1 Pecai RAMPAUBE Joshua da ranggai, 2 "Israelme de mpau lulo, rang eh, ‘Kensiu namdidung kedetlu n katei nziemne, Ih Moses dade ndage rang kebeu de. 3 Mige cimene mide teitset nah matei mau dicai cika ge pakgai lubui, nah penui hekum peei kelame dade cika nsiu luzie. 4 Pa namdidung ket gage pak gaidi zie nah namdi rieki kimui dwa ga saplu zie nah pa tei kedibe ha namdi ga hangkiamedung da ge rang zie. Pecai penui pecu namdi ga ngngwa nlütlu zie nah pecu penui kakga lungh kera ni ge peuzie. 5 Pe kum peei kelame magade pecu peei gwang cai, penui teiketsetbe de penui ba gage kaibeu lak, kedanemene pa pe kidabe de pedwa ngkau bam ma, dede teimau eh teitsetdi dilu. 6 Hemaabe dwa hetutiak kerane saplu kemaktane pa namdi ga bamzie, cipau tingdau cingkupei kedibe tsaidi kemaktane. Pecai mide teiketsetbe caili luzie nah pekatei pe namdi nah pekatei peki ga gwang luzie, pa pak kedi namdi ga.’"

7 Cine penui Kedesh de Galilee ga Naphtali kideutu deudi ga, nah Ephraim kideutu deudi ga Shechem, nah Judah kideutu deudi ga Kiriath Arba (cide au, Hebron) de teimcilu. 8 Jordan gwale Jericho naimiak kepetle, langkie hetaideu ga, penui Reuben leuhme dade Bezer kedet lu, nah Gad leuhme dade, Gilead ga Ramoth, nah Manasseh leuhme dade, Basan ga Golan. 9 Aipau namdidung Israel namedung pelane nah sangme penui kakga lungh kebamme ziemne kedetlu, iciu eh keheibe de ci mene mide teitset kedime cikage pakgai luzie nah hekum peei kelame ba gade tsai dilak hemaabe dwa saplu kemaktane.