1 Ge Joshua Shechem gage Israel leuhme pelane de qu hekwalu Israel hecing hangkiame, muiteume, tutiakme nah kedime de, delwe penui Tinggwang dwaga gwang. 2 Joshua mina pelane da rangdi, "RAMPAUBE Israel Tinggwang ainzwa rangla, ‘Ndaa nnui paume tingdau Euphrate Reuki lule gim lungh, Abraham pei Terah nah Nahor pei, penui hera kedabe de reca la. 3 Dede Ih nnui pei Abraham de Euphrate Reuki lule gim de ngngwa lu, delwe pecu peu Canaanme deu pelane kahgwang, nah pe leuh tei ngkiee beu, delwe pecu Isaac peu. 4 Cipaucai Isaac de Ih Jacob nah Esau peu. Ih Esau de Seir hangdeutu namdidung gum kera peu, dede Jacob nah pe leuhme Egypt ga nghungdi. 5 Cipaucai Ih Moses nah Aaron de langgai eh Ih Egyptme de teikeherei. Pecai ih nnuide ngngwa mpet beu. 6 Pecai Ih nnui paume de Egypt gade ngngwa mpet beu nah nnui Jaaidi ga gwang Egyptme nnui peime de bagidung nah hekwen keteume Jaaidi Kegie ga gwamie. 7 Cine penui RAMPAUBE da hap eh kie, ge Pa nnui nah Egyptme kakga kemui kaidi, pa jaaidi teugwang penui reu gage kailwe gumdi. Nnui miakle ngauda Ih Egyptme da dai teigai dibi. Delwe nnui hetaideu ga peting kekiee ge lung. 8 Ih nnuide Amoritme deu ga ngngwa gwang, Jordan reukung kedale lungh kebamme da. Penui nnuide regi nah Ih penuide nnui ba gage kaibeu, nah nnui penui deu de gum luda, nah nnui dwade Ih penui de teimsia dida. 9 Ge Zippor napei Balak, Moabme gwangpei, cuh lwe Israelme de ngngwa regi. Pa Beor napei Balaam de kugai nah langgai, nnuide reset kera. 10 Dede Ih Balaam kwa kingnei ma, cine pa nnuide samlam beu, nah pe ba gade nnuide kelibeu. 11 Delwe penui Jordan kahpet lwe Jericho namdi ga gwang, nah Jericho minadung nah Amoritme, nah Perizzme, nah Canaanme, nah Hittime, nah Girgashme, nah Hivitme nah Jebusime nnuide ngngwa regi, dede Ih penuide nnui baga kaibeu. 12 Ih nnui dwaga kuidi langgai, nah cidungde ne nnui dwa gade penuide gwa mpetdi Amoritme hegwangme kena nnui kingtie nah nnui lakpidung le au ma. 13 Ih nnuide rei mezing eh hangdeu aide peu nah namdidung nnui ne tei ma dede nnui cika lung. Kubetsi nah olive tsidung nnui linggai kemak bang gade nnui tyei bam.’

14 Cine cu au RAMPAUBE mie hinglu nah nnui lungsang pelane teu peta teilu, nnui peime Egypt ga Kereuki gwale hera keda reca kelade gidi eh RAMPAUBE gwa teilu. 15 Dede nnui miak gade magade RAMPAUBE gwatei neumai, nnui katei nnui caube gwatei ziebi kedetlu, ndaa nnui paume Euphrate Kereuki gwale reca kela rabedung de ziemi nnui lung kebam deu ga Amoritme rabe de ziebi. Dede Ih nah a kilungme au RAMPAUBE gwa teizie."

16 Pecai minadung sam keli eh rangdi, "Anui RAMPAUBE de pütdi eh hera keda ge de reca kera au lakzing, 17 kedanemene RAMPAUBE anui Tinggwang ne anui nah anui peime de Egyptme deu gade teu ncuh beu, hebaang ketei ki gade, nah mimakecang bata anui lambie ge tei gai, anui tet kela lampui leu ga anui de gum beu, nah mina leune kakga anui kahgwang kecudau de. 18 RAMPAUBE mina hangdeu aika lungh kebam leune de gwa mpet beu anui dwa gade, Amoritme de si eh. Cine anui de RAMPAUBE gwa tei zie kedanemene pa anui Tinggwang."✝

19 Dede Joshua minadung da rang eh, "Nnui RAMPAUBE gwa tei gailak de cilak, kedanemene Pa au kemci Tinggwang; Pa au periakketei Tinggwang. Pa au nnui hezaidung gikah kedi nah nnui kemau tei kedi de nnui mau gilak. 20 Nnui magade RAMPAUBE de pütdi eh hera kedade reca ladicai, pa nreu gwang nnuide rezam dizie nah nnuide teimsia dizie nah pa nnui da makeyibe tei kebeu caine." 21 Dede minadung Joshua da rangdi, "Lak anui RAMPAUBE gwa teizie." 22 Ge Joshua minadung da rangdi, "Nnui RAMPAUBE de kedetlu delie nah pe gwa teizie lie de eh nnui katei nnui zierang teizie." Penui rangdi, "Anuide zierangme da." 23 "Ciziemne cu, nnui kakga sangme rabe kebamdung de keugi dilu, nah nnui mlung RAMPAUBE Israel Tinggwang da nreu gailu." 24 Ge minadung Joshua da rangdi, "Anui RAMPAUBE anui Tinggwang gwa teizie nah anui pe kwa kingnei zie." 25 Joshua cipaunai minadung de ngngwa samkaklu, nah Shechem ga penui ziemne hezai ge nah hetuketiak ge teibeu. 26 Joshua aipau samde Tinggwang hezai Laisiukwak gage raulu. Ge pa tangtsukang kedi ge keulwe mhu bang kang gage sumlu, RAMPAUBE recabam taiga. 27 Joshua mina pelane da rangdi, "Pielo, tangtsukang aide anui ziemne zierang ge zieda. RAMPAUBE anuida kerang samdung pelane siu luda. Cine cide nnui gu zierangketei ge zieda, nnui Tinggwang de nnui mlai dicai." 28 Ge Joshua mina pe deu gumkelu gage langgai di.

29 Ma aidungde tei kedicai, RAMPAUBE kilabe Nun napei Joshua mmi haigekerei dau tsaidi. 30 Penui pecu pe magum deurai gage kungdi, Timnath Serah Ephraim kideutu deudi Gaash Deutu, tingtünle gage kungdi. 31 Cu Joshua tingdau Israelme pelane RAMPAUBE gwatei eh lung, nah Joshua caide muiteume pelane penui peting ketiee ge tei gwang, RAMPAUBE Israelme ziemne pe bata tei kegai pelane cibam.

32 Israel namedung Egypt gade Joseph raadung penui pwa nghang Shechem gage kungdi, Jacob ne Shechem pei Hamor namedung dade rangkanggeu hai le lui kelu hangdeu kesa ga, nah Joseph namedung ne magum tei kelu teilu.✝ 33 Cipaucai Aaron napei Eleazar tsaidi, penui pecu pe napei Phinehas deu Gibeah gage kungdi, kideutu deudi Ephraim ga pecu kepeu deu ga.