1 Nah heleuh pelane Jordan kahpet canglu, cipaucai RAMPAUBE Joshua da rangdi. 2 "Mina hang kereiekena de nkatei nziemne kedet lu minadung kak gade, heleuh ge gade hange gede. 3 Nah penuide aja kai eh ranggai, ‘Cingkume Jordan reuki sumga sap kebam gade nnui katei nnui ziemne tangtsukangdung kereiekena aika de, Jordan sum ga cingkume sap mtip kebam ga nah cidung de nnui da keugwang lu, nah cidung de pwa nnui heziu mtak kera bam ga kailu.’" 4 Pecai Joshua Israel namedung kakde pa mina hang kereiekena ge de kedet kelumedung de kugai heleuh ge gade hange gede. 5 Nah Joshua penui da rangdi, "Nnui Tinggwang RAMPAUBE samkakbung dwaga tetlu, Jordan reuki sumga nah nnui hangge ge de tangtsukang ket pe hekeutu gage pwa gailu, Israel namedung heleuh kebam kiege. 6 Tangtsukang aide ne nnui kakga marehi ge zie, aipaucai nnui namedung ne tangtsudung aide pekie daino de rang eh keteu cai? 7 Cidau nang penui da rangzie, ‘RAMPAUBE samkakbung pwakah kecudau Jordan duidung lwa mtakdi Jordan kahpet kecudau.’ Cine aipau tangtsudung de Israel namedung kelungta nsungla dizie."

8 Israel namedung Joshua ajah kekai de nzwa teilu, nah penui tangtsudung kereiekena Jordan reuki sum gade pa ncuhlu, RAMPAUBE Joshua da kerang de nzwa. Israel namedung heleuh kebam kieege penui punggwang penui ramzeuki tei eh mtak kera heni gage cidungde kailu. 9 Pecaide Joshua Jordan reuki sumga ge tangtsudung kereiekena de kaiswalu, cingkume samkakbung pung kelame pi kang gage. Nah cide henai kecang de cika bam. 10 Cingkume samkakbung pung kelame Jordan sumga saplu, RAMPAUBE Joshua da ajah kai kebeudung de pelane mina dage rang canglu kemak tane, Moses ne Joshua da ajah kekai pelane de nzwa, cine minadung kelwa eh penui hereuki kahpetlu. 11 Ge mina pelane kahpet kelu cai, Cingkume RAMPAUBE samkakbung pung kelame penui dwa kapet di. 12 Ge Reuben name, nah Gad name, nah Manasseh leuh pempie mina hereu tei kera mteilwe Israel name dwaga kahpetlu, Moses penuide rang kebeude nzwa. 13 RAMPAUBE dwaga reugwame mina cang riakdai ge kenzwa mteilwe Jericho langkie ga hereu tei kera kahpetlu. 14 Cipaunai RAMPAUBE Joshua de Israelme pelane miak dwa gade teu ncuh beu, penui pecu hetwa peudi, Moses de penui hetwa kepeu nzwa, pe teilung pelane.

15 Pecai RAMPAUBE Joshua da ranggai, 16 "Cingkume samkakbung zierang pung kelame de aja kai eh peu Jordan gade nghang lu." 17 Cine Joshua cingkume de ajah kaigai eh ranggai, "Jordan gade nghang lu." 18 Ge cingkume RAMPAUBE samkakbung pung kelame Jordan sum gade tet nghang lwe cingkume penui pideu hangdeu kecang gage kai kedicai Jordan kereuki duidung lwacaili pebam ga gwangdi pedwa lwakebam nzwa eh pekungdungde pelane puipet daidi.

19 Minadung kei raitube ziangrei benai Jordan gade nghang lu nah penui Gilgal ga ramzeuki teilu naimiak kepetle Jericho kung ga. 20 Tangtsukangdung kereiekena penui Jordan gade pung nghang kelade, Joshua ne Gilgal ga sum gailu. 21 Nah pa Israel napeidung da marang eh ranggai, "Aipaucai nnui napeidung penui peidung de keteu eh, ‘tangtsudung aidungde daino?’ 22 Ciciude nnui nnui napeidung de peu cilu eh rang zie, ‘Israelme Jordan hangdeu kecang aide ga kahpet lu.’ 23 Kedanemene RAMPAUBE nnui Tinggwang ne anui dwaga Jordan duidung de teicang beu, nnui tetka petlu kemaktane, RAMPAUBE nnui Tinggwang Jaaidi kegie anui dwaga pa tei cang kebeu nzwa nnui kapet kemaktane, 24 iciude kideu ga mina pelane RAMPAUBE baga kengkieng kebam de cilu kerane iciu eh kelungta Rampaube nnui Tinggwang mie hing luzie."