1 Nnui hangdeu RAMPAUBE nnui Tinggwang nnuide gum kera peu lai eh kebam dega gwang cang keludau, nah nnui cide gumlu nah cika lungh lu keludau, 2 cidau RAMPAUBE nnui Tinggwang ne nnuide hangdeu peu kebam gade nnui mei ngau raitu kelu pelane gade kesa keulu maisia. Nnui cide raptui ge gage kailu nah RAMPAUBE nnui Tinggwang ne kedet kera pe kereca ni ga miecu. 3 Cipau tingdau cingku tei kebam be da mie maisia nah pecu rang beulu, ‘Ih henai RAMPAUBE nnui Tinggwang dage anuide peu zie lie anui paume de sampet kebeu deu ga nlüt lu delie kecu lia gaila.’ 4 Cingkupei raptui de n ba gade pwalu maisia nah cide RAMPAUBE nnui Tinggwang recabam dwa gage kailu zie. 5 Nnui RAMPAUBE nnui Tinggwang dwa gage ranglu maisia, "A paume au hui rwakela Aramme* ge. Pa Egypt ga nghung lu delwe cika bamdi, nah pe leuhme mina kecam nage. Cikade pa heleuh kedi, kengkieng nah kiee pet kelu leuh ge teidi. 6 Egyptme anui dade sia süt nah anuide teikeherei. Penui peu anuide kilame tadung tei di.* 7 Anui RAMPAUBE anui paume Tinggwang dage kengha sah gai, nah pa anui kwa kingnei lu nah anui rei kebam, anui heta tei kecu nah anui lung keherei kedi ngaulu. 8 RAMPAUBE pe ba kengkieng, peba hetwapet delwe, ngauhing süt kecudung, marengeidung, nah mimakecang batadung tei eh Egypt gade anui de ngngwa mpetlu; 9 nah pa anuide aipau ni gage ngngwa gwang gaibeu nah aipau deu de anuide peu, hangdeu de tungdui nah heliadui* lwa eh kebam. 10 Cu pielo, Ih a luhlüt kideu gade ngau kelube raitube, RAMPAUBE nang ne kepeu de teu gwangla." Nnui RAMPAUBE nnui Tinggwang dwa gage kailu delwe pecu reca lu maisia; 11 nah nnui suiyi lu maisia makeyi pelane gade RAMPAUBE nnui Tinggwang nnui ziemne tei kegai ga, nnui kilungme ziemne, nang, nah Levime nah sangme nnui kakga lungh kebamme de.

12 Nnui luhlüt gu kereizige pelane de mmi pekecum bekum peu cang kedidau, cide kereizige kai cube mmi, ciulude nnui Levime, sangme, pepei kegahme nah hemipui dage cide peulu maisia, iciude penui nnui namdi heriekidung lung gade tyeilu nah puilu kerane. 13 Pecai RAMPAUBE nnui Tinggwang dwa gade nnui rang maisia, "Ih a kilung gade kereizige kemci mapeu keu mpet luda, nah Levime, sangme, pepei kegahme nah hemipui de peu dida, nang ajadung acu kai kebeu nzwa. Ih ngu ajadung keheibe de tei twa kedi tei ma, nah Ih cidungde de nsungta dima. 14 Ih hei eh hap kebam dau cide magede tyei ma, mede Ih mci kemak dau cide magage de kai dima, mede cide Ih kette teu eh ketsai de herüt peu dima. Ih RAMPAUBE a Tinggwang kwa kingnei luda; Ih nang tei lulo aja kai kebeu de mzai ciak luda.* 15 Nang lungh kebam kemci ni gade pie ngkei gailo, tinggim gade, nah n mina Israelme de samlam beulo, nah nang kideu anuide kepeu de, nang anui paume dage sampet kai kebeu nzwa, hangdeu tungdui nah heliadui le lwa kebam."

16 Henai RAMPAUBE nnui Tinggwang nnuide aipau zaidung de nah zaisiedung mzai lulo aja kaila; ciziemne nnui cidungde mzailu zie nah nnui mlung pelane nah nnui keringria pelane teu tei luzie. 17 Nnui henai RAMPAUBE nnui Tinggwang lie kecu nnui sam pet luda, nah pe lampui ga nnui tet zielie nah pe zai mzai, pe ajadung nah pegu hezaidung, nah nnui pe kwa kingnei kera. 18 Henai RAMPAUBE nnui mina de pwa pe mabam lie de eh rang ndugai da, pa nnui da pe sam pet kebeu nzwa eh; nah pe ajadung nnui pelane mzai kera be, 19 nah pa ne tei kegai heleuh kedadung reu nnuide tei cehu beuzie, nah nnui hetwa, kenlang nah herüt ngau luzie. Nnui RAMPAUBE nnui Tinggwang ziemne heleuh keu ntsam kelu ge, pa rang kebeu nzwa."