1 RAMPAUBE nnui Tinggwang heleuhdung de ngkap kedidau, penui deu RAMPAUBE nnui Tinggwang nnuide pwapeu lai kebam medung de, nah nnui penui cai gwang kecudau nah penui namdidung nah penui kidung ga lungh keludau, 2 RAMPAUBE nnui Tinggwang nnuide gum lulo pwapeu kebam nnui deu sum ga nnui namdidung kecum nnuikatei ziemne kedetlu maisia. 3 Nnui lampui teilu nah nnui deu raidung zicum gage nzi gailu, hangdeu RAMPAUBE nnui Tinggwang nnuide gum lulo pwa kepeu de, iciude keheibe de mi kedame de teitset kedime cikage pak gailu kerane.

4 Mige mi kedame de teitsetdi nah cikade pak delwe pekatei pe teilung kelilu zielie kelame ziemne ranglia kegai, mige pe kidabe de ngaurau mene nah teitset zie lie eh mene teitset kedi tingdau ziemne aide marang kelia ge. 5 Saulia ge ziemne, magade mige hegung ga pe kidabe de nzang lwe tsing ria zie lie mie, nah pe nreu le tsingbang bi nkau zie lie bi, nah nreu petang gade ngkeu mpet pe kidabe de beu nah pecu teitsetdi, ciucai cipau peide aipau namdidung ket ga pak mie delwe pe teilung kelilu maisia. 6 Iciu meliecai tsai kedibe kum kepeibe teitset kedibe cai gwa mie lubui lu, nah pe rata süt kecu gade pecu gwa mie canglu, magade pe kakbe dizu dicai, pecu dapgai nah pecu teitsetdi, cipau pei de tsaibui meliede, kedanemene gwang kedile pa pe kidabe de ngaurau lama. 7 Cine Ih nnuide namdidung kecum nnuikatei ziemne kedet lu kera rang gaila. 8 Magade RAMPAUBE nnui Tinggwang nnui raidung de tei mdi beu cai, pa nnui paume dage teibeu zielie rang kebeu nzwa, nah pa nnui paume de peu zielie sampet kebeu hangdeu pelane nnuide peu cai; 9 magade nnui aipau ajadung pelane teimzai eh teilu cai, Ih nnuide henai rang kebam de, RAMPAUBE nnui Tinggwang de ku kera ajadung nah pe lampui ga tet muilu kera, pecai nnui namdi kecum nnuikatei ziemne kai si bilu, aipau kecum cai de. 10 Aide tei lulo iciude RAMPAUBE nnui Tinggwang nnui magum tei kera nnuide pwa peu kecu hangdeu kakga mina mau kemakme tsaidi lak, iciude ketsai mau gede nnui reu ga gwangdi melu kerane.

11 Dede magade mi keheibe de pe kidabe de ngaurau cai, kenret au cipaude de kwa bam, pecu renia cuhdi, nah pecu rezam di iciu de pa tsai dizie, nah magade pa aipau namdidung ket gage pakgai dicai, 12 ciciu eh pe namdi ga hangkiamedung pecu ngngwa gwang kera langgai maisia nah pecu cikade ngngwa gwang daizie, nah pecu tui pwa hekum peei kela kibaume ba gage kai beu dizie, iciu eh pecu teitset di kerane. 13 Pecu ngau nggia so; meliene, nnui mi de dapketset aipau de de Israel gade gidi, iciude nnui ziemne ma pelane yi luzie.*

14 Nnui nnui kidamedung deurai penui ndaa de kai kemzeu de keugi diso, nnui magum ga, gum lai eh kebam de, RAMPAUBE nnui Tinggwang nnuide gum lulo pwa kepeu deu de ga.*

15 Mi hangge zierang le mige kemau ziemne mmau di kerabe ma, mede kemau keheibe de, ketsam tsam gade pa mau kedi; mi hangna zierang, mede mi hangcum zierang gade, keta kehei be liede ci mcilu maisia.✝ 16 Magade migede mmau eh kenret zierang teicuh cai kemau ge pecu mmau eh zierang tei kera. 17 Iciucai penai hangnana de, penai kakga ma kehebwakdung kebam, RAMPAUBE dwa ga sap bi zie, cingkume nah tutiakme dwa ga cipau tingdau hegwa tei kebambe. 18 Tutiakme cide pekie pie siakte zie; pielo, magade zierang cide kenret zierang lie cai nah pe sinabe dage kenret zierang tei gaidi cai, 19 ciucai nnui pe dage tei bi maisia, pa pe sinabe dage tei gai keneu nzwa; nah nnui kemau cide nnui kakgade keu gidi luzie. 20 Pecai bang kebamme penui siu nah ngngi dizie, nah cipau ciale de nnui kakga cikenzwa kemau teisi ta dizie. 21 Ngau nggiabeu so; keringria ge ziemne keringria ge su zie, miak ge ziemne miak ge, gei ge ziemne gei ge, heba ge ziemne heba ge, hepi ge ziemne hepi ge.✝