1 Pecai Jerubbaal (cide Gideon), cuh zilu, nah pecu ngngwa kela mina pelane, nah penui Harod duilet taiga ramzeuki teilu. Midianme ramzeuki au penreule bam, langkam ga Moreh deutu lambie.

2 RAMPAUBE Gideon dade rangdi, "Ih penui ba gage Midianme de peugai kera ncu ngngwa kelame kieezu dida, iciucai Israelme a nreu kendu ngaupwa dizie, rang eh, ‘Akatei a ba ne acu kelilu.’ 3 Cu ciziemne, minadung kwen gage rang eh reci beulu, ‘Ngngi nah mbeu kebam keheibe de, pecu peu caili dilu nah Gilead Deutu gade tet dilu.’" Cine mina cang ngkaiekena caili di, dede cang kerei bamdi.

4 Pecai RAMPAUBE Gideon dade rangdi, "Cude minadung au kie ham zeu reu. Penuide dui ga ngngwa mie lu, iciude Ih penuide nziemne keustam beuzie. Cine keheibe de de Ih ne rang kecume, ‘Aide ncu ngngwa mie zie,’ pa ncu ngngwa mie zie. Dede Ih ndade, ‘Aide ncu ngngwa mie lak,’ de rang kebeu keheibede pa mie lak." 5 Cine pa minadungde dui ga ngngwa nghung lu, nah RAMPAUBE au Gideon dade rangdi, "Pe nleu le heteu nzwa dui gade nrop kecume de, nang pecu keutsam dizie, dui nrop kerane pe ngkokpui ga koktung kemie me de cinzwa keutsam luzie." 6 Penui bale pwalwe penui muile nrop kecume mina hai cum, dede mina kedadung pelane au dui sak kerane penui nkok koktungmie. 7 Pecai RAMPAUBE Gideon dage rangdi, "Mina dui nrop kecu hai cum de ngngwa eh, Ih ncu ngha beuzie nah Midian pwa n ba ga ge peudi zie. Cine mina kedadung de peu pe bam riep ga cailigwang dilu." 8 Pecai minadung penui ba gage mania nah penui teluidung pwalu dede Israelme kedadung de pa langgi di, penui paiki riep gage, pa kaizeukelu mina hai cum de gwale. Midianme ramzeuki au Gideon ngkang langkam ga bam.

9 Cipau ziu de RAMPAUBE pe dage rangdi, "Cuhlu! Ramzeuki ga nghung cu, kedanemene Ih pecu n ba gage kaibeu dida. 10 Dede nang magade nghung kera ngngi cai, n reunet kepwabe Purah de ngngwalwe nang ramzeuki ga nghung lubui, 11 nah nang penui daipai rang bambi siuzie, nah kekamle n ba kena teinkeing beuzie nah nang ramzeuki de renia kera nghung zie." Cine pa nghung di, pa nah pe reunet kepwabe Purah, ramzeuki mina riakngei kebam tün ga. 12 Midianme, Amalekme, nah naimiak kepetle leuhme pelane langkam ga zeu bam, tangriem maaga nzwa kiee süt bam. Penui gu utdung au pei kap gailak, jaaidi kunga heciangdung nzwa. 13 Gideon gwanglu, ge ainie, mige pe kidabe dage hemang ge siaklia bam. Pa rangdi, "Ainie, Ih hemang ge mmi, nah ainie, barley tangkukwak kengwage Midianme ramzeuki ga mluimie la. Cide paiki dei ge ga mie, nah cide hangdeu ga kau taksu di nah ramzeuki kau zeudi." 14 Pe kidabe samkeli eh rangdi, "Aide ma keda meda, aide Israelme pei, Joash napei, Gideon kingtie zielie maige. Tinggwang Midianme de pwa pe ba ga ge peu dida nah ramzeuki pelane."

15 Gideon hemang siak kegaide, nah cide kie rang kegaide siu luge, pa RAMPAUBE da keumie eh reca di. Pa Israelme ramzeuki ga cailigwang rangdi, "Cuh lu! RAMPAUBE ne Midianme ramzeuki nnui ba gage kaibeu dide kecune." 16 Pecai pa mina hai cum de nzi pwa maa kecum teilu, nah pa telui pwa pelane ba gage kaibeu mabung kenrwa be de si eh, mabungdung lungga mipakdung de si eh. 17 Pa penui dage rangdi, "Nnui acu pielwe cinzwa teizie. Pielu! Ih ramzeuki tu ga gwang keladau, cide kesiak ge nnuide tei maisia. 18 Ih telui kwa gaide, Ih nah acu ngngwa kela leune, nnui telui kwa gai zie, nnui ramzeuki twagwa kebam leune de. Pecai nnui sahbak gai zie, ‘RAMPAUBE ziemne nah Gideon ziemne!’"

19 Cine Gideon nah pecu nzang kela mina haige ramzeuki kung ga gwanglu, muisum kekwame kedet tingdau. Kekwame penui bamga bam luge, penui telui kwagai, nah penui ba ga kela mabungdung kediang gai. 20 Pecai hemaa kecum de teluidung kwagai nah penui mabungdung rütpok gai. Penui ba hile heleikidung teula nah kwagai kerane penui ba zetle teluidung la. Penui sahbak gai, "Anui RAMPAUBE nah Gideon ziemne kingtie ge." 21 Hange ge kecu pe sap ga ramzeuki de twagwa ge ramzeuki gade pelane pakdi. Penui sahbak eh pakdi. 22 Penui telui hai cum de kwagai ge, ramzeuki ga kebam pelane de RAMPAUBE ne mi hange ge kecude peu pe zangbe de kerebi. Cine reugwame Zererah lambie Beth Shittah dei ge pak miedi, Tabbath lambie Abel Meholah tu kemdei ga kecang. 23 Pecai Israelme Naphtali nah Asher gade, nah Manasseh pelane gade qu hekwalu, nah penui Midianme de zuimie.

24 Gideon samgwame de kideutu deudi Ephraim pelane gage de langgai eh ranggai, "Midian de kemcwale nghunglu nah Beth Berah ga kebam Jordan Reuki gade tuilu." Iciu eh Ephraimme pelane de qu hekwalwe tuilu Beth Barah nah Jordan Reuki kecang ga. 25 Penui Medianme hegwangna hangna de tuih lu, Oreb nah Zeeb. Penui Oreb de Oreb tsura gade teitsetdi, nah penui Zeeb de Zeeb zauniakbam gade teitsetdi. Penui Midian de zuimie nah penui Oreb penai Zeeb peu Gideon da teu gwang beudi, Jordan gwale gade.