ga kah gwang lalie. Ih cika bamla. Ih Judah ga Bethlehem ga mielie, nah Ih au RAMPAUBE ki ga mie lalie. Dede migede acu hegia beu meda. 19 Cipaureude, anui gadadung ziemne reigau de la. A ziemne nah n kilabepui ziemne de tangku nah zau de bam, nah rehangpei ngngwa kela n kilabedung ziemne de. Magede kegah gahlie." 20 Kecing pei rangdi, "Nnui da lungciep lalu! Nnui teu maikesia leune Ih nnui mapie beu zie. Dede nang tingmui sumrenei ga bam kerabe ma." 21 Cine pa pecu pe kilung ga ngngwa gwanglu delwe pa gadadung ziemne taktyei dung rui gaibeu. Penui pi huilwe penui matyei nah saklu.

22 Penui renga eh bam ge, ainie, namdi ga minadung kangge, kenlien peime napeidung, penui ki cide twagwalu eh kikam ketung daidai eh bamdi. Penui kecing pei, ki mpaupei dade rangdi, "N ki ga gwang kebamme de lungmpet lo, anui pecu ngngwa nauhepei ta teilu kerane." 23 Minabe, ki mpaube, hegwale penui da pet eh penui dade rangdi, "Lak, a sinamedung, kehereide nnui kemauta tei siabi! Mina aipau de a ki ga lüt kebam ngau eh, nnui hengam aide tei kerabe ma! 24 Aika leitin a napui nah pe nauseupui bamlie. Kehereide acu peu penaide ngngwapet beulo iciude nnui penaide tei msia lubui nah penai dage nnui dwade keyibe tei lubui. Dede mina aipaude dage au ma kesia tei gai helo!" 25 Dede minadung pekwa kingnei neu tadi, cine minabe pe nauseupui de keraklwe pecu peu hegwale kebamme da petdi. Penui pecu cibam nah penui pecu kemmha ta tei di nah tingcang kemakta tingmuiziu pelane teu heta kesia tei. Pecai penui pecu tingcang baapet ge lang gidi. 26 Mipuide tingcang baapet ge gwanglu nah pa mipei cide kimuiki ga pempaube kebam ga kauzeu bamdi, ting baapet kemaktane.

27 Pe mpaupei tingcang cuhlu delwe kikam ngkei lu delwe pe lampui le mie kera tetpet di. Dede ainie, mipuibe, pe nauseupui kimuiki ga kau zeu bam nah peba kena au kikampi reu ga bam. 28 Pa pe dage rangdi, "Cuhlu tet cugo!" Dede samli gahdi, cine pa pecu gada reu gage kailu. Cinzwa eh minabe cuhlwe pe ki ga gwangdi. 29 Pa pe ki ga gwanglu ge, pa kieceu nage keulu, nah pa pe nauseupui de keraklu, delwe pa pecu pe radung dang kecaidi, dang kereiekena teilu, delwe pa Israel deu pelane gage langgai. 30 Cu cide teizie, cide kengauleune rangdi, "Madaude Israel namedung Egypt gade gwang kelu henai kecang ainzwa tei ma nah ngau ma. Nnuikatei cide cet gai pielo! Heta riemlu delwe rang gailo!"