1 Magade RAMPAUBE nnui Tinggwang nnuide gum kera peu kebam deu gage migede teitset nzeu, luh ga kauzeu bam, nah caune pecu teitsetdi bi ci mecai; 2 nnui muiteume nah nnui tutiakme tetpet maisia, nah twa kengwa namdi leune teitset kedi peide taiga kebam penui mdet zie. 3 Pecai namceu ga muiteume ketsaipau da mnatu medung tumlei pehau gade, ket madaude mata teila kemak ge, nah ngwanggai pungla kemak gede teu mpet luzie. 4 Iciu eh penui tumlei de teu langkam dui lwa kebam ga mie maisia, langkam ge luh pu nzeu kemak mede ma ling kemak deu, nah langkam cika de penui tumlei ngwang dang dizie. 5 Levi leuhme cingkumedung tet pet maisia, kedanemene RAMPAUBE nnui Tinggwang penuide pe gwatei kera nah RAMPAUBE zi teu samlambeu kera kedet luda nah penui ne kehebwak leune nah kesia tu tiaklu kerane. 6 Muiteume pelane namdi ketsaipau da mnatume tumlei de langkam gade pengwang dang kenzeu reu gage penui ba ntiak maisia;✝ 7 nah penui hetu de samkeli eh rang maisia, ‘Anui ba au hejai aide teilwa ma, meliene anui miak ne ngau ma. 8 Pecai hangkiamedung kie zie, RAMPAUBO, n mina Israelme, nangne kelikebeube, mau gibeulo, nah n mina Israelme kakga kai diso kemau teikemak be de daptsetkedibe mau de.’ Iciucai penui daptsetkedi mau gi beuzie. 9 Ainzwa eh nnui RAMPAUBE miak gade petaube tei lude, nnui kakgade mide daptset kedi mau de bam tadi luzie.

10 Nnui hereu tei kera nnui ngauraume dwaga pet kecudau nah RAMPAUBE n Tinggwang nnuide kengkieng pwapeu eh penuide nnui kang gage kai beu eh, nnui penuide tuilu eh ngngwa tet kecudau, 11 magade tuikelume kakgade hezu keyi pui ge la eh nnui ngau cai, nah nnui pecu luuneu eh nnui nau kera nnui lungning dicai, 12 ciucai nnui pecu ngngwa nnui ki ga gwanglu; pa pe peu taikwak dizie nah pezurang nceudung bit dizie. 13 Pecai pecu tui keludau pe paini kai kela niadung de ra di eh pa nnui ki ga bam dizie nah hekeizie pelane pe pei nah pe pui ziemne hei eh hap zie. Cipaucai nnui pecu luu lubui nah pe nahpei lu nah pa nnui nau dizie. 14 Dede magade nnui pecu nca tadi cai, nnui pa tet keneu kehei ga pecu peu tetdi lu. Dede nnui pecu heki rangkang le zwatyei lakzing, nah nnui kilame ge nzwa eh pecu teu lak, kedanemene nnui pecu hengam teidi delu.

15 Magade mipei ge pe nau hangna bam eh hangge debe ku nah kedage de be mneu cai, nah penai hangnana pecu hena lung beu eh, hangnana pesui kemtingbe pui nah pesui kemakbe pui, magade neraibe pesui kemakbepui na cai, 16 pecai cipau mipei de pe napeimedung de pema nzikebeu benai pa gum kenzeu de, pa penau pesui kemtingpui na de pe nau pesui kemakbe na dwa gade pe neraibe tei daulak, pena neraibe kecu nzwa. 17 Meliene, pa pe neraibe penau pesui kemakbepui na de mdudie eh pa pema mi keda qwa kena kiee ge pecu peu maisia; kedanemene pe napei cide pepei gu kengkieng pe ndeube; cide pegu da neraibe gu pe mzeu.

18 Magade mipei ge pena pelung hung nah pe zai kesia ge pepei kwa mede pepui kwa mzailu kemakme, nah cau, penai pecu ledeu beu liede, penai kwa kingneilu mecai; 19 iciucai pe pei nah pe pui pecu tuilu nah pecu pe namdi hangkiame nah pe namdi kirieki ga ngngwa gwanglu maisia.* 20 Penai pe namdi ga hangkiamedung dage rang zie, ‘Anai napei aide au pelung hung nah pe zai sia; pa anai sam mzai beu ma; pa ma tyei ci kemtwabe zai pung nah zaukesak kau dida.’ 21 Pecai pe namdi ga mipeidung tangtsu le pecu samtsetdi zie; nah nnui nnui kakgade herakesia keu gi dizie. Israel ga mina leune aide tei kedi siu nah ngngi zie.

22 Magade mipei ge kemau teidi eh ketsai ngau kera pensam dicai nah pecu teitset di, nah nnui pepau tsingbang gage gwak dicai, 23 iciucai pepau tsingbang ga cipauziu peu bam diso. Meliene, nnui cipau nai gage pecu kungdi bi maisia;* kedanemene keheibede gwaktset kecume de au Tinggwang reset lalu. RAMPAUBE nnui Tinggwang nnuide gumlu kera pwa peu kebam deu de tei heradi kelakne aipau aja de mzailu.