1 Pecai, wheat luhlüt tingdau, Samson hemeu hau gade hemeu nage teu eh pe nau da mie. Kedanemene pa rang eh, "Ih a nau da mie zie, helungbe bung ga." Dede pe pei pecu peu lwetma. 2 Pe pei rangdi, "Kesang nang pecu ngkau bi kela Ih rang gaila, cine Ih pecu nzangbe de penau kera peu dida. Pe caihereibe pui au peswa yi meni? Kehereide pe keleu gade pecu n nau lulo." 3 Samson penui dage rangdi, "Henaipia Philistinme hade gade Ih penuide renia eh kekap teu kegwang ga Ih a mau gah." 4 Pecai Samson mie maiserungdung hai cum tuilu delwe pa pemi kenana kang ncütlu. Pa helei ket mtaulwe pemi kena kak sum gage kailu. 5 Pa heleidung de mi taugai, delwe cidungde de Philistinme meibang kesapdung kak gage hiak gaidi. Cine pa meibangdung nah sap kebam meidung kenana rudi, kubeluh de, nah olive gurie de si eh. 6 Cine Philistinme rangdi, "Caune aide teino?" Ge penui keligai, "Samson, pe pau Timnahme pei, pa pe nau de pwa pe zangna be de peu kedine." Cine Philistinme hang pe napui nah pe pei de mi le rudi. 7 Samson penui dage rangdi, "Nnui ainzwa tei kesang kedine, Ih nnuide renia eh a kumpeei di delei, nah pecai au, Ih mtak dizie." 8 Pa penui pipei nah mniedung gage kedeu, daptset sütdi. Pecai pa nghung heni Etam tsu qukela tsuraki ga bamdi.

9 Dede Philistinme hanglu delwe Judah ga ramzeuki teilu nah penui Lehi nam ga hereu tei kera mteilu. 10 Cu Judah ga minadung rangdi, "Daitei eh nnui anuide renia hang lano?" Penui rangdi, "Anui au Samson de kanglu kera hangla, pa anui dage tei kegai kesiakke pecu teibeu kera." 11 Pecai Judah ga mipei cangcum Etam tsupop ga nghung lu delwe penui Samson dage rangdi, "Nang ci meni Philistinme anui reu di kebam? Aide daipai nang anui dage teigai dino?" Pa penui dage keligai, "Penui a dage tei kegai kesiakke, Ih de penui dage teigai dida." 12 Penui pe sam keligai, "Anui ncu kanglu kera nghung luda ncu pwa Philistinme ba gage kai beudi kerane." Dede Samson penui dage rangdi, "Nnui ne acu teilak lie kecu sampet lulo." 13 Penui pe sam keligai eh, "Lak, dede anui ncu kang bi luzie delwe anui ncu pwa penui ba gage kaibeu dizie. Dede kesang anui ncu teitset dilak." Delwe penui pecu heria keheci kenale kanglu delwe pecu tsupop gade pwa nghanglu.

14 Pa Lehi deige ga gwanglu, ge Philistinme pecu mna gwang ge penui masah di. Ge RAMPAUBE Rabe pecu tei ngkieng süt beu. Heriadung pe ba ga kangpwa kelade penui mi ne ru kedi reigau tie nzwadi, cine periade pe ba gade hiak mpet di. 15 Pa gada geijara keheci ge ngaulu, nah pa pe ba hetwa pet cide keulu nah pa cide pwa mipei pecang gede daptset di. 16 Pecai Samson rangdi,

"Gada geijara le, ketsai paau keheswa reu, gage heswalu,

gada geijara le Ih mipei pecang gede teitsetlu."

17 Pa marang cang dige pa geijara de pe ba gade kelien gidi, nah pa heni cide zi Ramath Lehi* msiaklu. 18 Pecai Samson hereu sütdi nah RAMPAUBE dage sahgai eh pa rangdi, "Nang nkatei ne ngkiengkelu kedi aide N kilabe ba gage kai beuda. Dede cu Ih hereu eh tsai dizie deni iciu eh hegeurum kemakme ba ga Ih lütti kera." 19 Cine Tinggwang Lehi ga kebam ketietki ge let gaibeu, nah cikade dui lwampetlu. Pa sak luge pe kengkieng gwang dailu ciu eh pa ncang gwang dailu. Ciziemne pa heni cide zi En Hakkore* msiaklu, cide henai kecang de Lehi ga bam. 20 Ciciu eh Philistinme kedi ketei tingdau Samson mmi ngkai Israelme tutiak teigwang.