1 Ciziemne nnui RAMPAUBE nnui Tinggwang de hung zie nah pe zaidung, teilo kebeu be, nah pe ajadung pa kerangdung de kai nzeu muilu. 2 Ih nnui namedung de resiu bam kemak cilu, penui RAMPAUBE nnui Tinggwang de cima mede pe saja gede ngau kemakme, pe kedi, pe ba kengkieng, mede pe ba hetwakepet de, 3 Egyptme kakgade, Egypt gwangpei Pharaoh da, nah pe deu leune gage, pa marengei nah hetadung teigai. 4 Penui pa Egypt reugwame dage keteide de ngau ma, penui kwendung dage, mede penui bagidung dage, dai nzwa eh pa dui Kegie Jaaidi de penuide tei puinlim gai bi penui nnui cai zui kela dau, nah dai nzwa eh RAMPAUBE henai kecang penuide tei ngkapdi bi, 5 mede pa nnui ziemne hetaideu gade dai tei beu bi nnui heni aika gwang kemakne.✝ 6 Penui RAMPAUBE ne Dathan nah Abiram dage tei kegai de ngau ma, Eliab napei Reuben napei, dai nzwa eh kideu be ngkei gaibeu nah penai kilungmedung, penai paiki, nah penai caisui kela keringria pelane, Israelme pelane kakgade penaide nnwalu.* 7 Dede nnui miak le RAMPAUBE pa tei kegai heta kedi leune ngau da. 8 Cine Ih henai nnuide teilo kebeu be aja pelane mzailu, ciude nnui ngkieng lu kerane, nah lütlu delwe hangdeu de gumlu nnui mie eh gum lai eh kebam ga, 9 nah ciu eh RAMPAUBE ne penuide nnui peime de nah penui leuhme de peu zielie eh sampet kebeu deu de ga, tungdui nah heliadui lwa kebam deu de nnui nnui teilung tielu kerane. 10 Kedanemene nnui gumlu lai eh kebam deu de, au Egyptme deu nzwa ma, nnui kegwang gade, nnui nnui heleuh gi kegai nah nnui pi le dui ketau kegai de ga, cehei bangdung gurie nzwa; 11 dede nnui mie eh gumlu kera, hangdeu de, au hangdeutu nah langkamdung, nah tinggimdung tingrui dui sak kela deu ge, 12 RAMPAUBE nnui Tinggwang hung kela deu de; RAMPAUBE nnui Tinggwang miak au cide ga bam muila, mmi raitu gade mmi kamtu kecang de.

13 Cinzwa eh, Ih henai sam kai kebeu ajadung de nnui kingnei sünne lucai, RAMPAUBE nnui Tinggwang de hung nah nnui mlung pelane teu nah nnui keringria pelane le pe gwa teilu cai,* 14 Ih nnui deu gage tingrui pe hi leune dau peu zie, tingrui keraibe nah tingrui kekambe, ciude nnui nnui meitsi ga, nnui zau keheci, nah nnui maca hekwalu kerane.✝ 15 Ih nnui kaune ziemne nnui luh ga cehei peu zie, nah nnui tyei nah nggei luzie. 16 Nnuikatei nnuide teimriak bamlu ciude nnui mlungbe de cwa di melu kerane, nah nnui nreu tet nah hera kedadung de reca nah penui dage keumie di melu kerane; 17 ciciu de RAMPAUBE rata nnui dage heu gai di melu kerane; nah ciu eh pa tinggimdung nkui di eh tingrui gah di melu kerane, nah hangdeube petsi bui tadi melu kerane, nah ciciu eh RAMPAUBE nnuide hangdeu keyi peu kebam cikade nnui tsai zette dizie.

18 Ciziemne a sam aidungde nnui mlung nah keringria gage hekwalu, cidungde nnui ba gage marehi ge nzwa kanglu, nah cidungde peu nnui miak kena kakga kehezuria de nzwalu. 19 Nnui nnui name de cidungde ledeu beuzie nah nnui nnui ki ga kebam dau, nnui lampui ga tet kela dau, nnui zeu kemie dau, nah nnui cuh kelu dau cidung ha ledeu beulo. 20 Nnui cidungde nnui ki kimui tsiadung gage rau luzie nah nnui namdibe riekidung ga, 21 ciu eh nnui tingbadung nah nnui name tingbadung tei ngkie beuzie RAMPAUBE nnui paumedung dage penuide peu zielie sampet kebeube deu de ga kideu reu ga tinggimdung kebam tane. 22 Kedanemene nnui aja aidung pelane Ih nnuide tei lulo kebeu de mzai sünne lucai, ciciu eh cidung tei lucai, RAMPAUBE nnui Tinggwang de hung lucai, pe lampui leune ga tet lucai, nah pecu nggei lucai, 23 ciude RAMPAUBE heleuh aidung pelane nnui dwa de gwa mpet dizie, nah nnui swa heleuh di nah ngkiengki kecume deu de nnui gum luzie. 24 Heni pelane nnui pideu dau kegwang deu leune nnui gu dizie; hetaideu gade Lebanon kecang, hereuki de gade, Euphrate Reuki de, naimiak kenlütle jaaidi kecang de nnui rai luzie. 25 Migede nnui dwa sap gai lak. RAMPAUBE nnui Tinggwang peu minadung de nnuide hing dizie nah nnui tet kegwang hangdeu leune ga nnuide keheu dizie, pa nnuide sampet kebeu nzwa.

26 Pielu, Ih henai nnui dwa gage samlam nah reset ge peu gaila: 27 samlam ge, magade Ih henai nnui dage rang kebeu RAMPAUBE nnui Tinggwang ajadung de nnui mzailu cai, 28 nah reset ge, magade nnui RAMPAUBE nnui Tinggwang ajadung mzailu mecai, dede Ih henai nnui dage rang kebeu de gade tet nreu di cai, nnui ci kemak hera kedadung cai nreu gai di cai. 29 Cinzwa eh, RAMPAUBE nnui Tinggwang nnui mie gum lai kebam deu ga nnuide ngngwa gwang keludau, nnui Gerizim Deutu gade samlam sah zie, nah Ebal Deutu gade reset sah zie.✝ 30 Lamlwa ai kena de Jordan reuki gwale, naimiak kenlütle ga kenlütle lampui, Canaanme deu Arabah ga kelunghme, Gilgal namceu reu lebie, Moreh ga mhubangdung taiga meni? 31 Kedanemene nnui Jordan tet kahlwe RAMPAUBE nnui Tinggwang nnuide peu kebam deu de ga mie gumlu kerane, nah cide nnui gum luzie nah cika lungh zie. 32 Henai Ih nnui dwa hezai kai kebeu pelane nah teimzai lulo kepeu de mzai zie.