1 Aipau hangdeu de Manasseh leuhme de pwapeu (kedanemene pa au Joseph neraibe), cide Gilead pei, Makir ziemne, Manasseh gu neraibe. Gilead nah Bashan de pecu peudi, kedanemene pa au reugwa keyime ge. 2 Pecai cika Manasseh leuhme de peudi, penui pautsa rehi gade, Abiezer leuhme de, nah Helek leuhme de, nah Asriel leuhme, nah Shechem leuhme de, nah Hepher namedung de, nah Shemida leuhme de. Aidungde Joseph napei Manasseh name mipeidung, penui pautsa rehi gade. 3 Zelophehad Hepher napei, Gilead napei, Makir napei, Manasseh napei pe na mipeina teima, dede mipuina rünne. Pe napuidung zi cai: Mahlah, nah Noah, Hoglah, Milkah, nah Tirzah. 4 Penui cingkupei Eleazar, nah Nun napei Joshua, nah muiteume dwaga gwang ranggai, "RAMPAUBE Moses de anui siname kakga hangdeu peu kera aja kaibeu." Cine, Rampaube aja kai kebeu nzwa eh, pa penuide penui siname kakga hangdeu peu lu. 5 Zi kerei Manasseh ngaulu Gilead nah Bashan hangdeu de si eh, Jordan kebam keda lebie, 6 kedanemene Manasseh napuidung pe leuhme kakga hangdeu gumlu. Gilead deu Manasseh leuh kedame de peudi.

7 Manasseh deurai de Asher gade Mikmethath kecang, Shechem namdi naimiak kepetle bie. Pecai herai cikade tingbangle En-Tappuah leuhme kebam ga kecang mie. 8 (Tappuah deu de Manasseh gu, dede Tappuah, Manasseh deurai ga kebam de, Ephraim leuhme gu.) 9 Pecai herai cikade reuceuna Kanah ga nghung. Reuceuna tingbangle kebam namdidung Manasseh deuceu kakga kebam de Ephraim gu. Manasseh herai de reuceuna tingtünle bie, nah Jaaidi gade penli di. 10 Tingbangle kebam de Ephraim gu, nah tingtünle Manasseh gu, nah jaaidi de penai deurai. Asher deurai tingtünle nah Issachar deurai naimiak kepetle. 11 Issachar nah Asher ga, Manasseh Beth Shan nah renamdung, nah Ibleam nah renamdung de bamsi, nah Dor nah En Dor ga lunghkebamme nah renamdung, nah Taanach nah Megiddo ga lunghkebamme nah renamdung (pekecumbe cai Napheth). 12 Dede Manasseh leuhme namdi cidungde gum luma, kedanemene Canaanme hangdeu aide ga lungh kera cetkedi ziemne. 13 Cinzwa eh Israelme ngkieng cuh dige, penui Canaanme de penui kemei tei eh peu penui ta teidi, dede penui pelane de gwa mpet dima.

14 Pecai Joseph leuhme Joshua da ranggai, "Anui mina kiee sütbam, nah RAMPAUBE cu kecang anuide samlam sütbeu bam eh, daitei nang anuide hangdeu qwa ge nah zi ge rünne gumlu kera peu no?" 15 Joshua penui dage rangdi, "Nnui mina kiee süt cai, Perizzme nah Rephaime deu hegung ga mie eh cika hangdeu teimci lulo, kideutu Ephraim de nnui ziemne ceuham dilu." 16 Dede Joseph leuhme rangdi, "Kideutu de anui ziemne di luma, nah hangdeu langkam ga Canaanme lungh kebam leune ga bagidung bam, Beth Shan ga nah renaamdung ga kebamdung, nah Jezreel langkam ga kelungme pelane." 17 Cidau Joshua Joseph kilungme de resiu, Ephraim de nah Manasseh de, ranggai, "Nnui mina kiee süt nah nnui ngkieng süt. Cika nnui qwa ge rünne lak. 18 Kideutu de de nnui gu zie. Cide hegung liede, nnui cide teimci nah cide nnui gu penli kecang gum luzie, kedanemene nnui Canaanme de gwa mpet dizie, penui bagidung bam, nah penui au ngkieng liede."