1 Pecai Moses Moab langkiedung gade Nebo Deutu ga, Jericho ncwa kebam, Pisgah hutu ga hangdi. Cika de RAMPAUBE pecu hangdeu pelane pwa liagai Gilead tingdeu gade Dan namdi ga kecang, 2 nah Naphtali deu pelane, nah Ephraim penai Manasseh deu, nah Judah deu pelane, Mediterranean jaaidi lütle kecang, 3 nah Negev, nah Jericho langkam langkie ga, Palm Namdi, Zoar ga kecang. 4 RAMPAUBE Moses dage rangdi, "Ih Abraham, Isaac, nah Jacob dage sampet kegai aipau deu de da, rang eh, ‘Ih nnui leuhme de peu zie lie.’ Ih ncu peu cide n miak gade ngau gaida, dede nang cika lütlak." 5 Cine Moses RAMPAUBE kilabe, Moab deu cika de tsaidi, RAMPAUBE sam ga sampet kebeu nzwa. 6 RAMPAUBE pecu Moab deu langkam ge gage kungdi Beth Peor nam kemcwa gage, dede henai kecang de migede pecu kung kecu bam de daiga bi cima. 7 Moses tsai kedidau pa mmi hai ge ngkai di; pe miak de sia mereu, mede pa au pedwale nzwa ngkiengla cangsiak. 8 Israelme Moses ziemne zie camrei ge Moab langkiedung gade hap, nah cidau Moses ziemne kehap tingba cangdi. 9 Nun napei Joshua de rabe maci ne puilu, kedanemene Moses pereu gage pe ba kai kegai ne. Israel minadung Joshua kwa kingneilu nah RAMPAUBE Moses dage kepeu ajadung de mneilu. 10 Cika Israel ga Moses kenzwa caihakeci migede cuh mereu; RAMPAUBE kezumok eh ci kelabe. 11 Cika caihakeci migede RAMPAUBE Moses de Egyptme deu ga Pharaoh nah pe kilame pelane dage, nah pe hangdeu pelane ga lang kebeu marengeidung nah miswakegah batadung pelane ga pa kenzwa madauge de tei ma. 12 Cika caihakeci migede pa kenzwa bam ma Israelme pelane miakngau gade ma kedi leune, ngau kehing tadung tei kegai.