1 Peting ketieege caine, RAMPAUBE Israelme de penui ngauraume pelane penuide twagwa kebamme dade kemtak peu, nah Joshua hecing sütdi. 2 Cine Joshua Israelme pelane de qu hekwalu, hangkiame, muiteume, tutiakme, nah kedime, nah pa penui da rangdi, "Ih cu au hecing süt dida nah a mmi kekiee ge dida. 3 RAMPAUBE nnui Tinggwang nnui ziemne heleuh aidungde pelane dage tei kegai leune nnui ngauda, kedanemene nnui ziemne regi kebeube au RAMPAUBE nnui Tinggwang delu. 4 Ainie! Ih nnuide heleuh aidung de de nnui leuhme deu lu kerane pwapeu da, Jordan gade, nah Ih ngamkelu heleuh pelane, naimiak kenlütle Jaaidi Kedi kecang de. 5 RAMPAUBE nnui Tinggwang, pa penuide nnui dwade gwagi dizie nah penuide nnui dwade keugi dizie, nah nnui penui deu gum luzie, RAMPAUBE nnui Tinggwang nnuide rang kebeu nzwa. 6 Cine sap ntiplu, iciude nnui Moses zai laisiukwak ga rau kenzeudung tei mzai lu kerane, cide gade zetle ba mede hile ge nreugai di melu kerane, 7 ciude nnui heleuhdung nnui kakga bang kebamme de ngngwa kangbau melu kerane, mede penui rabedung zi rang, mede penui zi teu eh sampet tei, penui gwatei mede keumie penuide reca melu kerane. 8 Meliene, nnui RAMPAUBE nnui Tinggwang de ngngeilu, nnui henai kecang teikela nzwa. 9 Kedanemene RAMPAUBE nnui dwade heleuh kedi nah kengkiengdung de gwa mpet dida. Nah henai kecang migede nnuide renia eh sap luma.✝ 10 Nnui mipei hangge ne mina cang ge de gwagi dizie, kedanemene RAMPAUBE au nnui Tinggwang lu. Pa nnui ziemne regibeu kelabe da, pa nnui dage rang kebeu nzwa. 11 Ciziemne, RAMPAUBE nnui Tinggwang de hung kera nnui laikai tei lulo. 12 Dede magade nnui nreu caili nah bang leuh aide de ncüt cai, nnui kakga kebam heleuh, nah penuide ngngwa keleilüt, nah nnui penui kakga mie nah penui nnui kakga gwang cai, 13 iciucai RAMPAUBE nnui Tinggwang heleuh aidungde de nnui kak gade keu nzia dilak lie kecu ci mci lulo, dede penui nnui ziemne hebaih ge nah hetak ge dizie, nah nnui miak ga hetudung nzwa zie, RAMPAUBE nnui Tinggwang nnuide hangdeu keyi kepeu gade nnui gahdi kemaktane.

14 Cu ainie, henai Ih kideu pelane gade tetdi lauda, nah nnui mlung pelane le cibam RAMPAUBE nnui Tinggwang nnui ziemne rang kegai keyidung leune sam gede teicang mene tadi mah. Nziemne peciakne de teicang beu, sam gede teicang mene tadi ma. 15 Ciziemne RAMPAUBE nnui Tinggwang sam keyi leune nnui da kerang de teicang gwang kelu nzwa eh, cinzwa eh RAMPAUBE nnui reu gage ma kesia leu teigai zie nnuide ngkapdi kemaktane RAMPAUBE nnui Tinggwang nnuide kepeu hangdeu keyi de gade. 16 Nnui RAMPAUBE nnui Tinggwang samkakkelu de, pa ne ajah kai kebeu de tei mzailu mene, nah mie delwe hera keda gwatei nah keumie penuide reca cai, RAMPAUBE rata nnuida gwang zie, nah nnui zette gah dizie nnuide kepeu hangdeu keyide gade."