1 Aipau hangdeudung de Canaanme deu Israel name ne gumkeludung da, cingkupei Eleazar, Nun napei Joshua, nah Israelme leuhdung kelak muiteume penui kak gade mzilu.✝ 2 RAMPAUBE Moses ba gage aja kekai de nzwa, penui mapwa au dacak eh heleuh hekui nah heleuh pempie ziemne mzilu. 3 Moses ne Jordan gwalebie mabam heleuh kena nah heleuh pempie de pwapeu, dede pa Levime penui kakga mabam peu ma. 4 Kedanemene Joseph namedung heleuh kena bam, Manasseh nah Ephraim. Dede Levime de hangdeu gum kera peu ma, dede namdidung ga lungkera gwale, nah penui kauruinedung ziemne penui cehei deu de nah penui luhdung ziemne. 5 RAMPAUBE Moses dage aja kaibeu, Israel namedung cide teilu, cine penui hangdeu mzilu.

6 Cidau Judah namedung Gilgal ga Joshua da gwang, nah Kenizzitme pei Jephunneh napei Caleb, pe da rangdi, "Kadesh Barnea gade RAMPAUBE, Tinggwang minabe Moses dade a ha nah n ha daipai rangbi nang cibam. 7 Ih mmi riakdai ting dau RAMPAUBE kilabe Moses, Kadesh Barnea gade reket kera acu langgai. Ih sam a mlung ga kebam de nzwa peda pung cailigwang paubeu. 8 Dede a sinamedung acu nzang nghang kecume ne mina mlung tei ngngidi. Dede Ih au RAMPAUBE a Tinggwang samzai teicangsiak lu. 9 Cine Moses cipaunai sampet gai, ‘Kesang nang tet kegai deu de, nang nah n namedung cide kelungta gumlu zie, kedanemene nang RAMPAUBE a Tinggwang samzai tei cangsiak eh sui kelune.’ 10 Cu, ainie! RAMPAUBE rang kebeu de nzwa Ih mmi riakdaiemengei dida, Israelme hetaideu ga gwang kela dau, RAMPAUBE Moses dage pe sampet kebeu de nzwa. Cu, pie gailo! Ih au henai mmi riakheset-mengei dida. 11 Moses ne acu lang kegai benai de nzwa henai kecang de Ih au ngkieng bamreu. Cine cu a pum yi kebam de au hereu tei kera, nah nlüt nah mpet kera ziemne kengkieng bamreu. 12 Ciziemne acu aide kideutu de acu peulo, cipaunai RAMPAUBE rang kebeude nzwa. Kedanemene nang de cipaunai Anakim nam de bam kecu nah rie kelu namdidung kebam de siu kecune. RAMPAUBE acu ngngwala de lubui nah Ih penuide gwampet zie, RAMPAUBE rang kebeu de nzwa."

13 Cine Joshua pecu samlam beu nah Jephunneh napei Caleb de Hebron de gum kera peu. 14 Ciziemne Hebron Kenizzitme pei Jephunneh napei Caleb gu cipaunai gade mabam peu, kedanemene pa RAMPAUBE Israel Tinggwang samzai tei kelune. 15 (Cu Hebron namdi zi de ndaa Kiriath Arba lie qula. Pa Anakimme kakga mina kemlangme ge tei). Pecai hangdeu cide hereu ketei gade mtakdi.