1 Pecai anui nreulwe Bashan lambie nghang. Og, Bashan gwangpei, gwang eh anuide regidi, pa nah pe reugwame pelane, Edrei gade regi kerane. 2 RAMPAUBE a dage rangdi, "Pecu hing so; kedanemene Ih pecu ngamlu kera ncu kengkieng peu dida nah pe minadung pelane nah pe deu n kengkieng kang gage kaibeu dida. Nang Sihon dage teikegai nzwa pe dage teigai zie, Amoritme gwangpei, Heshbon ga kelunghbe de dage teikegai nzwa." 3 Cine RAMPAUBE anui Tinggwang Bashan gwangpei Og de ngamlu kera anuide kengkieng peuda, nah pe minadung pelane de anui kang gage kai beuda. Anui pe minadung de teitset ciaudi kemaktane teidi. 4 Anui cidau pe namdidung pelane keulu cipauting ga. Namdidung riakherok ge kebam gade anui nam kette keu tadi kecu teima, Argob cuikui pelane, Bashan ga Og hegwangram. 5 Aidungde renei kwakelu namdidung pelane kiriedung husüt kecu, herieki kikamdung, nah hegeudung le teipwa kebam da; aide au renamdung kirie teikemak kekiee ge si mene. 6 Anui penuide ngkap ciaudi, anui Heshbon gwangpei Sihon dage teikegai nzwa, namdi pelane ngkap ciaudi, mipeidung nah mipuidung nah henamedung. 7 Dede hetum nah namdidung gade swet keludung pelane, anuikatei anui ziemne keulu swet keludung nzwa. 8 Cidau anui Amoritme gwangpei kena dade Jordan gwale kebamme deu de keulu, Arnon langkam gade Hermon Deutu ga kecang. 9 (Hermon Deutu de Sidonme Sirion lie qula, nah Amoritme Senir de qula) 10 nah langkie ga namdidung pelane, Gilead pelane, Bashan pelane, Salekah nah Edrei ga kecang, Bashan ga Og hegwangram gu namdidung pelane. 11 (Bang kebam Rephaime, Bashan gwangpei Og rünne dida. Pielo! Pe zeu au hegeu zeu ge. Rabbah ga bam meni, Ammon leuhme kelungh ga? Cide petie cubit hekui* nah pedi cubit mdai*, minadung mdetla kecunzwa gade.)

12 "Cidau aipau hangdeu anui keu kelude, Aroer dade, Arnon Langkam ga kebam gade, hangdeutu deudi Gilead pempie, nah pe namdidung, Ih Reubenme nah Gaditme de peudi. 13 Gilead deu kebangbe nah Bashan pelane, Og hegwangram, Ih Manasseh leuhme pempie gede peudi. (Argob cuikui pelane, nah Bashan pelane. Aide de Rephaime deu lie qula. 14 Jair, Manasseh leuhme ge, Argob cuikui pelane luulu Geshurme nah Maakathiteme deugumrai ga kecang. Pa cuikui de, Bashan de si eh, pekatei pezi gade qula, Havvoth Jair de, henai kecang.) 15 Ih Gilead Machir de peu dida. 16 Ih Reubenme nah Gaditme de Gilead gade Arnon langkam kecang deugumrai de peudi, langkam sum dene hedeu herai, nah Jabbok reuki ga kecang, Ammon leuhme de ngngwa herai kecuga. 17 Penui rai kedage cai Jordan Reuki langkam langkie de si, Kinnereth gade Arabah jaaidi (cide, Ketsai Jaaidi) gade petle Pisgah Deutu pi ga kecang.

18 Cidau Ih nnuide aja kai beuda, rang eh, "RAMPAUBE nnui Tinggwang nnuide peu gumlu kera hangdeu aide peuda; nnui, reugwame pelane, reunet teulwe kahgwang zie nnui sinamedung, Israelme dwa gade. 19 Dede nnui naudung, nnui namedung, nah nnui gu hetumdung (Ih cibam nnui hetum kekiee ge bam kecu), Ih nnuide kepeu nnui namdidung dega bamzie, 20 RAMPAUBE nnui sinamedung de mtak kera peu kemaktane, pa nnuide kepeu nzwa, RAMPAUBE nnui Tinggwang penuide peu zielie kebam deu Jordan gwale kebamde gumlu kemaktane; pecai nnuide kepeube deu dega, nnui mina keheibede, nnui cailigwang luzie."

21 Cidau Ih Joshua de aja kai, rang eh, "N miak le pelane ngauda RAMPAUBE n Tinggwang aipau hegwangpei kena da teikegai; RAMPAUBE cinzwa nang kelüt hegwangram pelane dage teigai zie. 22 Nang penuide hing dilak, kedanemene RAMPAUBE n Tinggwang pane n ziemne regi beuzie."

23 Cidau Ih RAMPAUBE dade kie sünne gai, 24 "O RAMPAUBO Tinggwang, nang n kilabe de miswakegah n kedi nah n kengking lia kecu bangdwa dwa bam dida; nang teikegai batadung kenzwa de teilu kebui tinggim mede kideu ga hera keda ge da bam no, nah miswakega batadung de gapte? 25 Peu acu cide kahlo eh, Ih n dade kiela, nah hangdeu keyi Jordan gwale de peu ngaulo, cipau hangdeutu deudi keyi de, nah Lebanon de si eh." 26 Dede RAMPAUBE acu pe rata di nziemne; pa a kwa kingnei tadi. RAMPAUBE a dage rangdi, "Peu aide n ziemne mtak dilu, aipau ha de a dage rangdai tadi: 27 Pisgah twang ga nghang cuh delwe naimiak kenlütle, tingpeule, tingbangle, nah naimiak kepetle piegai lu n miak le; n miak le pie gailu, kedanemene nang Jordan kahpet laklu. 28 Meliene, Joshua de ma ranglia nah teingkuu nah pecu teingkieng beulu, kedanemene pa mina dungde teuswa eh ngngwa kahpet zielu, nah nang kengau deu de peu penuide gum kera pa tei zielu." 29 Cine anui Beth Peor langkam kencwa ga bamdi.