1 Moses Israelme pelane de qu hekwalu delwe penui dage rangdi, "Kingnei lulo, Israel, hezaidung nah ajadung Ih nnui kwen gage henai ranggai kerade, nnuide peu cide cilu nah cidungde kainzeulu kerane. 2 Horeb gade RAMPAUBE anui Tinggwang anuide samkakkelu ge teilu. 3 RAMPAUBE samting samkak aide anui paume de ngngwa teima, dede anuide, nah anui peciakne henai ringkebamme ngngwa teilu. 4 Kideutu gade mi sum gade RAMPAUBE nnuide kezungau eh resiu✝ 5 (Ih cidau RAMPAUBE nah nnui kakga saplu, nnui dage pe sam paubeu kerane; kedanemene nnui miheu ziemne ngngi eh bam, nah nnui lamlwa ga nghang ma). RAMPAUBE rangdi,

6 ‘Ih au RAMPAUBE nnui Tinggwang, Egyptme deu gade hebaang teikebam gade, nnuide ngngwa kempetbe.

7 Nnui a dwagade hera keda de bamlak.

8 Nnuikatei nnui ziemne magede hebale teikelu mie teilak, mede tinggim kehu ga kebam kenzwadung, mede kideu kangga kebamdung nzwa, mede dui kangga kebamdung. 9 Nnui penuida keumie lak mede penui gwa teilak, kedanemene Ih, RAMPAUBE nnui Tinggwang, periak ketei Tinggwang. Ih paupai zaisiet de saja peula pe name da saja punggwang eh, ceheu kecum nah mdai da acu ngaurau kelame da, 10 nah samkakkelu samsang de pecang dage, acu hung kelame da nah ajadung mzai kelame da liagai.

11 Nnui RAMPAUBE nnui Tinggwang zi kemta gade keulak, kedanemene RAMPAUBE pe zi kemta gade keu kelame de au mau melie delak.✝

12 Sabbath tingba de mneilu eh cide teimci lu, RAMPAUBE nnui Tinggwang nnuide rang kebeu nzwa.✝ 13 Tingbazie lang herokne ge nnui nri eh nnui ta leune teilu;✝ 14 dede lang henane benai au Sabbath RAMPAUBE nnui Tinggwang ziemne. Cipaunai nnui mata gede teilak, nang de, mede n napei de, mede n napui de, mede nnui kilame mipei, mede nnui kilame mipui, mede nnui tumseu, mede nnui gada, mede nnui kauhau keheibedung, mede sangme nnui kiriedung ga kebamdung. Aide pekie nnui kilame mipei nah nnui kilame mipui mtaklu kerane nang de si eh. 15 Nnui Egyptme deu ga kilame ge teigwang kecu nsung luzie, nah RAMPAUBE nnui Tinggwang cikade heba kengkieng le nnuide ngngwampet beu nah heba nzangpet pwa. Cine RAMPAUBE nnui Tinggwang nnui dage Sabbath tingba mnei kera sam kaibeu.

16 Nnui pei nah nnui pui de herüt peulu, RAMPAUBE nnui Tinggwang nnuide aja kai kebeunzwa, iciu eh RAMPAUBE nnui Tinggwang nnuide peulai kebam deu dega nnui peting ketie ge lungh lu kerane, nah iciu eh nnui ziemne yi luzie.

17 Nnui mide daptset so.

18 Nnui kemmha ta teiso.

19 Nnui rega so.

20 Nnui kemret zierang tei eh n kidabe de mmau so.✝

21 Nnui n kidabe nau de hengin so, nnui n kidabe ki hengin so, pe luh, mede pe kila pei, mede pe kila pui, pe tumseu, mede pe gada, mede n kidabe gu mabam maheidung pelane.’

22 Sam aidungde RAMPAUBE pe kwa sahbak eh ranggai n ngkwa kebam pelane dage lamlwa gade miheu sum gwalede, hemwa ga, nah muiting kecu gade; pa samdung kette kaisi ma. Pa cidungde tangtsu kwak kena gage raulu nah acu cide peu. 23 Aide aiciu gwang, nnui makwa cide muiting kecu sum gade siu kecudau, lamlwa heu kebamdau, nnui hangkiamedung peciakne nah nnui heleuhdung peu keteume, nnui a taiga nna gwang.✝ 24 Nnui rangdi, "Pielu, RAMPAUBE anui Tinggwang pe kemdu nah pe kedi anuide keulia da, nah anui pekwa siu luda miheu sum gade; anui henai ngauda Tinggwang minade resiu kecudau, penui ringlu kera.✝ 25 Dede daiziemne anui tsai zieno? Kedanemene miheu kedi aide anuide mnwa dizie; magade anui RAMPAUBE anui Tinggwang kwa siu tie dicai, anui tsai si dizie.✝ 26 Kedanemene caugamme anui kakga pumteih pung eh bam no ringkela Tinggwang miheu sum gade sam rang kepet siulu eh ring luno, anui tei kelunzwa?✝ 27 Nziemne au, nang mie delwe kingnei lulo ma pelane RAMPAUBE anui Tinggwang rang kecu; anui dage rangdai gailo maleune RAMPAUBE anui Tinggwang n dage rang kecudung; anui cide kingnei zie nah cide mzai zie."

28 RAMPAUBE n samdung kingnei luda nang a dage ranggai kecudau. Pa a dage rangdi, ‘Ih mina aidungde sam siu luda, penui n dage dai ranggai bi kecu. Penui kerang dungde petau. 29 Oh, penuida cikenzwa mlung penuida bam kecu, iciu eh penui acu rüt mui nah a sam pelane mzai lucai, kelungta ainzwa penui ziemne de nah penui namedung ziemne de yilu kerane! 30 Mie penuida ranglo, "Nnui paikidung ga cailigwang dailu." 31 Dede nziemne au, a taiga saplu, nah Ih ncu ajadung pelane ranglia zie, hezaidung, nah teimai kesiadung nang penuide ledeu kera, iciu eh penuide Ih peu kera nah penui gumlu kera deu ga penui cidungde kainzeulu kerane.’✝ 32 Ciziemne, nnui kainzeu luzie, RAMPAUBE nnui Tinggwang nnuide teilo kebeube; nnui zetle ba gade mede hile de cide keu keli dilak. 33 Nnui RAMPAUBE nnui Tinggwang ne nnuide rang kebeu leune lampui ga tetzie, iciu lucai nnui ring luzie, iciu eh n ziemne yi luzie, nah nnui gumlu kera deu dega nnui nnui kelungh ting tie luzie.✝