1 Kingnei gailo, O tinggim, nah peu acu marang lo.

Peu kideube de a mui gade pet kegai sam kingnei lulo.

2 Peu a keledeusam tingrui nzwa cakmie lo,

peu a samrang hezin nzwa lwamie lu,

cehei keceunadung reuga tingrui kenciepbe nzwa,

nah mabangdung reuga ruikegai nzwa.

3 Kedanemene Ih RAMPAUBE zi sah zie,

nah anui Tinggwang kedi rang zie.

4 Tsura be, pe ta yi cangsiak;

kedanemene pe lampui pelane au mzui.

Pa au samsang Tinggwang be, heciem helim teima.

Pa au nzuicang nah kemzuibe.✝

5 Penui pecu renia heciem kesia teu tei.

Penui au pe name ma. Pe ngkau keteibe.

Penui au hezai mzai kemak nah kengkoi ceheu ge.✝

6 Nnui RAMPAUBE de ainzwa ziehi peu eh ni,

nnui kemie nah peusui kegahmedung?

Pa nnui pei Tinggwang meni, nnuide dam kegaibe?

Pa nnuide teibeu nah peu nnuide mige teilu.

7 Nsung gai pielo ndaa hadung tingbaziedung,

cet gai pie pemmidung gwang kedi lebie kekiee mmi.

Nnui pei de keteugai nah pa nnuide keulia zie,

nnui swakecingme de nah penui nnuide ranglia zie.

8 Hutube Tinggwang ne heleuhdung de penui mapwa peukegai dau,

pa kideumena pelane de nzi kegai dau,

nah pa minadung heraidung kaibeu,

ciulwe pa penui rabedung daikie ziebi riemgai beu.✝

9 Kedanemene RAMPAUBE qwa au pe minadung;

Jacob au pane gum kelube da.

10 Pa pecu hangdeu ketsai gade ngaulu,

nah gikedi nah mrakebam hetaideu ga;

pa pecu gumlu nah pe ma pielu,

pane rekwetlu pecu pa hungtube de nzwa.

11 Helie ge peciep reket kebam

nah pena reu lim twagwa kebam nzwa,

RAMPAUBE pe hesiu gumpet nah penuide keulu,

nah penuide pe hesiu gage pung.

12 RAMPAUBE pekatei ne pecu teuswa;

sangme rabe pecu ngngwa ma.

13 Pa pecu peu hangdeu reu heni kehu ga tet,

nah pa pecu luh matsidung peu tyei;

pa heliadui tangtsukang gade pwa kelu le peu pecu tyei hemisüt lu,

nah maca tsura deu gade.

14 Pa maca tumpui dade tyeilu nah meuründung dade tungdui sak,

meurünna ca de teu,

Bashan meurünseudung nah hemeudung,

wheat yitube dung,

nah nang zau yitube kubetsi dui le tei kelube gade sak.

15 Dede Jeshurun* peluiyi nah pezai siadi,

nang n lui yidi, nang nlui di hamdi, nah nang n liebe tyei luda,

pa Tinggwang pecu damkegaibe de pütdi,

nah pa pecu kelikebeu Tsura de gidi.

16 Penui rabedung keda dene penui RAMPAUBE de tei periakdi;

penui kemau dene penui perata teidi.

17 Penui herakesiabe dage ratak tei, Tinggwang kemak be,

penui cikemak rabedung,

rabedung kehecidung,

nnui paume hing kemak rabedung.

18 Nnui Tsura de gidi, nnui pei tei kedi be de,

nah nnuide kering kepeu Tinggwang de nnui nsung tadi.✝

19 RAMPAUBE aide ngaulu nah pa penuide pütdi.

Kedanemene pe napeime nah pe napuime perata ketei ne.

20 Pa rangdi, "Ih penui dwa de mbai dizie,"

"nah Ih pie zie penui dainzwa di zie bi;

kedanemene penui au samzai teikemak ceheu ge lu,

samsang kemak henana be.✝

21 Penui rabe kemakbe gene acu peu ariak kecu tei

nah penui gu ma kemtabedung ne a rata tei.

Ih mina kemak gede teu penuide peu periak kecu tei zie;

Ih kemie heleuh gede teu penui rata tei zie.✝

22 Kedanemene a rata ne mi ge heu cuh dizie

nah Sheol nkangtu le de heudi;

kideu de nah pe meidung ngkapdi zeu;

cide lamlwatu pi dung de heu hangdi.

23 Ih penui dage kengkap kepui kai zie;

Ih penui da a lakpitsi pelane kap gaizie;

24 Penui nzeu eh keherei zie nah tinglum ne ngkap zie

nah liagai kelak kengkap;

Ih penui dage renaamkaune langgai zie,

hering kebamdung rebui ga liakela de si eh.

25 Hegwale kiengtie de ketsai teugang beuzie,

nah zeubungdung ga ngaukehing de zie.

Cide rehangme nah relei kemcime de de ngkap dizie,

ngiena de, nah petam puu kedimede de.

26 Ih rangda Ih penuide kendei gage zanggai di kera,

Ih peu mina kakgade penuide nsung tadi kera tei.

27 Ngauraume keheu kegai Ih hingdi meni,

nah penui ngauraumedung macet maudi lubui,

nah penui ranglu zie, ‘Anui ngkieng luda,’

Ih ne teilubui aide pelane de.

28 Kedanemene Israel au kemang leuh ge,

nah penui da kecikecet gah.

29 O, penui macet ci lie cai, penui aide ci lubui ge,

penuida dai gwang lai bam bi kecu penui ci lubuige!✝

30 Dainzwa hangge ne cang de gwa lulai,

nah hangna ne cang kerei de pakti kera,

penui Tsura penuide zwadi eh lie mai,

nah RAMPAUBE penuide pütdi mai?

31 Kedanemene anui ngauraume tsura au anui Tsura nzwa ma,

anui ngauraume de ci kebam nzwa.

32 Kedanemene penui kubebang au Sodom kubebang gade gwang,

nah Gomorrah luhdung gade;

penui kubetsidung au heiring kubetsidung;

penui petsibui kekaa ge.

33 Penui zau au heneidung gu heiring

nah henam mcai kesia ge.

34 Aide riem kegai de Ih ngkim beu meni,

a mabamdung kakga ge kebai eh?

35 Hekum peei kera au agu, nah ziehi peuzie,

cidau penui kaudi kecudau;

kedanemene penuide ngkapdi kera ting nna dida,

nah penuida gwang kera dungde kelwa eh gwang dizie."*

36 Kedanemene RAMPAUBE pe minadung de kemzui peu zie,

nah pa pe kilame de nggia beuzie.

Pa penui kengkieng gah kedi ngau luzie,

nah migede bang kemak, hebaangme mede hebaang teikemakme liede.

37 Pecai pa rang zie, "Penui rabedung daiga bamno,

penui nsiu kela tsura de?,

38 Penui ratakdung ca tyei kelu

nah penui zau recadung zau de sakkelu rabedung de?

Peu penuide cuh eh nnuide nghalo;

peu penuide nnuide gumlu.

39 Pielu cu Ih, Ih rünne, Tinggwang,

nah rabe kedadung kette gah Ih gwale;

Ih teitsetdi la, nah Ih kering peula,

Ih rejamdi la, nah Ih teingkei beula,

nah migede a kengkieng gade nnuide kelilu kera gah.

40 Kedanemene Ih tinggim gage a ba hwacuh gai

nah rang, ‘Ih ringla mui kela nzwa, Ih bata teizie.

41 Ih a kiengtie kemzaide mui herei kecudau,

nah a ba kemzui peu kera bang dwa kecudau,

Ih a ngauraume dade hekum peizie,

nah acu kengkaume pau ruibeu zie.

42 Ih a lakpitsidung hejai le peu lwa zie,

nah a kiengtie pumteih de ngkap zie

mide teitset kedime nah hebaangme jai,

nah ngauraume muiteumedung peu gade.’"

43 Nnui suiyi lulo, heleuhdung, Tinggwang minadung de ngngwalwe,

kedanemene pa pe kilamedung tsai kedime kum peibeu zie;

pa pe ngauraume dade hekum pei zie,

nah pa kemau gibeu zie pe deu ziemne, pe minadung ziemne.

44 Moses pa, nah Nun napei Joshua gwang delwe mina dage lei aide samdung pelane siulu kerane rangbeu. 45 Pecai Moses Israelme pelane dage sam aidung pelane rang cangbeu. 46 Pa penui dage rangdi, "Ih henai nnui dage samdung kai kebeu pelane de nnui kecet gage kailu, iciude nnui nnui namedung dage tei mzai kera aja kai beulu kerane, hezai aide samdung pelane. 47 Kedanemene nnui ziemne aide kemta sam ma, kedanemene aide nnui keringria, nah ma aide gade nnui Jordan reuki kahpet gumlu lai eh kebam deu de ga nnui lungh tie luzie."

48 RAMPAUBE cipau nai Moses de resiu nah rangdi, 49 "Abarim lamlwadung pelwa aide ga hang cuh, Nebo Deutu, Moab deu ga kebam, Jericho de mcwa eh kebam ga. Nang Canaan deu de pie gaizie, Ih Israelme de gum kera peulai kebam de. 50 Nang hang kela lamlwatu de gage tsai gaizie, nah ncu n minadung dage ngngwa gai dizie, nswa kecingbe Aaron Hor Deutu gade tsai kedi nzwa nah pe minadung dage ngngwa gai kedi nzwa. 51 Aide tei zie kedanemene nang Israelme Kadesh namceu ga kebam Meribah dui, Zin hetaideu ga kelamedung kakgade a dade masanglu melu; kedanemene nang Israelme kakgade acu hetwa nah herüt peulu tadi.* 52 Kedanemene nang n dwaga kebam hangdeu pie gaizie, dede nang cika lüt lak, Ih Israelme de peulai eh kebam deu de ga."