1 Ephraimme de qugai nah penui tingtünle kah hang nah Jephthah dage rangdi, "Nang daitei eh Ammonme de regi kera tetkahgwang no dede anuide peu ncu nzangmie kera qu meno? Anui mi le ncu nah n ki ru ngkau dizie." 2 Jephthah penui dade rangdi, "Anui au mina ma kebwak süt kecu ga la dida, Ih nah a minadung nah Ammonmedung. Ih nnuide qu kegai dau, nnui acu penui ba gade keli beuma. 3 Nnui ngha kera gwangla kemak Ih ngau luge, Ih a teilung kerehim gage kailu, kengkieng dede nlum eh. Ih Ammonme de kahgwang, nah RAMPAUBE penuide pwa a ba gage kaibeu. Cu nnui daitei eh henai de acu regi kera gwangla no?" 4 Pecai Jephthah Gileadme pelane de hekwalu delwe penui Ephraimme de ngngwa regi. Gileadme au Ephraimme de regi kedanemene penui ainzwa rang kegaine, "Ephraim gade gikedime nnui, O Gileadmedung, Ephraim kakga de nah Manasseh kakga de." 5 Gilead ne Ephraim deurai Jordan kahkepet nidung de tuilu. Cide teidi Ephraim ga tsaikebangme ge rang eh, "Ih kahpet lu bui mi," dege Gileadme pedade rangla, "Nang Ephraimme ge ni?" Magade Pa "Ma lie," rang de cai 6 penui pe dage rangla, "Kehereide Shibboleth: de ranglu," dede pa "Sibboleth" de eh rang cai, pa rang petau teilu kemakne, penui pecu tuilu delwe Jordan kahkepetnidung gade pecu daptset dila. Cidau Ephraimme cang riakdaiekena de teitsetdi.

7 Jephthah mmi herok Israel tutiak tei. Pecai Gileadme pei Jephthah tsaidi nah penui pecu Gilead ga namdi ge gage kungdi.

8 Pecai Jepthah tsai kedicai Bethlehemme pei Ibzan ne Israel tutiak tei. 9 Pa pena mipeina camrei nah mipuina camrei bamla. Pa pe napui camrei de peu pe pautsa gwale ge mmeu gaidi, nah pa pe pautsa gwale de releime camrei de pe napeidung nau kerane ngngwa gwanglu. Pa mmi hena Israel tutiak tei. 10 Pecai Ibzan tsaidi nah penui pecu Bethlehem gage kungdi. 11 Pecai Elon Zebulunme ge Israel tutiak tei. Pa mmi kerei Israel tutiak. 12 Pecai Elon Zebulunme pei tsaidi nah penui pecu Zebulunme deu Aijalon nam gage kungdi.

13 Pecai, Abdon, Pirathonme me Hillel napei Israel tutiak. 14 Pa pe napei riakdai bam nah pe tsame camrei bam, penui gadaseudung riakhena reu cwala. Pa mmi heset Israel tutiak. 15 Pecai Abdon, Pirathonme Hillel napei tsaidi nah pecu Ephraim deu ga Pirathon namdi gage kungdi, Amalekme deudi tu nam gage.