1 Pecai anui nreulwe Jaadi Kegie lampui lebie de hetaideu gage anui tet gaidi, RAMPAUBE a dage rangkebeu nzwa; anui Sier Deutu ga tingbazie kekiee ge rwa ladi. 2 RAMPAUBE a dage mpau eh, ranggai, 3 ‘Nnui lamlwatu cika huila tiesüt dida; tingpeule ge nreu gailu. 4 Minadung dage aja kai beulo eh, ranggai, Seir ga lungh kebam, Esau leuhme, nnui kibaume deudi nam de nnui kahgwang lauda; penui nnuide hing zie. Ciziemne sünne lu 5 penuide ngngwa regi dilak kerane, kedanemene Ih nnuide penui deu kette peu lau ma, ma, mi pi gede saplu kerade halau ma; kedanemene Ih Sier Deutu Esau de pegu tei kera peu dida.✝ 6 Nnui rangkang le penui dade taktyei lui zie, ciude nnui tyeilu kerane; nnui rangkang le penui dade dui de lui zie, cinzwa eh nnui saklu kerane.’ 7 Kedanemene RAMPAUBE nnui Tinggwang nnui ba le teikegai pelane ga nnuide samlam beuda; pa nnui hetaideu kedi aide ga tetgwang kecu cibam. Kedanemene mmi riakdai aide ga RAMPAUBE nnui Tinggwang nnuide ngngwa la, nah nnui magede gah ma. 8 Cine anui tetkahgwang anui kibaume, Esau leuhme de, Sier ga kelunghme, Arabah lampui gade nreudi eh, Elath nah Ezion Geber namceu gade kenghang de. Pecai anui nreu eh Moab hetaideu lampui gade kahgwang. 9 RAMPAUBE a dage rangdi, ‘Moab de teikeherei so, nah penuide ngngwa regi so. Kedanemene Ih pe deu nnuide nnui gu teikera peu lau ma, kedanemene Ih Lot leuhme de Ar peu dida, penui gu teilu kerane.’ 10 (Pedwa cika Emimmedung lungh, penui kedi, kekiee, nah ketie Anakimme nzwa; 11 Penuide de Rephaim* lie qula, Anakimme de qu kelanzwa; dede Moabme au penuide Emimme de qula. 12 Pedwa Horitme de Sier ga lungh da, dede Esau leuhme ne penuide ngamdi. Penui ne penui dwagade penuide ngkapdi delwe penui cika lunghdi, Israelme RAMPAUBE penuide kepeu deu de gage teikegai nzwa.) 13 "‘Cu cuhlu delwe Zered reuki ga kahmie cu.’ Cine anui Zered reuki kahmie lu. 14 Cu anui Kadesh Barnea gade kegwang ting kecudau Zered reuki de kah kemak kecang, mmi camreieheset di. Cipau tingdau hereu keregilu kera ceheu pelane tsai ciaudi, RAMPAUBE penui dage sampet kai kebeu nzwa. 15 Cipau reude, penui pelane de ngkap ciaudi kemaktane RAMPAUBE ceheu cide de renia eh bamdi.

16 Cine cinzwadi, hereu keregilu keramedung tsai ciaudi eh minadung kakgade tet kedidau, 17 RAMPAUBE a dage mpau eh, rang, 18 ‘Henai nang Ar namdi, Moabme deurai kahgwang zie. 19 Nang Ammonme taiga mcwa gwang nna kecudau, penuide teikeherei so mede penuide ngngwa regi so; kedanemene Ih Ammonme deu kette nnuide nnui gu teikera peu lau ma; kedanemene Ih cide Lot leuhme de penui gu teikera peu dida.’" 20 (Cipau deude de Rephaim deu lie la. Pedwa Rephaime cika lungh da, dede Ammonme penuide Zamzummim lie qula, 21 penui kedi, kekiee, nah Anakimme hu ge nzwa. Dede RAMPAUBE penuide ngkapdi Ammonme dwagade, nah penui penuide ngamlu eh penui bam ga lunghdi. 22 Ainzwa RAMPAUBE teigai Esau minadung ziemne, Sier ga kelunghme dage de, pa Horitme de penui dwagade ngkapdi kecudau, nah Esau leuhme penuide ngamlu eh henai kecangde penui bam ga lungh bamdi. 23 Avvimme renam gade Gaza namdi kemdei ga kecang kelunghme de au, Caphtorme, Caphtor gade gwang kelame, penuide teingkapdi nah penui bam ga lunghdi.)*

24 "Cu cuhlu, tetpet cu, nah Arnon langkam de kahlu; pielo, Ih nnui ba gage Amoritme Sihon, Heshbon gwangpei, nah pe deu kai beu dida. Gumlu kera mtei cu, nah pecu ngngwa hereu gade regi cu. 25 Henai gade Ih tingkam pelane kangga mina kebam leune da nnuide ngngi nah hinglu kera teidi zieda; penui nnui ha siulu eh mbeu dizie nah keherei dizie nnui ziemne."

26 Ih samgwamedung de Kedemoth hetaideu gade Sihon, Heshbon namceu gwangpei dage langgai, kezuyi samdung si eh, peu aide rang eh, 27 "Peu acu n deu kahgwang lo; Ih puidiki lebie tet dizie; Ih hile mede zetle de nreu lak. 28 Nnui pemi tei eh acu taktyei ketyei zwa beuzie, ciude Ih tyeilu kerane; pemi tei eh acu dui peuzie, cinzwa eh Ih saklu kerane; acu peu a pi le n deu kahgwang lo; 29 Sier ga kelungh Esau leuhme, nah Ar ga kelungh Moabme, a ziemne tei kebeu nzwa; Ih Jordan de kahpwa RAMPAUBE anui Tinggwang anuide peula kebam deu dega lütlu kemaktane." 30 Dede Sihon, Heshbon gwangpei, peu anuide pe deu tetkah gwang ma; kedanemene RAMPAUBE nnui Tinggwang pe lung tei takdi nah pe mlung tei hungdi, pa nnui kengkieng le pecu ngamlu kerane, pa henai teikegai nzwa. 31 RAMPAUBE a dage rangdi, "Pielo, Ih Sihon nah pe deu nnui dwagade nnuide pwapeu lauda; keu kera mteilu, ciude nnui pe deu gumlu kerane." 32 Pecai Sihon anuide ncaudi, pa nah pe reugwame pelane, Jahaz namceu ga regi kera pet. 33 RAMPAUBE anui Tinggwang pecu pwa anui kang gage kaibeu eh anui pecu nah pe name nah pe minadung pelane de ngamlu. 34 Anui cidau pe namdidung pelane keulu nah namdi leune teingkap ciaudi, mipeimedung nah mipuimedung nah henamedung; anui migede de bangnzeu beuma. 35 Anui anui ziemne sütkelu hetum rünne gwale keuma, anui namdidung gade sütkelu madung si eh keulu. 36 Aroer gade, Arnon langkam tu ga kebamde, nah namdi langkam sum ga kebam gade, Gilead cuikui ga kecang, namdi ge de anui ziemne hu hamdi kecu gah. RAMPAUBE anui Tinggwang penuide anui ba gage pwa peuda. 37 Nnui au Ammon leuhme deu ga rünne, Jabbok Reuki kung pelane de si eh, nah namdidung hangdeutu deudi ga kebam ga mie ma, RAMPAUBE anui Tinggwang anuide mie helo kebeu leune ga.