1 Nnui nnui ramme Israelme pei gu hetumseu mede pe meurün ge de pe lampui kemak ga peu pakla kerabe ma nah penui dade mbai di kerabe ma; nnui cidungde de peda ngngwa gwang dai bi beu maisia. 2 Magade n ramme pei Israelme nnui taiga lungh nna melie cai, mede nang pecu ci melie cai, nnui makauna cide n kilung ga ngngwa gwanglu, nah pa peimie kemaktane n taiga kai nzeulu maisia, nah iciu eh nnui cide peda pwagwang dai maisia. 3 Nnui cinzwa siakte pe gada de de teibeu maisia; nnui pe paini de cinzwa siakte teibeu maisia; nnui cinzwa siakte n ramme pei Israelme gu ma gah kedi leune teu teilu maisia, makeheibe pa tei nggah kedi nah nangne ngau kelube; nnui ngau kemak nzwa diso. 4 Nnui nnui ramme pei Israelme gu gada mede pe hetumseu lampuiki ga kaudi eh ngau cai, nnui ngau kemak diso; nnui makauna de peu sap dailu kera pecu ngha beu maisia.

5 Mipui ge mipei gu lie kecube nia teulak, nah mipei de mipuidung nia lie kecube teu kerabe ma; kedanemene RAMPAUBE nnui Tinggwang cikenzwabe dung tei kelame de ngkau la.

6 Magade lampuiki ga nruine ciet nnui dwaga bam cai, tsingbang ge ga mede hangdeu ga, pe name de ngngwa bam eh mede pe bom cika bam eh, nah nruine pui pena reu ga bam mede pe bomdung gum bam cai, nnui nruine pui de pe name de si eh pwateu diso. 7 Nnui nruine pui de peu tetlu maisia, dede nnui nnuikatei ziemne pe nadung de pwa lubui. Hezai aide mzailu iciucai nnui lungyi luzie, nah ciude nnui kelungbeting tie luzie.

8 Nnui ki keheci ge tei kecudau, nnui nnui kipeu gage pe rie teilu iciu eh nnui nnui ki ga hejai teu gwang melu kerane magade mige cikade cak mie cai.

9 Nnui nnui kubeluh gage heleuh ketsam kena gede ling so, iciude nnui heleuh ling kemzeu de nah kubetsiluh petsi bui kebeu de tei heradi melu kerane. 10 Nnui luh puh kerane hetumseu ge penai gada gede keu ncüt so. 11 Nnui mamai nah langcimpai dak ncüt kelube pai ba so.

12 Nnui nnui nia kai kelabe gage pai kimiak petu mdai de ga nnuikatei peri teilu.

13 Samnasam mi ge pe nau ge teilu, nah mipui da lüt nauhepeizai tei, nah cipaucai mipui de ngkaudi, 14 nah cipaucai mi kengngam be tadung le pecu mmaudi nah pezi tei kemsia pereu gage kai, nah rang, ‘Ih aipau puide de anau lu, dede Ih petaiga gwang nna kecu dau, Ih pa relei kemcipui lie kecu ngau ma.’ 15 Pecai releipui gu pepui nah pepei releipui de relei kemci puige lie kecu keulia kerane namdi rieki ga hangkiamedung de pwalia maisia. 16 Releipui pei hangkiamedung de rang maisia, "Ih a napui de aipau peide de pe nau kera ha, nah pa pecu ngkau. 17 Pielo, pa pecu mi kengngam tadung tei liede mmau nah rangdi, ‘Ih n napui dade relei kemcipui lie kecu peeilu melie.’ Dede aika a napui releikemcipui lie kecu keulia la." Pecai penai pai cide namdi ga muiteume dwa gage kam gaizie. 18 Cipau namdi hangkiamedung mipeibe de ngngwa lu delwe pecu saja peu maisia; 19 nah penui pecu peu rangkanggeu shekel haige* su zie, nah cide pwa releipui pei de peu dizie, kedanemene mipei be Israel ga releikemci pui zi teimsia kegai ne. Mipui cide pe nau maisia; mipei be pecu langgi daulak pa lungh kela tane. 20 Dede ma aide kesang cai, releime ge releikemcipui lie kecu ngaulu mecai, 21 iciucai penui releipui de pepei ki kimuiki hegwale ngngwa mpet maisia, nah namdi ga mipeidung ne pecu tangtsu le samtsetdi maisia, kedanemene pa Israel ga hengam ketei ta tei kedine, helipui zai nzwa eh pepei ki gade tei kedine; nah nnui nnui kakgade kemau keumzia dizie. 22 Magade mi ge minau keda pui gede nauhepeizai tei eh tuilu cai, penai hangnana tsai bi zie, mipei be mipui be de ngngwa nauhepeizai tei kelabe nah mipui be de; nah nnui Israel gade kemau keugi di maisia.✝ 23 Magade releime ge kemcipuige bam cai, minau rang kenzeu mege, nah mipei kedage pecu ngau lwe namdi ga nauhepeizai teidicai, 24 penai hangnana de namdi rieki ga ngngwa gwanglu, nah penaide tangtsu le samtsetdi. Nnui releime gede sam zie, kedanemene pa kengha kie gai ma, pa namdi ga bam liede. Nnui mipei de sam zie, kedanemene pa pe kidabe nau de tei msia kecu ziemne; nah nnui nnui kakgade kemau keumzia dizie.

25 Dede magade mi ge minau rang kenzeu relei mege heluh gade ngau cai, nah magade pa releipui de tuilu nah peda nauhepeizai tei, ciucai nauhepeizai relei me ge da tei kegai mipeibe de rünne tsai zie. 26 Dede releime da nang magede teilak; relei pui da kemau ziehi pwapeu kera bam ma. Kedanemene makie aide au mige pe kidame gede gwaketang eh pecu teitset kedi nzwa lie. 27 Kedanemene pa pecu luh gade ngaulu; minau rang kenzeu pui kengha kie eh sagai, dede migede pecu kelibeu kera bam ma.

28 Magade mi ge releime ge kemcipuige de ngau dede pa minau rang kenzeu puige mecai, nah magade mipeibe releipuide nimlwe nauhepeizai teidicai, nah magade penaide cilu cai, 29 ge pecu ngngwa nauhepeizai tei kedibe pei rangkanggeu shekel riakngei* releipui pei de peuzie, nah pa pe nau di maisia, kedanemene pa pecu tei msia di delu. Pa lungh kela tane pecu langgi gailak.

30 Mi ge pepei nau* de pegu tei daulak; pa pepei nautak mzeudung de gikah daulak.