1 Abib be kei de mnei lu, nah Kahkegwang de RAMPAUBE nnui Tinggwang ziemne mneilu, kedanemene Aviv be kei RAMPAUBE nnui Tinggwang nnuide tingmui Egypt gade ngngwa mpet beu kecune. 2 Nnui Kahkegwang ratak de tei gaizie RAMPAUBE nnui Tinggwang dage meuründung nah ketumdung le RAMPAUBE ne pe recabam kedet kelu gage. 3 Nnui cide Cehi kaikelu tangku de ncüt eh tyei so, nnui lang hena ne cide tsehi kaikemak tangku de kaincüt eh tyei zie, lungrei tangku; kedanemene nnui Egyptme deu gade kelwa eh mpetlu. Aide nnui teilung tingba zie pelane ga teilu iciude nnui Egypt gade kempet benai de nsung lalu kerane.* 4 Nnui kakga nnui deurai leune ga lang henane tingkak ga tsehi kette peu ngau so; mede raitu benai tinghegi tingdau nnui ratak tei kecu hetei kette tingcang kecang kai nzeu kerabe ma. 5 Nnui kahkegwang ratak de RAMPAUBE nnui Tinggwang ne peu lai eh kebam namdi heriekidung lung gade tei kerabe ma. 6 Meliene, RAMPAUBE nnui Tinggwang ne kedet kelu pe recaki gade ratak teilu. Cika nnui tinghegi tingnaimiak kenlüt tingdau kahkegwang ratak tei zie, nnui Egypt gade kempet mmi tingdau.* 7 Nnui hetei de rulwe tyeilu maisia RAMPAUBE nnui Tinggwang ne kedet kebeu bam gade; pecaibe nai tingcang nnui nreu lwe nnui gu ramzeukidung ga gwang dizie. 8 Lang herokne ziemne nnui Cehi kaikemak tangku tyei zie; lang henane benai RAMPAUBE nnui Tinggwang ziemne reca ngkwa* ge bamzie; cipau benai nnui bata tei kerabe ma.

9 Nnui nnuikatei ziemne mtakkak hena pei zie; nnui herei sap kebam de tangkane le get kecu benai gade mtakkak hena pei ndeu di maisia. 10 Nnui nnui ba gade kepeu mta mapeudung de teu RAMPAUBE nnui Tinggwang ziemne Mtakkakdung Ngyi de hengyi lu maisia, RAMPAUBE nnui Tinggwang ne nnuide samlam beu kecu rehi gade. 11 Nnui RAMPAUBE nnui Tinggwang dwa gade nnui suiyi zie, nnui, nnui napei, nnui napui, nnui kila pei, nnui kila pui, Levime nnui namdi kiriedung lungga kebamme, nah sangme, pepei kegahme, nah hemipui nnui kakga kebamme, RAMPAUBE nnui Tinggwang ne pe kerecaki kera ziemne kedet kelu ni gade. 12 Nnui Egypt ga hebaangme ge lie cu nsunglu; nnui hezai aidungde mneilu nah teilu maisia.

13 Nnui gu zauniakbam nah nnui gu hecaipung gade nnui luhlüt de hekwa nlüt kelu cai nnui Paiki Ngyi de lang henane hengyilu maisia.* 14 Nnui hengyi tingdau nnui suiyi zie, nnui, nnui napei, nnui napui, nnui kila pei, nnui kila pui, Levime, nah sangme, nah pepei kegahme nah hemipui nnui heriekidung lungga kebamme. 15 Lang henane ziemne RAMPAUBE nnui Tinggwang ziemne nnui hengyi mnei bi lu maisia RAMPAUBE ne kedet kera ni de gade, kedanemene RAMPAUBE nnui Tinggwang ncu n luhlüt leune ga nah n batadung leune ga samlam beu zielu, nah nnui sui yisütlu maisia. 16 Mmi ge gade pia cum n mipeidung leune RAMPAUBE nnui Tinggwang dwa ga gwang maisia pa ne kedet kera ni de ga: Cehikaikemak Tangku ngyi ga, Mtakkak Ngyi ga, nah Paiki Ngyi ga. Migede peba-mta RAMPAUBE dwaga gwang lak;* 17 Meliene, mipeidung keheibe de pa teilu kebui gade peuzie, iciu eh nnui RAMPAUBE nnui Tinggwang nnuide peu kebeu samlam de cilu kerane.

18 Nnui namdi heriekidung lungga RAMPAUBE nnui Tinggwang ne peu kebam dega nnui tutiakme nah kedime kedetlu maisia; penuide nnui leuh riep gade kedet zie, nah penui mina tutiak masang eh tiak maisia. 19 Nnui kemzuibe telai keu gidi kerabe ma; nnui keneu kerüt teilak mede hetau henim luu lak, kedanemene hetau henim makecime miak tei ciet dila nah makesangme samdung de tei maudi lalu. 20 Nnui kemzuibe caisui lu maisia, kemzuibe cai rünne, iciude RAMPAUBE nnui Tinggwang ne nnuide peu kera deu de ga lungh nah gumlu kerane.

21 Nnuikatei nnui ziemne Asherah mie ge tei ncuh kerabe ma, hetsia ketaheibe de, nnuikatei nnui ziemne tei kelu RAMPAUBE nnui Tinggwang recabam taiga. 22 Nnuikatei ziemne ketaheibe kenlum tangtsu mie gede tei ncuh kerabe ma, RAMPAUBE nnui Tinggwang ngkau kelabe.