1 RAMPAUBE kilabe Moses tsai kedicai, RAMPAUBE, Nun napei Joshua, Moses de kenghame reu kedibe da ranggai, 2 "Moses, a kilabe tsai dida. Cu ciziemne cuhlu Jordan Reuki aide kahpetlu, nang nah Israel mina aidung pelane, Ih penuide hangdeu peulai kebam deu dega, Israel namedung de. 3 Ih Moses da rang kebeude nzwa, nnui pi hi kegai leuga Ih nnuide peu dida. 4 Lebanon hetaideu gade, Euphrate reuki kedi kecang, Hittime deu pelane nah Mediterranean Jaaidi, naimiak kenlütle kecang nnui deurai zie. 5 N teilung pelane ga migede n dwa sap gailak, Ih Moses da kelade nzwa Ih nda lazie. Ih ncu gi dilak mede püt dilak.✝ 6 Ngkieng nah kuu lu, kedanemene Ih nnui paumedung da sampet kai kebeude nzwa n mabam gade mina aidungde de hangdeu gum luzie. 7 Nnui kuu nah ngkingsüt lu, a kilabe Moses ne hezai kai kebeudung de pelane sünne eh mzailu, hile nah zetle nreutet diso, cinzwa lucai nang tetkela leuga mteu luzie. 8 Aipau hezai laisiukwak de nnui mui gade tet dilak, tingmui tingba nang cide cetncok luzie, cinzwa lucai raukenzeu dungde nang sünne eh pelane mzai lubui, ciude n lampui yi luzie nah mteu luzie. 9 Ih n dage aja kaigai meni? Ngking nah kuu lu! Ngngi diso; n suisa diso, kedanemene RAMPAUBE n Tinggwang nang tetkela leuga ncu ngngwala lu."

10 Ge Joshua heleuhbe muiteumedung da aja kai eh, ranggai 11 "Ramzeuki sum ga mie cu delwe minadung da rang eh, ‘Nnui teumai kesiadung mtei lu, nnui lang cumne gage Jordan reuki aide kahpet luzie RAMPAUBE nnui Tinggwang ne nnui kepeu deu de mie gumlu kera.’"

12 Reubenme, Gadme nah Manasseh leuh pempie dage Joshua ranggai, 13 "RAMPAUBE kila Moses sam nnuida kai kebeu dungde nsung lalu de ranggai, ‘RAMPAUBE nnui Tinggwang nnuide kemtak nah hangdeu aide peubam dida.’ 14 Nnui naudung, nnui namedung, nnui kauruine Jordan gwalebie Moses ne nnuide kepeu deu ga bamzie. Dede nnui hereu keteime reunet, nnui reugwa kengkingme pelane nnui siname dwade kahpet, delwe penuide ngha zie 15 RAMPAUBE nnuide kemtak kepeu de nzwa n siname de kemtak peu kemaktane, iciu eh penui RAMPAUBE nnui Tinggwang ne penuide kepeu deu de gum luzie. Pecai nnui magum deu dega cailigwang eh RAMPAUBE kila Moses ne nnuide kepeu hangdeu naimiak kepetle Jordan Reuki kahpet kecu deu de gum luzie." 16 Ge penui Joshua sam keli eh ranggai, "Nang anuide aja kekai leune anui teizie nah nang kehei ga anuide langgai de anui mie zie. 17 Anui Moses sam mzai kelunzwa anui n sam mzai zie. Pa Moses da kelade nzwa eh RAMPAUBE n Tinggwang depeu n da la kelube teilu. 18 Keheibede nang samkai kebeudung de mlai dicai, mede n samdung mzai luta dicai nang pecu teilo kebeu leune, pecu ketsai ga kai dizie. Cine ngking nah kuu lu."