1 Ge Hazor gwangpei, Jabin Israel ngkiengkelu siu luge, pa Madon gwangpei Jobab, Shimron gwangpei, nah Akshaph gwangpei da sam langgai, 2 nah tingtünle kideutu ga kebam hegwangpeidung da, nah Kinnereth tingbangle Arabah, nah kehenadeudung nah naimiak kenlütle Dor hangdeu kecehudung ga 3 nah naimiak kepetle nah kenlütle Canaanme deu ga, nah Amorme nah Hittime, nah Perizzme deu ga, nah Jebusime kideutu ga, nah Mizpah deu Hermon ngkang Hivitme deu ga. 4 Penui nah penui reugwamedung si eh pelane penuide ngngwa mina duidi kung ga heciang kebam kenzwa kieege nah hekwen nah bagidung kekieege si eh penui mpetlu. 5 Aipau hegwangpeidung pelane penui kedetkelu ting gage redau lu, nah penui gwang delwe ramzeu ncüt eh Merom reuki gade Israelme de regi kera mteilu.

6 Pecai RAMPAUBE Joshua dade rangdi, "Penui dwa gade ngngi diso, kedanemene Ih ncünne aipau hi dau penuide Israel dwaga teitset ciak dizie. Nnui penui hekwendung pi tei telwa dizie, nah nnui penui bagidung de mi le ru dizie." 7 Cine Joshua nah reugwamedung pelane pecu ngngwa zette eh penuide Meromme duidung gade gwaketang, nah penui dade kaudi. 8 RAMPAUBE Israelme de penui ngauraume reu ngkienglu, nah Israelme ne penuide gwaketang nah zuimie Sidon Deudi nah Misrephoth Maim ga nah naimiak kepetle Mizpah langkam kecang. Penui ngauraume pelane de teitset ciaulu kemaktane penuide keregi. 9 Pecai Joshua penui hekwen pi tei telwa nah penui bagidung de mi le rudi. RAMPAUBE pecu rang kebeu nzwa pa penui dage teigai.

10 Cipau tingdau Joshua cailigwang Hazor deu tuilu, nah kiengtie le hegwangpei de teitsetdi, kedanemene Hazor deu cidung hegwangram pelane peube kedine. 11 Penui cika mina kebam leune de kiengtie le teitsetdi, penuide teu mpet tsam eh ngkapdi kera, ring eh kebam mige de peu bang ma, nah pa Hazor namdi de mi le rudi. 12 Cine Joshua aipau namdidung gu hegwangdung peciakne nah penui hegwangpeidung peciakne tuilu, nah kiengtie le penuide teitsetdi. RAMPAUBE kilabe Moses ne aja kai kebeu nzwa pa penuide teitsetdi. 13 Dede namdidung pelane ziemne au Israel namdidung hangdeu penui kecehu gage tei kelubedung Hazor rünne gwale, ket de ru dima, cide Joshua ne rudi. 14 Israel namedung aipau namdidung ga mania pelane nah kauruinedung keulwe penui gu teilu, penui migede bang eh peu ringbam ma dede penuide teitsetdi kemaktane kingtie le penui mina leune de teitset ciakdi. 15 RAMPAUBE pe kilabe Moses de ajah kai kebeu nzwa, Moses ne Joshua de aja kaibeu, nah Joshua cide mzailu. Pa RAMPAUBE ne Moses de rang kebeu magede teicang tadi kemak teima.

16 Joshua hangdeu aidung pelane gumlu; kideutu nah Negev pelane, nah Goshen deu pelane, nah hangdeu kehenadung, nah Arabah nah Israel kideutu, nah hangdeu kehenadung. 17 Halak Lamlwa gade nghang Seir kecang, Lebanon langkam ga Baal Gad gade Hermon deutu ngkangle kecang, pa penui hegwangpeidung pelane de tuilu delwe penuide teitsetdi. 18 Peting ketiee ge Joshua aipau gwangpeidung pelane de ngngwa regi. 19 Gibeon ga lungh kebam Hivitme gwale namdi ga Israel namedung de ngngwa kezuyi bam ma. Penui pelane de hereu ga penui ngngwa tetdi. 20 Kedanemene cide au RAMPAUBE ne penui lung teipwa penui Israelme de ngngwa hereu tei renia kerane tei gai, ciude pa penuide ngkap zingdi lu kerane nah penuide ngau nggia mene penuide teitset ciau dilu kerane. RAMPAUBE Moses dage aja kai kebeu nzwa.

21 Cipau tingdau Joshua gwang kideutu gade Anakim de ngkapdi, Hebron gade, Debir gade, Anab gade nah Judah kideutu pelane gade, nah Israel kideutu pelane gade. Joshua penuide ngkap zingdi penui namdidung de si eh. 22 Anakimme migede de Israelme deu ga bang nzeu ma, Gaza, Gath, nah Ashdod ga gwale. 23 Cine Joshua hangdeu pelane tui pwa Israelme de pwaleu kera nzi beudi, RAMPAUBE ne Moses de rang kebeu de nzwa rehi gade nah heleuh rehi gade penuide nzibeu. Ge Israelme hereu ketei gade mtakdi.