1 Ih nnui dwa gage samlamdung nah resetdung kai kegai de, ma aidung pelane nnui da gwang kegai dau, nah RAMPAUBE nnui Tinggwang nnuide teizanggai kedi heleuh keda leune kakga lunghla kecudau nnui cidungde nsung kelu dau, 2 nah nnui nah nnui name, nnui RAMPAUBE nnui Tinggwang da cailigwang keludau, nah nnui mlung pelane teu nah nnui keringria pelane teu, Ih henai nnuide rang kebeudung de kingnei eh mzai lucai, 3 iciucai RAMPAUBE nnui Tinggwang nnuide peu lungh yi dai luzie nah nnuide ngau nggia beuzie; pa cailigwang nah RAMPAUBE nnui Tinggwang nnuide teizanggai kedi mina pelane dade nnuide hekwa dailu zie. 4 Magade nnui gwa kedi minadung ge kideu deitu le lacai*, cikade RAMPAUBE nnui Tinggwang nnuide teu hekwa luzie, nah cikade nnuide ngngwa cailigwang beuzie.✝ 5 RAMPAUBE nnui Tinggwang nnui paume gumpwa kebam deu ga nnuide ngngwa cailigwang beuzie, nah nnui cide gumdai luzie; nah pa nnuide nnui paume da tei kegai swa nnuide peu lungh yi nah kieeki luzie. 6 RAMPAUBE nnui Tinggwang nnui mlung nah nnui leuhme mlung geurum dizie, cine nnui RAMPAUBE nnui Tinggwang de nnui mlung pelane teu nah nnui keringria pelane teu eh hunglu kera, iciu de nnui lunghlu kerane.✝ 7 RAMPAUBE nnui Tinggwang reset aidung pelane pwa nnui ngauraume de nah nnuide ngkau kelame de, nnuide teikeherei kelame de peu dizie. 8 Nnui cailigwang eh RAMPAUBE kwa kingnei luzie, nah Ih henai nnuide rang kebeu pe ajadung pelane nnui mnei luzie. 9 RAMPAUBE nnui Tinggwang nnui bata pelane de peu lungh yi luzie, nnui nalung keyi, nah nnui kauruine keyi kekieege ngau luzie, nah nnui luh mei kekiee ge buibeu zie; kedanemene RAMPAUBE pesuiyi dai luzie nnui ziemne peu lungh yi lu kera, pa nnui paume da suiyi kela nzwa. 10 Magade nnui RAMPAUBE nnui Tinggwang da nnui mlung pelane nah nnui keringria pelane teu eh nreu gwangdi cai, ciu eh aipau hezai laisiukwak gage raupwa kela pe ajadung nah zaidung de mneilu eh nnui RAMPAUBE nnui Tinggwang sam kingneilu cai pa aide tei beuzie.

11 Kedanemene Ih henai nnuide kepeu aja aide au teipa ham dima, mede nnui ziemne mzai canggai kelak bema.✝ 12 Cide Tinggim ga bam ma, ciu eh nnui rang maisia, ‘Caune anui ziemne tinggim ga hang eh cide anui da pwa ngkie lai no nah anuide peu cide siulu lai, iciu eh anui cide mzailu kerane?’ 13 Mede cide jaaidi tu keda lam bie bam ma, cine nnui rang maisia, ‘Caune anui ziemne jaaidi kahpet eh cide anui da teu gwang beu laino nah anuide peu cide siulu lai, iciu eh anui cide mzailu kerane?’ 14 Dede sam cide nnui da nna süt bam, nnui mui ga nah nnui mlung ga, iciu eh nnui cide mzai lu kerane.✝ 15 Pielo, henai Ih nnui dwaga keyi nah kesia, kering nah ketsai kehedet peula. 16 Magade nnui RAMPAUBE nnui Tinggwang hezaidung de mzailu cai, Ih henai nnuide ajadung kai kebam RAMPAUBE nnui Tinggwang de hung kera, pe puisau ga tetlu kera, nah pe ajadung mzailu kera, pe zaidung, nah pe samdung, nnui lungh yi lwe heleuh kedige tei luzie, nah nnui gumlu lai eh kebam deu gade RAMPAUBE nnui Tinggwang nnuide samlam beuzie. 17 Dede magade nnui mlung nreu tetdi cai, nah nnui kingnei meidi dede meliene mdei di nah hera kedadung da keumie nah cidungde reca di cai, 18 ciucai henai Ih nnui dage ranggaila nnuide ngkap bi dizie kecu; nnui gumlu lai eh kebam Jordan reuki lüt kera nnui kahpet kebam deu de ga nnui lungh tie gailak. 19 Henai Ih nnuide kering nah ketsai, samlamdung nah resetdung kedet kera de peula, Ih tinggim nah kideu de nnui dwa ga kehedet zierang tei kera qu gaila; ciziemne nnui cu kering kedet lulo, ciude nnui nah nnui leuhme ringlu kerane. 20 Aide teilu ciu eh RAMPAUBE nnui Tinggwang de hunglu, pesam mzailu, nah pe da ngngeilu kerane. Kedanemene pa au nnui teilung nah nnui tingbazie tei mtie beuzie; aide teilu ciude nnui nnui paume, Abraham, Isaac, nah Jacob RAMPAUBE penuide peu zie lie pa sampet kebeu deu de ga lungh luzie.