1 RAMPAUBE Joshua dade rangdi, "Reugwame pelane de ngngwa lwe Ai ga nghanglu, ngngi so nah helungceu diso. Pielo, Ih ncu peu Ai gwangpei, nah pe minadung nah pe namdi nah pe deudung n ba gage kaibeu dida. 2 Nang Jericho nah pe hegwangpei de tei kegai nzwa Ai nah pe hegwangpei dage teigai zie, dede nang cika maniadung mede kauruinedung ngu tei lubui. Pecaile mbai lwe namdi gwa ketang kera nnui de mteilu."

3 Cine Joshua nah reugwame pelane Ai de regi kera tet cuh gai. Ge Joshua, reugwa ngkiengtumedung cang camrei de kedetlu, delwe penuide tingmui langgai. 4 Pa penuide aja kaigai, "Pielo, namdi caile mbai lwe penuide gwaketang luzie. Cikade tet mdei mtei so; dede nnui pelane mteiteu lalu. 5 Ih nah a minadung namdi ga gwang zie, nah Aime anui de renia kera pet de, anui penui dwa pak dizie keraibe pia de nzwa. 6 Anui penuide namdi gade ngngwa tetdi kemaktane anuide zuizie. Penui rangzie, ‘Penui ndaa keraidau anui dade pakla.’ Cine anui penui dwade pak zie. 7 Cipaucai anui mbai kebam gade mpet lwe namdi de tui luzie, kedanemene RAMPAUBE nnui Tinggwang cide nnui ba gage peuzie. 8 Nnui renam gwalu de, cide mi twagai zie, RAMPAUBE pe sam kai kebeu de nzwa eh. Pielo, ih nnui de aja kaila." 9 Cine Joshua penuide lang mpet gai, nah penui mbai bam ga mie, nah penui Bethel penai naimiak kenlütle Ai kakga kwabamdi. Dede Joshua cipau ziu minadung kakga bamdi.

10 Joshua tingcang nuge cuh minadung de qu hekwalu. Ciu eh pa nah Israel ga hangkiame dwa pet Ai ga nzang mie. 11 Reugwame pecu ngngwa kela pelane renam mna gwang tingtünle bie Ai gage ramzeuki teilu. Cika penui nah Ai kakga langkam ge bam. 12 Pa mina cang mengei ge de hereu gwa kerane namdi naimiak kenlütle bie Ai penai Bethel kak gage kai zeu. 13 Penui mina de pebam riep ga mtei nzeulu, reugwame namdi tingtünle bie kebam pelane, nah pecai kekwame namdi naimiak kenlüt lebie. Nah Joshua cipau ziu de langkam sum ga mie bamdi. 14 Cidau Ai gwangpei minadung de ngau luge, pa nah pe minadung zette renam gade tet pet Israelme de ngngwa regi kera kedetkelu bam gade mteilu. Dede pa pecu namdi caile de mbai kebam maa lüt pecu gwaketang kera cima. 15 Joshua nah Israelme pelane penui katei de peu penui dwa gade ngamlu, nah hetaideu lampui ga pak gaidi. 16 Ciciu eh namdi ga mina pelane de penui de zuimie kera qu hekwalu, cine penui Joshua de zuimie, ge namdi gade mdei reu reudi. 17 Ai ga mede Bethel ga migede Israelme cai zuimie ta kedi teima. Cine penui namdi de ngkei pwa bamdi penui Israel de zuimie kedine.

18 Ciciu eh RAMPAUBE Joshua dade rangdi, "N ba ga kebam hengei de Ai gage sau gai, Ih cide n ba gage kaibeu zie delu." Cine Joshua hengei peba ga kebam de namdi gage saugai. 19 Ge pa peba hwa gai herizi cika mbai kebammedung de cuh kwalu nah penui bam gade pak kelwa mpetdi. Penui namdi ga lüt eh cide keulu, nah renam gage mi twa zette gai. 20 Ge Aime nreu gwang pie, nah ainie, namdi ga mika tinggimle hang kecu ngaulu, nah penui lule ailam pak gai kera lampui gede gahdi. Kedanemene hetaideu gage tetgai kedimedung de cu nreu gwang gwaketang kelame de renia zie delu. 21 Joshua nah Israelme pelane mina mbai kebam namdi de tui kelu ngau, nah namdi ga mika hangdi ge, penui nreu gwang Aime de teitsetdi. 22 Namdi gade penuide renia kegwangme, cine penui Israelme kakga bamdi, kangge ailam nah kangge lule. Nah penuide teitsetdi, peu mi gede bang luma mede ring luma. 23 Penui Ai gwangpei de nring tuilwe Joshua da ngngwa gwang beudi.

24 Israelme hetaideu ga Ai namdi ga kelungme de penuide zui kemie leu de teitset cangdi ge, nah cika mina de kingtie le ngkapzingdi, ciu eh Israelme pelane Ai ga cailigwang nah cika mina pelane de teitsetdi. 25 Cipau nai Ai namdi ga kau kedime pelane cang kereiekena, mipei nah mipui de si eh, Aime pelane. 26 Kedanemene Joshua peba ga hengei de hezang pet lwe, pa Ai namdi ga kelungme de ngkap ciakdi kemaktane cide keu nghung dimah. 27 RAMPAUBE ne Joshua de rangkebeu nzwa eh, Israelme namdi cika de kauruine nah maniadung rünne penui katei ziemne tuilu. 28 Pecai Joshua Ai rudi eh kelungta ngkapdi, henai kecang de cide cinzwa bam. 29 Pecai pa Ai gwangpei de tsingbang gage gwakdi tinghegi kecang. Naimiak kenlüt tingdau, Joshua pe pau tsingbang reu gade pwa nghung lwe cide namdi rieki kimui gade kelien kera aja kaibeu, nah penui cide tangtsu kekieege le kebau cimdi, cide henai de cika bam.

30 Pecai Joshua RAMPAUBE Israel Tinggwang recabam ge teilu Ebal deutu ga. 31 RAMPAUBE kilabe Moses ne Israel namedung de aja kai kebeu Moses zai laisiukwak ga rau kenzeu nzwa: "Hegeu niadung le pwa pangkemak tangtsukangdung pwa tei kelu recabam ge." Cipau reu gage penui RAMPAUBE dage keru recadung nah kezuyi recadung ratak teigai beu. 32 Cika pa Moses zai tangtsudung reu gage rau dailu, ndaa Moses ne Israel namedung pelane dwa gade rau kegai de. 33 Israelme pelane, nah penui hangkiamedung, nah kedimedung nah penui tutiakmedung samkakbung tu kena, RAMPAUBE samkakbung pwa kela Levime nah cingkume dwa ga saplu, sangme nah deuket na, penui pempie ge Gerizim deutu dwale bamlu, nah keda pempie ge Ebal deutu dwale bamlu, Israelme de samlam beu kerane RAMPAUBE ne ndaa Moses dage ainzwa tei lulo rang kebeu nzwa.✝ 34 Pecai, Joshua ne hezai pelane peigai, samlamdung nah resetdung, hezai laisiukwak ga rau pwa kela nzwa. 35 Moses ne Joshua dage aja kai kebeu Israel hemaabe dwade migede de peilia melie de kecu sam ge de bam ma, cika mipui, hename nah penui kakga sangme lung kebamme de si eh.