1 Magade mi hangna kakga ngngwa sia bam eh, penai hetuketiak bam ga gwang cai, nah tutiakme penai hetutiak cai, ciude penui kemzuibe de mzui lie zie nah kesiabe de mmau zie. 2 Magade kemaube pei de de dap ra tau di cai, tutiakbe pecu peu nkum luzie nah peu pe dwa gade pecu dap zie, pe mau rehi gade dap kera kieege dap zie. 3 Tutiakbe pecu pia riakdai kenzwa ge dap lubui, dede ci swa kiee si dilak; kedanemene tutiakbe cipau nreu kiee si dicai nah pecu dap kiee reu dicai, iciucai nnui zangme Israelme de hengam tei dizie nnui miak dwade.

4 Nnui hetumseu gede ngngwa mei neu kebam dau pemui kang lak.*

5 Magade sina hangna ngngwa lung ncüt bam ge hang ge pena lungh mene tsai dicai, iciucai tsai kedi be pei nau de peu pe kibaume kemak keda de luu lak. Meliene, pe nahpei sinabe pei pecu pe nau kera pe nsam da, nah pe sinabe pei tei kera nsam de pe dage tei kerabe da. 6 Cinzwa tei kelude peu penai neraibe peu tsai kedibe pei na teilu kerane, iciu eh Israel ga pe zi tei nggah melu kerane. 7 Dede magade mi ge pekatei ziemne pe sinabe pei nau de luu neu tadi cai, ciucai pe sinabe pei nau de hangkiame da herieki ga mie lwe rang zie, ‘A nahpei sinabe pe sinabe ziemne Israelme kakga pe leuh peu mei dida; pa adage pe sinabe tah tei kera de tei lak.’ 8 Pecai pe namdi ga hangkiamedung pecu qu lwe pe dage marang zie. Dede magade pa lak lie eh, ‘Ih pecu luupwa a nau neu ma,’ de eh rang di cai. 9 Pecai pe sinabe pei nau hangkiamedung dwa ga peda hanglwe, pe sinabe pei gu picum pe pi gade lwaklu, nah pe zu gage mcai msui lwa zie. Pa pe dage samkeli eh rang maisia, ‘Pe sinabe leuh peu rau kedibe de ainzwa eh teila da.’ 10 Israel ga pe zi de, ‘Pe picum lwak kedibe kime lie qu dizie.’

11 Magade mipei hangna nggi bam eh pecu tui kelame ba gade hangge nau pe nahpei de ngha kera pet, nah magade pa peba hwa mpet lwe keda pei bom sang herak cai, 12 ciucai nnui pe ba dang dilu; nnui miak gade pecu ngau nggia so.

13 Nnui nnui loko ma perüt ketsam tsam bam so, kedi mede keceu. 14 Nnui ma mdet kecu nnui kilung ga ketsamtsam bam so, kedi ge nah keceu ge. 15 Perüt kesangbe nnui da bamlu; pe mdet kesangbe nnui da bamlu, iciude nnui RAMPAUBE nnui Tinggwang nnuide peu lai eh kebam deu ga teilung ketie ge lungh luzie.

16 Caudung ge cinzwa tei labi, samsang mene tei kela leune, RAMPAUBE nnui Tinggwang penuide ngau ngkaula.

17 Nnui Egypt gade mpet keladau Amalekme nnui dage lampui ga daipai tei bi nsung lulo, 18 nnui dainzwa penuide lampuiki gade redau bi nah nnui cai le bie kela mede ketang, pe cai le bie kelame kemnei medung de, nnui nzeu hereu eh leu keladau; penui Tinggwang de herüt peu luma. 19 Ciziemne, RAMPAUBE nnui Tinggwang nnuide nnui ngauraume pelane twagwa pung kebam gade kemtak kepeu dau, RAMPAUBE nnui Tinggwang nnuide gumlu kera pwapeu kebam deu gade, nnui Amalekme pelane de teitset dilu, iciude migede penuide nsungbam kelak ne kideu leune gade.