1 Dede Israel napeidung mateimsia kera maniadung keu ntsam kelu reu gage kemauta ge teidi. Karmi napei Achan, Zerah napei Zabdi, Judah leuh gade, mateimsia kera maniadung keu ntsamkelu gade keudi, nah RAMPAUBE rata Israel napeidung reuga ruigai.

2 Joshua minadung de Jericho gade Ai ga langgai, cide au Bethel naimiak kepetle Beth Aven taiga. Pa penui dage ranggai, "Nghang eh hangdeu de reketlu." Cine mina nghang eh Ai nam de reketlu. 3 Penui Joshua da cailigwang kecudau, penui peda ge rangdi, "Mina pelane de lang nghang so. Ai de gwa kerane mina cang na mede cang cum lang nghanglu. Cika mina peciakne de peu heta teiso, kedanemene penui au mina camlu." 4 Cine Israelme cang cum kenzwa ge cika nghanglu, dede Aime dwa gade penui pakdi. 5 Aime ne mina camrei-herok de Shebarim* dwa gade kirie kecang gwamie teitsetdi, nah penuide kenghung gade teitsetdi, cine minadung helung ceu nah ngngidi.

6 Pecai Joshua pe paini hietdi. Pa nah Israel hangkiamedung penui peu gage rebui kailu delwe RAMPAUBE samkakbung dwa ga keumie tinghegi kecang bamdi. 7 Ciu eh Joshua rangdi, "Ah, RAMPAUBO Tinggwang, daitei minadung de peu Jordan kahpet anui de teimsia kera, Amoritme ba gage kai beuno? Magade anui Jordan lulegim lungh kecu nnung lu lie cai! 8 O Rampaubo, cu au Israelme penui ngauraume dwa de nreu cailidi delu, ih dai rang lu lai no? 9 Kedanemene, Canaanme nah cipau deu ga kelungme cide siulu zie nah anuide twagwalu eh anuide teitset dizie. Ciucai n zi kedi de ziemne nang daitei lai no?"

10 Pecai RAMPAUBE Joshua dade rangdi, "Cuh lu! Nang daitei ainzwa nzu keumie lwe bam no? 11 Israelme kemau tei dida, nah Ih penuide aja kebeu samkakdung de gikah dida, nah teimsia kera keu ntsam pwa kebamdung gade de keu dida, nah rega nah cwa kedidung keulwe penui niadung kakga ge kai ncütdi. 12 Ciziemne, Israel namedung penui ngauraumedung dwaga saplu tadi. Penui ngauraume dade nreu tetdi kedanemene penui katei de teimsia dilu kera keu ntsam kedine. Ih nnuida la si lakta nnuide teimsia kebeu niadung de teimsia di mecai. 13 Cuh lu! Minadung de teimcilu nah penui da ranglo, ‘Ncünne ziemne nnuide teimcilu, kedanemene RAMPAUBE Israel Tinggwang ranggai, "Israel, nnui kak gade ma teimsia kera mania keu ntsam pwa bam. Nang aidung de keugi di kemaktane nang n ngauraume dwa gade sap gailak bam." 14 Nnui tingcang, heleuh ria gade nnui katei nnuide lia gailu. RAMPAUBE kedet kelu leuh de pautsa rehi gade gwang nna zie, pautsa gade kelak ramsang teu nna zie, kelak ramsang gade RAMPAUBE kedet lwe mipei de teu nna zie. 15 Mateimsia kecudung de keu kecume de mi gage ru dizie, pecu nah pegu mania kebam pelane, kedanemene pa RAMPAUBE gu samkak de gikah nah pa Israel de hengam tei kedine.’"

16 Cine, Joshua tingcang nuge cuhlu eh Israelme de penui leuhme taiga ngngwa gwang lu, nah Judah leuh de pa ngngwa lu. 17 Ciu eh pa Judah pautsa de ngngwa gwang nnalu, nah pa Zerah pautsa de ngngwa lu. Pa Zerah pautsa de kilungme gade ngngwa gwang nna lu, nah pa Zabdi de ngngwa lu. 18 Ciu eh pa pe kilungme de ngngwa gwang nnalu, nah pa Karmi napei Achan, Zabdi napei, Zerah napei, Judah leuh gade ngngwa lu. 19 Ciu eh Joshua Achan dage rangdi, "A na, cu au RAMPAUBE, Israel Tinggwang de hetwa peu, nah pe dage n maudung pet lulo. Nang daitei dibi a dage ranglo. A dade cide mbai diso." 20 Achan Joshua de keligai, "Kesang, Ih RAMPAUBE, Israel Tinggwang dage kemau teigai dida." 21 Shinar gade tui keludung kak gade ngaukelu hezukeyi ncwa ge, rangkanggeu shekel hai na*, nah kecak kang ge perüt shekel riakngei*, Ih cidung de keuneu sütdi eh keulu. Cu pielo! Cidung de a ramzeuki hangdeu sum gage hebai pwa bam, rangkanggeu de pengkang ga bam.

22 Cine Joshua pe gwamedung langgai eh penui ramzeuki eh penui pakmie, nah ainie, cide pe ramzeuki gage kebai nzeu, nah rangkanggeu pekang ga bam. 23 Penui cide ramzeuki sum gade keulu eh Joshua nah Israel napeidung da pwagwang cidung de RAMPAUBE dwa gage ruigai. 24 Ge Joshua nah Israelme pecu ngngwa kela pelane Zerah napei Achan, nah rangkanggeu, nah ncwa, nah kecak kang nah pe napeimedung nah pe napuidung, nah pegu hetumseudung, pegu gada, pegu meurün, pe ramzeuki, nah peda kebam pelane pwagwang Achor langkam ga pwa gwang lu. 25 Ciu eh Joshua rangdi, "Daitei nang anuide teikeherei lano? Aipau nai RAMPAUBE ncu teikeherei zie." Ciu eh Israelme pelane pecu tangtsu le sam, (tangtsu le penuide sam kedicai mi le penui de ru si dai). 26 Penui pereu gage tangtsu kwa cehu sütdi cide henai kecang bamla. Cine RAMPAUBE ru kebam rata gade nreu gwanglu. Ciziemne cipau bam zi de Achor* langkam lie henai kecang de qula.