1 Pecai Israel namedung pelane, nah hemaabe mina hangge nzwa ngkwalu, Dan gade nah Beersheba dei ge nah Gilead deu gade, Mizpah ga RAMPAUBE dwaga gwang ngkwalu. 2 Mina pelane muiteumedung, Israel leuhme pelane penui kesang Tinggwang minadung kakga ngkwalu, 400,000 hepi reugwame kingtie ramcau pwa eh. 3 Benjamin namedung Mizpah ga Israel namedung hang kedi ha siulu. Ge Israel namedung rangdi, "Dainzwa kemau ta aide gwang di bi rang mci gailo." 4 Cine Levime pei, daptset kedi pui nahpei de, sam keligai. Pa rangdi, "Ih gwang, Ih nah a nauseupui anai, Benjamin gu kideu Gibeah cuikui ga, pezeuziu zeu kerane. 5 Gibeah cuikui ramme acu mmau eh renia cuh. Penui a ziemene tingmui ki cide twagwalu. Penui acu teitsetdi kera cet. Meliene penui a nauseupui de teidi cine pa tsaidi. 6 Ih a nauseupui paau de kilung pwa gwanglu delwe dang kecailu. Pecai Ih Israel hangdeu gumkelu leune gage kang ge ge langgai beu, kedanemene penui kemau kedi ge tei kedine nah Israel ga hengam tei kegaine. 7 Ainie, nnui Israel namedung pelane, nnuikatei cetlu nah riem lulo."

8 Mina pelane cuhlu ket tei eh, ranggai, "Anui migede pe paiki ga cailigwang lak, nah anui migede pe kilung ga caili gwanglak! 9 Meliene anui cu Gibeah cuikui dage ainzwa tei gai zie: anui dacak tei zie caube maa ne penui de gwaketang zie bi kecu. 10 Israel leuh ge ge gade mina zi kerei gade zi ge de kedet zie, reugwame ketyeipuk peu teugwang kerane, penui Benjamin deu Gibeah ga kemie dau, Israel ga heta siasüt kecu tei kegaine penui de saja peu kerane." 11 Cine Israel mipei leune ngkwalu namdi de mmau eh, mi hangge nzwa eh, maa ge teilu.

12 Israel leuhme Benjamin leuhme pelane dage minadung langgai, rang eh, "Nnui kakga tei kegai kemau aide daipai no? 13 Ciziemne, cu, mipeidung de peu mpet gailo, kemta namedung de, Gibeah cuikui ga kebammedung, ciude anui penuide teitset dizie, nah iciu eh anui Israel gade kemau keugi di kerane." Dede penui au neulu ma, Benjamin, penui sinamedung kwa de kingnei kera, Israel namedung. 14 Pecai Benjamin namedung penuikatei Gibeah cuikui namdidung gwale gwang ngkwalu, Israel namedung de keregi kera tetpet. 15 Benjamin namedung cipaunai namdidung gade kingtie kepwame mina cang ngkaieherok kelunglu eh hekwalu. Aide gwale de, Gibeah cuikui ga kelungme kakgade mina hai hena de kelanglwe kelunglu. 16 Aidung pelane kakgade mina hai hena kedet kelume bam, zetle ba kesiame, cipaumedung pelane tangtsukang teu eh tamlei gede kap dau lubui nah kapzeu di lama.

17 Israelme peidung, Benjamin caide, penui ziemne hekwalu mipei kingtie kepwa 400,000, aidung pelane reugwa keyime. 18 Pecai penui cuhlu nah Bethel ga hang. Israel namedung Tinggwang de keteu nah penui rangdi, "Caune hang lai anui ziemne keraibe tei eh Benjamin namedung de ngngwa hereu ketei ga?" RAMPAUBE ranggai, "Judah ne keraibe teizie."

19 Cine Israelme tingcang cuhlu nah penui Gibeah cuikui kenna ga ramzeuki teilu. 20 Israelme peidung Benjamin de regi kera tetmie. Israelme peidung Gibeah ga kebamdung de regi kera mteilu. 21 Dede Benjamin namedung Gibeah cuikui de tetpet di, nah cipaunai penui Israel gade mina cang ngkaiekena de hangdeu gage teitsetdi. 22 Ciuliede minadung, Israel mepeidung penuide tei ngkuulu delwe penui kerai benai mtei kelu ni gage regi kera mtei dailu. 23 Pecai Israel namedung mielu nah penui RAMPAUBE dwade hapdi tinghegidi kemaktane. Penui RAMPAUBE dade keteu eh, ranggai, "Ih gwaketang si eh reuni, A sinabe Benjamin name de ngngwa regi eh?" RAMPAUBE sam keligai, "Mie pecu ketang cu!"

24 Cine lang pekenabe benai Israel namedung Benjamin namedung de nna gwanglu. 25 Benjamin penuide renia kerane lang pekena benai Gibeah cuikui gade tetpet lu, nah Israelme de mcwa eh penui hangdeu gage mina keda cang kerei heset de teitsetdi. Aidung pelane de kingtie kepwame. 26 Pecai Israel namedung nah mina pelane hanglu nah penui Bethel ga gwangdi. Penui hapdi, nah penui cika RAMPAUBE dwaga ntumlu. Penui cipaunai tinghegi kecang mmwang, pecai penui keru recadung nah kezuyi recadung RAMPAUBE dwage teigai. 27 Israel namedung RAMPAUBE de keteudi, kedanemene cidau Tinggwang samkakbung cika kebamne, 28 Phinehas, Eleazar napei, Aaron napei cipau tingdau cide dwaga hegwatei bam kecu dau, ranggai, "Ih Benjamin, a sinabe namedung de renia eh piage hereu ga tetpet maisia reuni mi Ih mtak di lai?" RAMPAUBE rangdi, "Nghang cu, Ih ncünne pecu pwa n ba gage kai beu zie."

29 Cine Israelme hemaa teilwe Gibeah cuikui lule ailambie kwa twagwalu kum kera. 30 Israelme Benjamin namedung de lang cumne benai gwahang, nah penui ndaa nzwa Gibeah cuikui de ngngwa regi kera mteilu. 31 Benjamin namedung minadung de renia kerane tetpet lu. Penuide namdi gade kemeu mdei di, nah penui midungge de kedeu miedi. Israel mipei camrei kenzwa ge de teitsetdi ndaa lampui gade tei kedi nzwa, cide ket Bethel ga hangdi nah kedabe luh kakgade Gibeah cuikui ga mie. 32 Pecai Benjamin namedung rangdi, "Anui dwade penuide ngam luda, keraibe pia nzwa." Dede Israel namedung rangdi, "Anui pak gaigo iciude anui penuide namdi gade lampuiki gage gwagai luzie." 33 Pecai Israelme leune pe bam gade cuhlwe Baal Tamar nam ga hereu bamdung teilu. Israel ga swalwe mbai kebamdung pebam Maareh Gibeah gade pak mpetlu. 34 Israel pelane gade kedetkelu mina cang kerei de Gibeah cuikui kengau ga mpetlu, nah hereu cide teisütdi. Dede penui au kengkap aide penui da nna bamlie kecu cima. 35 Cinzwa eh RAMPAUBE Israel dwagade Benjamin de ngamdi. Cipau nai Israel namedung ne Benjamin de ngkapdi, mipei 25,100, cidung pelane de kingtie kepwame.

36 Cine Benjamin namedung penuide ngam kedi ngaulu. Israel ga minadung Benjamin de heni ge peu, kedanemene penui au mina Gibeah cuikui gage peu mbai eh kwa kebam maade mninghemi kedine. 37 Pecai mbai eh kwa kebam maade kelwa eh nah lwapet Gibeah cuikui de twagwalu. Mbai kwa kebam maade pakpet kingtie pwa namdi de pelane bikau di. 38 Cidau Israelme peidung mbai eh kwa kebam maade ziemne nrai heciem riem pwabam: mimang teilu iciude penui mi teingkaa kegaide namdi gade kaapet lu kerane, 39 Israel mepeidung hereu gade caili kecudau. Pecai Benjamin gwaketang cuhdi, Israelme mina camrei gede daptsetdi. Penui rangdi, "Pecu au anui dwaga ngam kesang tei dida, hereu keraibe gade nzwa." 40 Dede cidau marehi de namdi gade mikaa tsia ge ngaupet cuh di, Ge Benjamin cika nreu caili di. Kesangbe, ainie, namdi cide pelane gade mikaa ting ga hangdi. 41 Pecai Israel mepeidung caili di. Benjamin leuhme pelane penui ngngidi, penui kekap penui reuga kegwang ngau kelune. 42 Cine penui Israelme peidung dwa gade hetaideu ge pak caili gai, dede keregi kecu de pedwa raigwangdi. Cidau namdidung gade mpet kelamedung pe kak gade pecu ngkapbam di. 43 Penui Benjamin de twagwalu, penui pecu teimpak gai. Reluicui eh penuide Gibeah cuikui kemcwa kecang ga tei ngkap ciak dedi, tingnaimiak kepet lambie tu ga. 44 Penui Benjamin dade kaudi, mipeime cang kerei heset, aidung pelane kekuume. 45 Pecai penui nreulwe hetaideu gage pakgai eh Rimmon tsura ga gwanglu. Penui puiceunadung gade mina cang mengei de teitsetdi. Penui Gidom nam ga kecang gwazui nna süt eh gwang, nah penui pedade mina cang na de teitset di. 46 Cine cipaunai Benjamin name pelane tsaikedime kingtie kepwame mipei cang ngkai mengei. Aidung pelane mina kekuume. 47 Dede mina hai herok caililu nah penui hetaideu gage pak gailu, Rimmon tsura lambie. Penui Rimmon tsura ga kei mdai bamdi. 48 Pecai Israel namedung Benjamin namedung da cailigwang. Penui penuide kingtie mui le teitsetdi, namdi ge de pelane, makaune de si nah ngau kelu keheileu de. Penui ngau kelu namdidung leune de, penui rudi.