1 Cipau tingdau RAMPAUBE a dage rangdi, "Keraibe nzwa tangtsukwak kena panglu, nah lamlwa ga a da nghanglu, nah tsingbung ge teilu. 2 Ih tangtsukwak gage samdung raugai beuzie tangtsukwak keraibe ga kebamde nang ne rütpang kedide, nah nang ci kenade tsingbung gage kai luzie." 3 Cine Ih acacia tsing le tsingbung ge teilu, nah Ih tangtsukwak keraibe kenade nzwa panglu, nah Ih lamlwa ga nghang, tangtsukwak kenade a ba ga pwabam eh.✝ 4 Pa tangtsukwak kena gage rau, keraide rau kecunzwa, nnui lamlwa gade ngkwa kelu benai de RAMPAUBE mi sum gade marang eh nnuide Ajadung Kerei de kepeu; pecai RAMPAUBE tangtsukwak kenade acu peu. 5 Ih nreucaili lu nah lamlwatu gade nghung lu, nah tangtsukwak de tsingbung Ih ne tei kelude gage kailu; ci kenade cika ladi da, RAMPAUBE acu rang kebeude nzwa. 6 (Cipaucai Israelmedung Beeroth Bene Jaakan* gade Moserah ga hebeuh tei mie. Cikade Aaron tsaidi, nah pecu cika ge kungdi; Eleazar, pe napei, pe keleu tei eh cingkupei teidi.* 7 Cikade penui Gudgodah gage hebeuh teigai, nah Gudgodah gade heni dui keyi deu, Jotbathah ga kecang. 8 Cipau tingdau RAMPAUBE Levi leuhme depeu RAMPAUBE Samkakbung de pwa kera kedetlu, RAMPAUBE dwaga sap eh pe gwatei kera, nah pe zi ziemne henai nzwa, pe mina de samlam beu kera.* 9 Cine Levi au pe qwa gah mede pe siname de ngngwa hangdeu gum kerade gah; pa gumlu kerabe au RAMPAUBE da, RAMPAUBE nnui Tinggwang pecu rang kebeude nzwa.) 10 Ih lamlwa ga kerai tingdau nzwa bamdi, tingbazie riakdai nah tingmuizie riakdai. RAMPAUBE cipau ting daude a kekie kingnei daibeu; RAMPAUBE nnuide ngkapdi kera pe lungning ma. 11 Pecai RAMPAUBE a dage rangdi, ‘Cuhlu, minadung dwa tetcu penui beuh teuswa beu kera; penui tetlüt nah hangdeu gum luzie Ih penui paume dage penuide peu zie lie eh sampet tei kedide nzwa.’

12 Cu, Israel, RAMPAUBE nnui Tinggwang nnui dade dai luuneu lano? RAMPAUBE nnui Tinggwang de kehing de rünne, pe lampui pelane ga tet kera, pecu hung kera, nah RAMPAUBE nnui Tinggwang de nnui mlung pelane teu nah nnui keringria pelane teu eh reca kerade da,✝ 13 RAMPAUBE aja dungde mzailu kera, nah pe zaidung, Ih nnui ziuyi ziemne henai tei lulo eh aja kai gaila. 14 Ainie, tinggim hutubedung kecangde, kideu, nah cika kebam leune de RAMPAUBE nnui Tinggwang gu. 15 RAMPAUBE rünne nnui paume de pesui yi iciu eh penuide hunglu kerane, nah pa penui leuhmedung de, penui caime de, mina keda keheibe swade nnuide kedetlu, henai pa tei kebam nzwa.✝ 16 Ciziemne nnui mlung hegeurum di*, nah nnui mlung tak sita dilu. 17 Kedanemene RAMPAUBE nnui Tinggwang, pa au heradung reu Tinggwang, nah mpaubedung reu Rampaube, Tinggwang ditube, ngkiengtube nah ngau kehing ge, migede de pesui ntwa lama nah hetau henimdung luu lama.* 18 Pa pe pei kegahme nah hemipui ziemne kemzuibe tei beula, nah pa sangme de taktyei nah paini peu eh keku keulia la. 19 Cine sangme de kulu; nnui de Egyptme deu ga sangme ge tei kecune.* 20 Nnui RAMPAUBE nnui Tinggwang de hing zie; nnui pecu reca zie. Nnui pe dage ngngei bi maisia, nah pe zi rünne ga nnui sampet zie. 21 Nnui pecu twalu, nah pa nnui Tinggwang da, nnui ziemne ma kedi nah kehingdung tei kebeube, nnui miak le ngau kelude. 22 Nnui paume Canaan gade mina riakhena ge Egypt ga nghung; cu au RAMPAUBE nnui Tinggwang nnuide tinggimdung ga hegidung kebam kiee ge tei beuda.