1 Pecai Nun napei Joshua ngkiem eh hangna gede Shittim gade reketme ge nzwa nah ainzwa ranggai, "Mie hangdeu pielo, keraide Jericho namdi de." Penai mielwe helipui ki ge ga gwanglu, pe zi cai Rahab, nah cika penai mtaklu. 2 Jericho gwangpei da ainzwa ranggai, "Pielo, mina tingmuiziu aika hangdeu pie kera Israel name gwangla." 3 Jericho gwangpei Rahab da sam langgai, "N ki ga gwang kebam hangna de teu mpetlu nda gwang kebambe de, kedanemene penai hangdeu pelane pie kera gwangla lu." 4 Dede mipuide mipei hangna de teu kebai di nah pa ranggai, "Yeo, mi hangna ada gwang da dede Ih penai dai gade gwangla bi cima.✝ 5 Nah muilüt eh namdi kirie ngkui kera ting dige penai tetdi. Penai daiga miedi bie kecu Ih au cima. Penai cai sui kelwa mie cu iciu cai nnui penaide gwakah lubui." 6 Dede pa penaide kipeu ga ngngwa nghang lwe penaide reigau gage kebaidi (pa reigaudung keu mpet kipeu gage kaidi). 7 Cine minadung Jordan lampui ga kecang penai de gwazui miedi. Nah penaide gwazui miedi herizi namdi kirie ngkuidi.

8 Reketme hangna de zeu mtak mene bam pa kipeu ga penai da nghang kecu dau. 9 Ge pa reketme da rangdi, "Ih cibam RAMPAUBE ne nnui de aipau deu de kepeu nah anui da nnui de kehing de anui reu cakmie, nah keheibe de aipau deu ga kelungme nnui dwade tuii dizie. 10 Kedanemene anui siuda dainzwa RAMPAUBE nnui dwa dui Jaaidi Kegie tei cangbeu bi kecu nnui Egypt gade kempet tingdau nah Jordan kahpet Amorme gwangpei kena de nnui dai teidi bi kecu, Sihon de nah Og de, penaide ngkapzing kedi. 11 Anui cidung de siulu herizi anui nlung tuiidi nah anui mige dade kekuu rabe be bam si tadi nnui ziemne, nnui RAMPAUBE Tinggwang ziemne, Pa au tinggim nreule ga nah kideu ngkang gade Tinggwang kecune. 12 Cu kehereide RAMPAUBE zi gade a dage sampet gailu, Ih nnai dade a zai keyi de nzwa, nnaide a pei ki kelakdung dade nnai zai yi kera, nah kelibeu bizie cu rengei ge keulia beulo acu✝ 13 nang peu a pei, nah a pui, nah a sinapeime, nah a sinapuime de peu ringlo nah penui pelane de, nah nang anui de ketsai gade ringlu kera." 14 Nah penai pe dage rangdi, "Anai teilung ketsai kecang ndage peu gaila! Nang magade mi ge dade anui tadung rangdi mai, iciu cai RAMPAUBE anui de hangdeu kepeu dau n dade anui zai yi luzie nah samsang luzie."

15 Cine pa penai de hebaki ga heria kailwe peu nghung kera sau beu, kedanemene pa namdi kirie ga peki teipwa lung bam kelane namdi kirie ga.✝ 16 Pa penai da rangdi, "Hangdeutudung ga mie mbaih dilu nnuide zuikelame de nnai redau lubui lu nah cika langcumne mbaih lu, zuikelame cailigwang kemakta ne nah cipaucai nnai lampui ga ge tetgai lubui." 17 Pecai penai pe dage rang eh, "Nang anai depeu aipau ngu sampet ga sampet kegai nzwa anui zai yi luzie. 18 Ainie! Anui hangdeu ga gwang la dida, nang heria aide keulu maisia anai de hebaki gade peu kenghung de ga nah n pei, n pui, n siname nah n pei kilungme pelane n ki ga nlüt dilu. 19 Nah keheibe de n kikam gwale lampui ga mpet cai, penui jai de penui peu reu ga zie nah anui mzeu zie. Dede magade keheibe de nnui kiga kebam mede penui ba kai cai cipaume jai au anui peuga da. 20 Dede nang magade anai tadung de rang dicai, anui mzeu dizie ngu sampet kegai nzwa nang anaide sampet kegaide." 21 Nah pa rangdi, "Nnai samde nzwa tei luzie." Cine pa penaide lang gidi nah penai tetdi nah pa pai kegie ge hebaki gage keu gaidi.

22 Cipaucai penai tetdi nah hangdeutudung ga gwanglwe langcumne cika bamdi, nah penuide zuikelame cailigwang kemaktane, nah penui lampui leune ga peeila de ngaulu tadi. 23 Nah reketme kena hangdeutudung gade nghung lwe cailigwanglu nah kahpet lwe Nun napei Joshua da gwang eh penai de daitei dibi pelane pedage pauswa gaibeu. 24 Penui Joshua da rangdi, "Kesanglie RAMPAUBE hangdeu pelane anui ba gage kaibeu nah cipau hangdeu ga lung kebam pelane anui ziemne tuii ga dida."