1 Cipau tingdau Joshua, Reuben, Gad nah Manasseh pempie leuhmedung de qulu. 2 Nah penui dage rangdi, "Moses RAMPAUBE kilame aja kaigai kebeu pelane nnui tei luda, nah a sam kai kebeu leune ajadung nnui mzai luda. 3 Nang aipau tingbadung dega nang n siname de pütdi meda, nah nnui RAMPAUBE nnui Tinggwang sam kai kebeudung kainzeu luda. 4 Cu au RAMPAUBE nnui siname de kemtak peu dida, penuide rang kebeude nzwa. Cu, ciziemne, nreu eh nnui ramzeuki ga gwang cu, nnui gum kelu deu, Moses RAMPAUBE kilabe ha kebeu Jordan deu ga.✝ 5 Dede Moses RAMPAUBE kila aja kekai hezaidung nnui mzai sünne lu; RAMPAUBE nnui Tinggwang de ku eh pe lampui ga tet nah hezai kai kebeudung de mzai nah pecu ngngei eh bamlu nah n mlung nah n keringria pekiene teu pe gwa teilu." 6 Ge Joshua penui de samlam gaibeu eh, penui lang gaidi nah penui ramzeuki ga miedi.

7 (Cu Manasseh leuh pempie de Bashan ga Moses ne maabam peu, dede keda pempie de Joshua ne Jordan naimiak kenlütle penui siname kakga maabam peu) penuide samlam gai eh penui ramzeuki gage langgai di 8 nah penuide rang eh, "Mahei kekiee teu nnui ramzeuki ga cailigwanglu, kauruine kekiee ge, rangkanggeu, kecak, hetageu, hegeu nah painiadung kekie ge. Nnui ngauraume dade ngau kelude nnui siname dage nzilu." 9 Cine Reuben, Gad nah Manasseh leuh pempie namedung, Israel namedung da de nreudi nah Shiloh gade tetpet di, Canaan deu ga, Gileadme deu ga tetgai kerane, penui gumkelu deu ga, Moses dage RAMPAUBE ne rangkebeu deu ga.

10 Penui Jordan cuikui Canaanme deu ga gwang keludau, Reuben, Gad nah Manasseh leuh pempie namedung cika recabam ge Jordan Reuki kung ga teilu, recabam keyi kedi ge. 11 Cu Israel namedung cide siu luge rangdi, "Ainie! Reuben, Gad nah Manasseh leuh pempie namedung Canaanme deu dwaga recabam ge teilu, Geliloth ga Jordan taiga, Israel namedung lambie ge." 12 Israel namedung cide siu luge, penui ngkwa kebam hereu ga mie regi kerane pelane Shiloh ga ngkwa ncütlu.

13 Ge Israel namedung samgwame de Gileadme deu ga, Reuben, Gad nah Manasseh leuh pempie namedung dage, cingkupei Eleazar napei Phinehas de langgai, 14 nah pecu muiteume hangkerei ngngwalwe, Israel leuhme pelane gade hangge ge ngngwa la, nah penui pelane de penui pautsa gade peuketeu medung. 15 Nah penui Gileadme deu ga Reuben, Gad nah Manasseh leuh pempie namedung da gwanglu, nah penui dage ranggai, 16 RAMPAUBE mina pelane maa aide rangzeu, "Nnui Israel Tinggwang zaidung gileu kedi, nah RAMPAUBE caisui ketei gade nreutet lwe RAMPAUBE de renia eh nah nnui katei nnui recabam tei kecu aide dai no? 17 Peor lamlwa ga kemau tei kedide anui ziemne ceuzu ni? Henai kecangde cipaude gade anuide tei mcilu mereu. Cide RAMPAUBE mina maabe da keherei teugwang.✝ 18 Nang henai RAMPAUBE caisui ketei gade nreutet kedi tei dida, nah ainzwa zie nang henai RAMPAUBE de renia lacai, pa ncünne Israel mina maadung de pe rata dizie. 19 Cu magade nnui gum kelu deu de teihera dicai, RAMPAUBE gumkelu deu ga kahgwanglu anui kakga, dede RAMPAUBE de renia so, mede anuide renia eh nnuikatei nnui recabam teiso, anui RAMPAUBE Tinggwang recabam gwale. 20 Zerah napei Achan hemaa ngkapdi kera keustam pwa kebam ga masanglu melui ni? Cine lunghop Israelme pelane reu gwangdi, nah pe mau ziemne pa rünne tsai ma."

21 Pecai Reuben, Gad nah Manasseh leuh pempie namedung Israel pautsa peuteume dage rangdi; 22 "Kengkieng kedibe, Tinggwang, RAMPAUBE! Kengkieng kedibe, Tinggwang, RAMPAUBE! Pa ci la, nah Israel de de peu cilu! Magade anui RAMPAUBE de renia nah cwa cai, henai anuide ketsai gage kai dilu. 23 Anui magade anui katei recabam tei lwe RAMPAUBE dade nreutet dicai, mede magade cipau recabam gage keru recadung, mei recadung mede kezuyi recadung tei gai cai, peu RAMPAUBE de anuide saja peu lu. 24 Ma! Anui kehing le aide teilu, rang eh gwang daikela tingdau n namedung a namedung da rang lubui, ‘Nnui RAMPAUBE Israel Tinggwang de ngngwa daitei kera bamno? 25 Kedanemene RAMPAUBE anui kakga Jordan le herai teidi, Reuben nah Gad namedung kakga. RAMPAUBE de nnui ngngwa magede tei kera gah.’ Iciude nnui leuhme a leuhme de peu RAMPAUBE de hing tadi lu kerane. 26 Cine anui rangdi, ‘Anui katei anui gu recabam ge tei luzie, keru recadung nah ratak ziemne mene, 27 dede cide anui nah nnui kakga zierang ge zie, nah anui ceheu caileu kerame kakga, ciu eh anui RAMPAUBE dwa ga heta teigai kera, anui gu keru recadung nah anui gu ratakdung, nah anui gu kezuyi recadung teu eh, iciude nnui gwangdai kera ting ga nnui namedung anui namedung dage, "RAMPAUBE da nnui qwa gah,"’ de eh rang melu kerane. 28 Cine anui rangdi, ‘Magade anuide mede anui ceheu gwangdai kera mede aide rangcai, anui rang lubui, "Ainie! RAMPAUBE recabam kenzwabe anui peimedung ne ketei de, keru recadung nah ratak ziemne ma, dede anui kakga nah nnui kakga zierang teilu kerane." 29 Madaude gede anuide peu RAMPAUBE de renia diso, nah RAMPAUBE caisui ketei gade nreutet lwe keru recadung, meiciu recadung nah ratakdung ziemne recabam gede tei dilak RAMPAUBE anui Tinggwang recabam gwale.’"

30 Cu cingkupei Phinehas nah muiteumedung nah Israelme pautsa hepeuketeumedung, pecu Reuben, Gad nah Manasseh namedung kerang de siulu, ge penui cide penui suilu. 31 Cine cingkupei Eleazar napei Phinehas, Reuben, Gad nah Manasseh namedung dage rangdi, "Henai anui RAMPAUBE bam lie kecu ciluda, kedanemene nnui RAMPAUBE de cwa kecu ta teidi meda. Cu nang Israel namedung de RAMPAUBE ba gade keli luda." 32 Pecai cingkupei Eleazar napei Phinehas nah muiteumedung Gileadme deu ga Reuben nah Gad namedung dade Canaan deu ga, Israelme da cailigwanglu, nah penuide sam teu cailigwang beu. 33 Penui sam pau kebeude Israel namedung penui suilu, cine Israel namedung Tinggwang de hetwa peu, nah Reuben nah Gad namedung de ngngwa hereu tei kera rangsi tadi. 34 Cine Reuben nah Gad namedung recabam de, "Zierang" de qulu, kedanemene cide penui rangdi, "aide anui kakga RAMPAUBE au Tinggwang lie kecu zierang da."