1 Joshua cing nah pemmi kiee süt dige RAMPAUBE pe dade rangdi, "Nang cing nah n mmi de kiee süt dida, dede cude hangdeu gumlu kera bam süt reu. 2 Hangdeu aidungde cude bamsi reu: Philistinme cuikui pelane, nah Geshurme deu pelane; 3 naimiak kepetle Egypt ga, Shihor gade tingtünle Ekron namdi rai kecang (cide au Canaanme deu), Philistinme gwangpeidung mengei, Gazame, nah Ashdodme, Ashkelonme, Gathme, nah Ekronme, nah Avvime 4 tingbang lebie; Canaanme deu pelane, Arah gade cide au Sidonme deu gade Aphek, Amorme rai ga kecang; 5 Gebame deu, nah kepet lebie Lebanon pelane, Baal Gad gade Hermon Deutu ngkang gade Lebo Hamath kecang. 6 Kideutu pelane ga lungh kebamme Lebanon gade Misrephoth Maim kecang, nah Sidon ga lungh kebamme pelane, Ih akatei penuide gwagi dizie Israel namedung dwa gade. Nang Israelme dage dacak tei eh hangdeu mzilu maisia, Ih ncu aja kai kebeu de nzwa. 7 Ciziemne, cu hangdeu aide pwa penuigu tei kera heleuhdung hekui nah Manasseh leuh pempie ziemne mzi beulu."

8 Keda pempie-leuh, Reuben nah Gad leuhme de si eh Moses ne peu kebeu hangdeu naimiak kepetle Jordan gwale ngaulu, RAMPAUBE kilabe Moses ne penuide kepeu nzwa: 9 Arnon reuki tule lamlwa kena kakga langkie ga Aroer gade (lamlwa kakga namdi kebamde de si eh), nah Medeba kecehu langkie pelane gade Dibon ga kecang; 10 Sihon ga namdidung pelane, Amorme gwangpei, Heshbon namdi ga kedi tei kecube de, Ammon namedung rai ga kecang; 11 nah Gileadme, Geshurme nah Maacahme cuikui ga kecang nah Hermon Deutu pelane, nah Bashan pelane Salekah ga kecang; 12 Bashan ga Og hegwangram pelane, Ashtaroth nah Edrei ga kedi tei kecube, pa Rephaime bang kelume ga bamdi, Moses ne penuide ngamdi nah penuide gwa mpetdi. 13 Dede Israel namedung Geshurme, nah Maacahme de gwagi dima, cine cu kecang Geshur penai Maacath Israel kakga lungh bamla. 14 Moses Levi leuhme de rünne hangdeu peu ma. Penui RAMPAUBE Israelme Tinggwang da keru recadung de penui qwa pwa penui gu teidi, RAMPAUBE Moses dage rang kebeu nzwa.

15 Moses Reuben namedung leuh de hangdeu penui pautsa rehi gade pwapeu. 16 Penui deu au Aroer gade, cide Arnon reuki lamlwa kena kakga langkie tu ga, nah namdi cide langkam sum ga, nah Medeba cehu langkie pelane, 17 Heshbon nah cehu langkie ga kebam pelane ga namdidung, Dibon, nah Bamoth Baal, nah Beth Baal Meon, 18 nah Jahaz, nah Kedemoth, nah Mephaath, 19 nah Kiriathaim, nah Sibmah, nah Zereth Shahar langkam deutu ga, 20 nah Beth Peor, nah hena nghung Pisgah ga, nah Beth Jeshimoth, 21 nah cehu langkie namdidung pelane, nah Amorme gwangpei Sihon hegwangram pelane, Heshbon ga kedi tei kecube de, Pecu nah Midian muiteumedung de si eh Moses ne ncüt eh ngamdi, Evi, nah Rekem, nah Zur, nah Hur, nah Reba, Sihon hegwangpei nadung, cipau deu ga lungh kecume. 22 Israel namedung ne kiengtie le teitset kedi ga Beor napei Balaam, rekabe, teitset kedime ga si. 23 Reuben namedung deurai au Jordan de da. Aide au Reuben namedung penui pautsame rehi gade hangdeurai da, penui namdidung nah renamdung.

24 Moses ne Gad leuhme nah Gad namedung de penui pautsame rehi gade hangdeu peu; 25 Penui deu au Jazer, nah Gilead namdidung pelane nah Ammon namedung deu pempie gade naimiak kepetle Rabbah ga Aroer kecang, 26 nah Heshbon gade Ramath Mizpah nah Betonim kecang, nah Mahanaim gade Debir rai kecang, 27 nah langkam ga, Beth Haram, nah Beth Nimrah, nah Succoth, nah Zaphon, nah keda Heshbon gwangpei Sihon hegwangram Jordan de herai kecu gade naimiak kepetle bie Jordan gwapet Jaaidi Kinnereth nli ga kecang. 28 Aide au Gad namedung de penui pautsame rehi gade pwakepeu deu, penui namdidung nah renamdung.

29 Moses ne Manasseh leuh-pempie de, nah cide au Manasseh namedung leuh pempie de penui pautsame rehi gade pwapeu; 30 penui deu au Mahanaim gade, Bashan pelane, Bashan gwangpei Og hegwangram pelane nah Bashan ga kebam Jair namceudung pelane namdidung riakherok; 31 nah Gilead namdi pempie, nah Ashtaroth, nah Edrei (Bashan ga Og hegwang namdidung) au Manasseh napei Machir namedung ziemne Machir namedung pempie penui pautsame rehi gade pwapeu.

32 Jordan kahpet naimiak kepetle Jericho ga Moab langkie gum kera Moses ne aidungde mzibeu. 33 Dede Moses Levi leuhme de hangdeu gum kera peu ma. Pa penui dage penui qwa au RAMPAUBE, Israel Tinggwang zie, pa rangbeu kecu nzwa.