1 Pecai Samson Gaza nam ga miege, pa cika helipui gede ngaulu, nah pa pecu ngngwa zeu ga gwang. 2 Ge Gazamedung rangdi, "Samson aika gwang luda." Cine penui pecu twagwalu delwe penui namdi be rieki ga bam eh tingmuiziu pelane pecu kwa bamdi. Penui katei tingmuiziu pelane matu mezing eh bam, rang eh, "Tingcang baapet de, cidau anui pecu teitset dizie." 3 Samson au tingmui muisum kecang zeu. Pecai muisum dau pa cuhlu nah pa namdibe kirie kikamdung zütlu nah kikamtsia kena de si eh. Pa cidungde pecap de si eh züt mpetlu, pa cidung pe hekeutu gage pwalu, nah pa Hebron namdi dwaga kebam kideutu twang ga cidung pwa nghanglu.

4 Cipau cai pa Sorek langkam ga mipui gede mrai di. Pe zi au Delilah. 5 Philistinme deuceudidung peda gwang eh penui pe dage rangdi, "Pecu peu ranggai lo. Daipai ne pecu tei ngkieng süt bambi kecu nah dainzwa anui pe reu ngkieng lubui bi pie gailo, iciu eh anui pecu kanglwe pecu tei mneilu kerane. Iciude anui hangge ge kecu rangkanggeu cange hai ge* ramcau ncu peuzie." 6 Cine Delilah au Samson dage rangdi, "Kehereide, daipai ne ncu tei ngkieng süt bambi, nah ncu tei mneilu kerane dainzwa ncu kanglu buibi a dage ranglia lo?" 7 Samson pe sam keligai, "Magade penui heria keheci hena canghdi kemakbe teu acu kanglu cai, cidau Ih mnei dizie, nah Ih mina kedame ge nzwa dizie." 8 Pecai Philistinme deuceudidung canghdi kemak keheci heria hena peda teugwang beu, nah cidung teu pa pecu kanglu. 9 Nah pa tuilu kera maade kibung gage kaizeu delwe pa pe dage ranggai, "Philistinme aika ncu tui kera gwang lada, Samson!" Dede pa heriadung de teicakdi heleilakpi ria ge mi gage kekaidau cakdi kela nzwa. Cine pe kengkieng cide cilu tadi.

10 Pecai Delilah Samson dage rangdi, "Ainie, nang acu cwa dida nah nang a dade kenret rang dida. Cu a dage rang gailo, kehereide, dainzwa eh ncu kanglu buino." 11 Pa pedage rangdi, "Magade penui heria keheci madaude teu heta tei kemakdung penui pwa acu kang cai, Ih mnei dizie nah Ih kedame minadung nzwakap dizie." 12 Cine Delilah heria kehecidung keulu delwe cidung teu pecu kanglu. Pa pedage ranggai, "Philistinme nda gwang lada, Samson!" Tuilu kera maa kilung ga bam eh. Dede pa helangria nzwa cidungde pe ba gade teicak gidi.

13 Pecai Delilah samson dage rangdi, "Cu kecang nang acu cwa nah ada kenret rang dida. A dage ranglia lo dainzwa eh ncu kang lubui bi." Cine pa pedage rangdi, "Magade nang a peutam riadung hena de pwa ncüt lucai nah cide peutwa gele kanglu lie cai." 14 Pa cidungde dei gage kang kecütlu, delwe pa pe dage rangdi, "Philistinme ncu tui kera aika gwangla da, Samson!" Dede pa zip kebam gade cuhlu delwe pa pwa kenzeude gade nah peutwa de gade tsing tie de zütdi.

15 Ge pa pe dage rangdi, "Nang dainzwa ‘Ih ncu hunglie’ de rang lulai, n mlung au ada la meni? Nang pia cum acu cwa dida nah nang daipai nzwa ngkieng lubi acu ranglia meda." 16 Cipau nai tingbazie pelane pa pecu marang ketang eh bamdi. Pa pecu ketang jüja bamdi cine pe lung teimsia süt bamdi. 17 Cine pa pe mlung ga kebam pelane pecu rangbeu di delwe pa pe dage rangdi, "Tangkane gede a peu gage kaima, kedanemene Ih au a pui neki gade Tinggwang ziemne Naziritme ge teila di delu. Magade Ih a tam tai mcigi dicai, ciucai a kengkieng a dade gah dizie, nah Ih mnei dizie nah Ih kedame minadung nzwa dizie."

18 Delilah au pe mlung ga kebam pelane pe dage rang kebeu cilu ge, pa mide langgai eh Philistinme deuceudidung de qulu eh ranggai, "Piage hang dailu, pa a dage pe mlung ga kebam pelane rangbeu di delu." Pecai Philistinme kedimedung peda hanglu, nah penui rangkanggeu penui ba ga pwalwe gwanglu. 19 Pecai pa pecu pe mnie reu gage teinzip di nah pa minabe de qulu cidau pa pe peu gade tam ria hena de tai mpet di. Cinzwa pa pecu teimnei cuhdi, nah pe kengkieng pedade tetdi. 20 Pecai pa rangdi, "Philistinme ncu tui kera aika gwangla da Samson!" Pa zip kebam gade mrak lwe pa rangdi, "Ih pedwa paklu kela nzwa pak luzie nah Ih akatei de ngheu mpet luzie." Dede pa au RAMPAUBE pe dade tetkedi ci ma. 21 Philistinme pecu tuilu delwe penui pe miak kena de let mpetdi. Penui pecu Gaza ga teu nghunglu delwe penui pecu hegeu ria kenale kanglu. Cidau pa hebaangme ki ga maniak bam. 22 Ciuliede, pe peu ga pe tam tai kedide lungpet cuh daidi.

23 Philistinme gu deuceudidung penui Dagon tinggwang dage reca disüt ge teigai beu kera penuikatei gwang ngkwalu, nah suiyi mneilu kerane. Penui rangdi, "Anui tinggwang au Samson de anui ba gage kaipwa peuda, anui ngaurau kedibe de." 24 Minadung pecu ngau luge, penui gu tinggwang de twadi, kedanemene penui rangdi, "Anui rabe anui ngauraube de pwa anui ba gage kai beuda, anui deu kengkapbe de, anui minadung kekiee de teitset kedibe de." 25 Penui mlung sui kebamdau, penui rangdi, "Samson de qu gailo pecu peu anuide tei renga gai kera." Cine penui hebaangme ki gade Samson de qulu nah pa penui dwa gade penuide tei renga gai beu. Penui pecu peu hetsia kena kakga saplu. 26 Samson pe ba teu kebambe rehangbe dage rangdi, "Acu peu mtak gailo! Acu peu hetsia kenade tung gailo, ki cidungde rapwa kebam kenade, iciu eh Ih ci kena reuga akatei ngngei lu kerane." 27 Cidau cide ga mipeidung nah mipuidung puibam, nah cika Philistinme deuceudidung pelane bam. Kireu ga mipei mipui cang cum kenzwa ge bam, Samson penuide tei renga kecu piebam.

28 Pecai Samson RAMPAUBE de qugai nah pa kiedi, "A RAMPAUBO, acu nsung gailo, kehereide! Kehereide acu teingkieng gailo, cu piage, O Tinggwang, iciude Ih akatei Philistinme dade a miak kenade ziemne hekum pei eh hekum kepei ta tei luzie." 29 Samson ki cide rapwa kebam sumbe tsia kenade tuipwa lu. Pa ci kenade ga ngngei lu, ket pe zetle ba, nah kedabe pe hile. 30 Pecai Samson rangdi, "A keringria au Philistinme de ngngwa tsai zieda." Pa pe kengkieng teu eh nzangpet gai ge ki cide cika kebam deuceudidung nah kilung ga kebam mina pelane reuga cakmie. Cine pa pe tsit dau mina teitset kelu au pa ring keladau swade teitset kieelu.✝ 31 Pecai pe sinamedung nah pe pei kelak pelane pe paau pwalu kerane hung. Penui pecu pwalu, delwe caili nghang. Penui pecu Zorah penai Eshtaol kakga, pe pei Manoah de kekung bam gage kungdi. Samson Israel de mmi ngkai tutiak tei.