1 Magade nnui RAMPAUBE nnui Tinggwang kwa kingnei teune lu eh henai Ih nnui dage tei lulo kebeu pe ajadung mzailu liecai, RAMPAUBE nnui Tinggwang nnuide kideu ga heleuh keda pelane reu tei cehu beuzie. 2 Samlam aidung pelane nnui da gwang zie nah nnuide gwaka luzie, magade nnui RAMPAUBE nnui Tinggwang kwa kingnei lucai. 3 Namdi ga nnui samlam kepungme tei zie, nah luh ga nnui samlam kepungme teizie. 4 Nnui pumteih tsi samlam kepungme teizie, nah nnui hangdeu tsi, nah nnui kaunedung tsi, hetum nah meuründung kiee luzie, nah nnui kauruine na liede.✝ 5 Nnui gu raptui nah nnui tangkwa samlam kepung tei zie. 6 Nnui tet nlüt kecudau samlam kepungme tei zie, nah nnui tet kempet kecudau nnui samlam kepungme tei zie.*

7 Nnui ngauraume nnuide renia cuh kecume de nnui dwa gade RAMPAUBE ne ngam dizie; penui lampui ge gade nnuide renia zie lie eh gwang zie dede nnui dwa gade lampui hena dung gage pak gai dizie. 8 RAMPAUBE nnui reuga nnui ciukidung ga samlam beu kera rang beuzie nah nnui bata tei kegai leune ga; pa nnuide ha lai eh kebam deu gade nnuide samlam beuzie. 9 RAMPAUBE nnuide pe ziemne kedet ntsam kelu pe minadung tei luzie, pa nnui dage sampet tei kebeu nzwa, RAMPAUBE nnui Tinggwang gu hezaidung mzai lucai nah pe lampuidung ga tet lacai. 10 Kideu ga heleuh pelane nnuide RAMPAUBE zi gade qu kelumedung ngau luzie, nah penui nnuide hing zie. 11 RAMPAUBE nnuide nalung keyi, nnui ketumhau nah meurün keyi, nnui meitsi keyi, pa nnui paumedung dage nnuide peu zie lie sampet kebeu deu de gade peu zie. 12 RAMPAUBE pe tinggimdung kehekwaki ngkei beuzie peting siak dau nnui deu ziemne tingrui langgai beu kera, nah nnui bata leune samlam beu kera; nnui heleuhdung kekiee dage releu beu luzie, dede nnui au hepuk lak. 13 RAMPAUBE nnuide mi caisuime mene muiteube tei beu zie; nnui au pesing ga mene pereu ga rünne bam zie, nnui magade RAMPAUBE nnui Tinggwang hezaidung Ih ne henai nnui dage tei lulo rang kebeu de kingnei lucai, ci nzwa eh cidungde mnei nah tei eh, 14 nah magade Ih henai nnui dage sam kai kebam gade nnui nreu tetdi mecai, zetle ge mede hile ge, cinzwa eh hera kedadung caisui eh penui gwa tei kerane.

15 Dede nnui magade RAMPAUBE nnui Tinggwang kwa kingnei lu tadi cai, pe gu hezaidung pelane nah pe samdung Ih henai nnuide tei lulo rang kebeu de teilu mecai, cinzwa cai reset aidung pelane nnui da gwang zie nah nnuide gwaka dizie. 16 Namdi ga nnuide reset zie, nah luh ga nnuide reset zie. 17 Nnui gu raptui nah tangkwa reset pung dizie. 18 Nnui name reset pungzie, nnui meitsi keyi, nnui ketumhau, nah meurünhau na reset pung zie. 19 Nnui tet nlüt kecudau de reset pungzie, nah nnui tet kempet kecudau de reset pungzie.

20 RAMPAUBE nnui reuga resetdung langgai zie, kehebwak, nah nnui ba kekai leune ga hesiu gaizie, nnuide tei ngkap di kemaktane, nah nnui ngkap zette di kemaktane kedanemene nnui kesia tadung cidungde ziemne nnui acu mlai kedine. 21 Nnui gumlu lai eh kebam deu gade pa nnuide teingkap di kemaktane RAMPAUBE peu rapia cide nnui da bamzie. 22 RAMPAUBE lie kela mateeidung le nnuide ketang zie, kemra le, mma kecu le, nah herakum kum* kecu nah tinglum süt kecu le, nah tingkai kelumdung nah hemwa mau pu kecu le. Aidungde nnui tsaidi kemaktane nnuide zui lazie. 23 Nnui peu reuga kebam tingkamdung au hetageu nzwa zie, nah nnui kangga kebam hangdeu au hegeu nzwa zie. 24 RAMPAUBE nnui deu ga tingrui de mamüt nah rebui tei dizie; tinggimdung gade cide nnui reu ga hung zie, nnuide tei ngkap di kemaktane.

25 RAMPAUBE peu nnui ngauraume dwa gade nnuide ngkieng lulak; nnui lampui ge gade penuide renia kera tetpet zie dede penui dwa gade lampui henadung gage pak gai zie. Nnui au kideu ga hegwangram pelane ziemne kehing ge dizie. 26 Nnui gu ketsai paau au tinggim ruinedung nah kideu kaunedung gu taktyei dizie; penuide keheu eh gwa gidi kera migede bam lak. 27 RAMPAUBE Egyptme gu reteei de le nnuide ketang zie nah nnui geu majamdung le, mateei le, nah kencak, nnui cidungde gade yilu gailak. 28 RAMPAUBE nnuide peusui kegah le, miakcit kecu le, nah peusui kehebwak le ketang zie. 29 Nnui tingkeba daude kemiet la dizie miakcitme ge kemui ga kemiet kela nzwa, nah nnui lampuidung ga nnui yi eh gwang lak; nnuide teikeherei nah süt teudi muizie, nah migede nnuide kelilu kera bam lak. 30 Mipuige de n nau rangpwa bam zie, dede kedabe pei ne pecu nim lwe teu dizie. Nnui ki tei luzie dede nnui cika lungh lak; nnui kubetsi luh tei zie dede nnui pe tsi rai tyei lak. 31 Nnui tumseu de nnui miakdwa gade gi zie, dede nnui cipau tei de tyei lak; nnui dwa gade nnui gada de teu kerei tet dizie nah cide nnuide peu dai lak. Nnui meurün nnui ngauraumedung de peu dizie, nah nnuide migede ngha beu kera bam lak. 32 Nnui napeidung nah nnui napuidung de sangme de peu dizie kilame nzwa; nnui miak penuide tingba pelane peei zie, dede penuide ngaulu neu kebam de ngaulu ta dizie. Nnui ba ga kengkieng gah dizie. 33 Nnui deu gade ta kenzeu mei nah nnui mri kegai leune, nnui ci kemak leuh ge ne cide tyei luzie; nnuide teikeherei nah hengam kecu de lamui dizie, 34 iciu de nnui da tei gwang kera de ngau eh nnui peusui gah dizie. 35 RAMPAUBE nnui nkwakpuidung nah nnui pidung gage reteeidung teei süt kecu le tei pui beuzie cidungde gade nnui yilu gai lak, nnui pi gade nnui peu ga kecang.✝

36 RAMPAUBE nnuide nah nnui ne peu nnui reu hegwang tei kelube de nnui cikemak leuh dage ngngwa mie dizie, nnui mede nnui paumedung ci kemak; nnui cikade tsing nah tangtsu rabedung keda de reca zie. 37 RAMPAUBE minadung pelane da nnuide ngngwa kegai ga nnui kengngi ge zie, rang kemsia ge, nah henui ketei ge dizie. 38 Nnui luh gage heleuh gi kieesüt gaizie, dede meitsi kecam nage hekwa luzie, kedanemene tangriemdung cidung tyei luzie. 39 Nnui kubetsi luhdung teizie nah cidung ta luzie, dede nnui zau kette sak lak, mede kubetsidung de hekwa gailak, kedanemene tangseudung ne cidungde tyeilu zielu. 40 Nnui deu leune ga olive bangdung bam zie, dede nnui katei nnuide kette maca neu gai lak, kedanemene nnui gu olive bangdung petsi nghai dizie. 41 Nnui napeidung nah napuidung bamzie, dede penui nnui gu tei bam lak, kedanemene penui hebaang tei dizie. 42 Nnui gu tsingbang leune nah nnui deu gu meitsi, tangriemdung ne cidungde ngkap dizie. 43 Nnui kakga sangme kebamme ne nnui reu cuh reu reu dizie; nnui be henahreu reu dizie. 44 Pa ncu releu beuzie, dede nang pecu releu beu lak; penui muiteu tei zie, nah nnui penui kangga lung zie. 45 Resetdung aidung leune nnui da gwang zie nah nnuide zui zie nah gwaka lu eh nnuide ngkapdi kemaktane. Ma aide gwang zie kedanemene nnui RAMPAUBE nnui Tinggwang kwa kingnei kemakne, iciu eh pe ajadung nah teimzai keradung pa nnuide aja kai kebeu de mzailu kera. 46 Reset aidungde nnui da marengeidung nah mimakecangdung nzwa bamzie, nah nnui ceheudung da bam mui dizie.

47 Kedanemene nnui lungyi kecudau RAMPAUBE nnui Tinggwang de nnui suiyi eh nah nnui mlung sui baa eh reca kemakne, 48 ciziemne RAMPAUBE ne nnuide renia kera ngauraumedung langgai kebeume gwa tei zie nnui; nnui nzeu eh penui gwa tei zie, hereu eh de, paula eh de, nah magah eh de. Pa nnuide ngkapdi kemaktane nnui ngwang gage hegeu ngwanggai kaibeu zie. 49 RAMPAUBE kemdei ge gade nnuide renia kerane heleuh gede ngngwa gwang beuzie, kideu nlidung gade, helie matui tyei kera lim mie kela nzwa, nnui penui kwa helet cikemak leuh ge; 50 hezai sia eh kecingme de herüt peu la kemak leuh ge nah hename de nggia la kemak leuh ge. 51 Penui nnui gu kauruine na de nah nnui deu ga petsi bui kebeu de tyei zie nnuide ngkapdi kemaktane. Penui nnui ziemne meitsi bang beulak, zau keheci, mede maca, nnui gu kauruine mede nnui meuründung, penui nnuide peu tsaidi kemaktane. 52 Penui nnui namdi heriekidung leune ga nnuide tui kerane twagwa pwa dizie, nnui gu kecehu nah rie kengwa kiriedung nnui deu gade kau ciakdi kemaktane, nnui kenlum kai kezeu kiriedung de. RAMPAUBE nnui Tinggwang ne nnuide pwa kepeu deudung leune gade penui ne nnui gu namdi heriekidung leune gade nnuide tui kera twagwa luzie. 53 Nnui au nnuikatei nnui name de tyei luzie, nnui napeidung nah nnui napuidung teih, RAMPAUBE nnui Tinggwang ne nnuide pwa kepeube, gwa kecudau nah nnui keherei kecudau nnui ngauraumedung ne nnui dage kaigai eh. 54 Mipei nnui kakga pezai yi nah nciep süt kelame, pa pe sinabe nah hung kela pe nau de de hengim dizie, nah pe namedung kebam kecang de de. 55 Cine pa tyei la kebam pekatei pe namedung teih mige de de peu lak, kedanemene pe da magede bang nzeu lak pekatei peziemne nnui ngauraume nnuide tuilu nah keherei nnui dage kai kecudau nnui namdi heriekidung leune ga. 56 Mipui nnui kakga nnwa nah kenciepme, kennwa nah kenciep dene magade tet mie pe pi kiet gai la kemak, pa hung kela pekatei pe nahpei de hengim dizie, pe napei de, nah pe napuina de, 57 nah pekatei pena ngiena pa ne mna kelu de de, nah pa mna kera henamedung dede. Pa zing de kecu bam gade penui de tyei zie kedanemene magede tyei kera ga kedine, nnui ngauraume nnuide gwa gwang nah keherei cide nnui namdi heriekidung gage kaigai kecudau.

58 Nnui magade aipau hezai samdung laisiukwak aika rau pwa kelade mzailu mecai, ci nzwa eh aipau kendu nah kehingbe zi, RAMPAUBE nnui Tinggwang de rütlu mecai, 59 iciu cai RAMPAUBE nnui mateeidung ngau kehing tei dizie, nah nnui leuhmedung dage de; penui da mateei sia süt kecudung, peting ketie ge bamzie, nah nchok süt kecu mateeidung, peting ketie ge bam dizie. 60 Pa nnui hing kela Egyptme gu mateeidung leune nnui dage keu gwang gai dai beuzie; cidung nnui da bam dizie. 61 Aipau hezai laisiukwak ga rau nzeu kemak rapia nah mateei keheibe liede, RAMPAUBE nnuide ngkapdi kemaktane teu gwang gai beuzie. 62 Nnui ketsam nage banglu zie, nnui tinggim ga hegidung kieege nzwa bam liede, kedanemene nnui RAMPAUBE nnui Tinggwang kwa kingnei kemakne. 63 RAMPAUBE nnui dage makeyi tei gai kecu pesui la kecu nzwa, nah nnuide tei ngkiee kebeu, cine pa nnuide kekap nah kengkap teu gwang kebeu de pesuiyi zie. Nnui gum lu lai eh kebam deu gade nnuide pai mpet dizie. 64 RAMPAUBE nnuide minadung pelane kakgage tei zang dizie kideu tuh ge lam gade kideu tuh keda gage; cika nnui cikemak keda rabedung de reca zie, nnui mede nnui paumedung de, tsing nah tangtsu rabedung de. 65 Aipau leuhdung kakga nnui lungciep ngaulu ta dizie, nah cika nnui pideu de ntak kera gah dizie; meliene, RAMPAUBE nnuide cika helung kembeu, miakdung mangau ta kedi, nah keringria kehap peuzie. 66 Nnui dwa ga nnui teilung lunghau kecu bam zie; nnui tingmui tingba leune ga kengngi bam zie nah nnui teilung ga daipai gwang dau zie bi cilak. 67 Nnui tingcang dau rang zie, ‘Ih au peu tinghegi neu lie!’ nah nnui tinghegi dau rang zie, ‘Ih au peu tingcang neu lie!’ kedanemene nnui mlungdung ga kengngi dene nah nnui miakdung gade ngau kerabedung de ziemne. 68 RAMPAUBE nnuide limdung gade Egypt gage ngngwa gwang gai dai beuzie, Ih nnuide rang kebeu lampui gade, ‘Nnui Egypt ngausi dai lak ta.’ Cika nnuikatei nnuide nnui ngauraumedung dage kila peidung nah kila puidung tei kera zwa zie, dede migede nnuide lui beulak."