1 Mmi hena ramsangne gwang cang keludau, nnui hepaudung nggadi maisia. 2 Aide nzwa eh tei zie: Releu kebeume keheibe pa pe kidabe de releu kebeu pau de nggah dizie; pa pe kidabe dade mede pe sinabe dade kie dai lak kedanemene RAMPAUBE ne hepaudung nggah di delie rang dida. 3 Nnui sangme dade cide kie lubui; dede ngu ma keheibede nnui sinabe da kelade nnui nggah bidi maisia. 4 Ciciuliede, nnui kakga migede ma gah bam lak (kedanemene RAMPAUBE nnuide peu nnui gu tei eh gum lai kebam deu de ga pa nnuide samlam beu bi zie), 5 Nnui sünne eh RAMPAUBE nnui Tinggwang kwa kingnei lucai, Ih henai nnuide tei lulo ajadung kai kebeu de pelane tei mzailu. 6 Kedanemene RAMPAUBE nnui Tinggwang nnuide samlam beuzie, pa nnuide sampet kebeu nzwa; nnui heleuh kekiee gede releu beuzie, dede nnui au hepwak lak; nnui heleuh kekiee reu kedi tei zie, dede penui nnui reu kedi tei lak.*

7 RAMPAUBE nnui Tinggwang nnuide peu lai eh kebam nnui deu ga nnui herieki lung kehei ga, magade mina nnui kakga kegahme ge, nnui sinamedung ge bam cai, nnui nnui mlung tak ti kerabe ma mede nnui sinabe kegahbe de ngha raudi kerabe ma;✝ 8 dede nnui pecu ngha beulu nah pa teumaikesia kieege pecu releu bi lulo. 9 Nnui nnui mlung gade kemau lungcet teu eh, "Mmi henabe, hepau nggah beudi kera mmi de, nna di zeuda," de eh cetdi melu kerane sünne lu, iciude nnui nnui sinabe kegahbe de peuku di melu kerane nah pecu magede peu tadi melu kerane; pa RAMPAUBE dage hap gaizie ncu mmau eh, nah cide n ziemne kemau ge dizie. 10 Nang pecu pwapeu bi maisia, nah nang pecu pwapeu kecudau n mlungbe nggia di kerabe ma, kedanemene RAMPAUBE nnui Tinggwang aide ziemne nnui bata tei kegai leune ga nah nnui ba kai kegai leune ga nnuide samlam beu zielu. 11 Kedanemene hangdeu ga madaude kegahme gah lak; cine Ih ncu aja kai eh rangla, ‘Nang Israelme de ngha lamui maisia, keumai kesiame nah n deu ga kegahme de.’*

12 Israelme kedage, Hebrewme pei de, mede Hebrewme pui de, n dage zwa beu nah mmi herok ge n kila tei di cai, pecai nang pecu mmi pehena bekum n dade lung mpet beu di maisia.* 13 Nang pecu n dade lung mpet kebeu dau, nang pecu peu mta tet so. 14 Nang nsuinga eh n gu meurün hau gade, n hecaipung gade nah n zauniakbam gade pecu pwapeu maisia. RAMPAUBE nnui Tinggwang ncu samlam kebeu nzwa, nang pecu pwa peu maisia. 15 Nnui Egypt deu ga kilame tei kecu nah RAMPAUBE nnui Tinggwang nnuide lung mpet kebeu nnui nsunglu maisia; ciziemne Ih henai nnui dage aide tei kera aja kaibeula. 16 Pa n dage rang cai, ‘Ih n dade tetdi laklie,’ kedanemene pa ncu nah n ki de whung, nah pa ncu ngngwa lungh kehega kebam de pesui kecune, 17 ciciucai nang kebung tie keulu delwe n ki kimuiki ga ngngwa gwang lwe cikade pekwen bunglu maisia, nah pa kelungta n kila teila luzie. Nang n kilapuide de cide nzwa teibi lu maisia.* 18 Nang n kilabe de lung mpet kecudau cide n ziemne teipa di kerabe ma, kedanemene pa mmi herokge n kila teibeu da nah li kelume zie swa kena kieege teintwa beu. RAMPAUBE nnui Tinggwang nang tei kecu leune gade ncu samlam beuzie.

19 N tumdung nah n meuründung mciulu raitube pelane RAMPAUBE nnui Tinggwang ziemne keu ntsam lu maisia. Nang n tum mciulu raitube teu mata teiso, mede n meurün mciulu raitube mai biet so.* 20 Mmi ramsang kum RAMPAUBE ne pebam kedet kelu gade, nang nah n kilungme mciulu raitube RAMPAUBE nnui Tinggwang dwa gade tyei zie. 21 Dede magade nnui kauruine zamra di cai, pepi telwa mede pemiak ciet, mede keda zamra msiadi cai, nnui cidungde RAMPAUBE nnui Tinggwang dage ratak tei kerabe ma. 22 Nnui nnui herieki lung gade tyei zie; nnui pelane renet gade mci nah mci kemakbe de, cidungde tyei lubui, nnui heti mede helung tyei kecu nzwa. 23 Dede nnui pe jai be tyei so; nnui pe jai dui nzwa hangdeu gage ruigai dilu.*