1 Moses mie delwe Israelme pelane dage sam aidungde rang. 2 Pa penui dage rangdi, "Ih au cu mmi haige ngkai dida; Ih mpet nah nlwet gailak da; RAMPAUBE ada ge rangbeu, ‘Nang Jordan reuki aide ga kahpet lak lie.’* 3 RAMPAUBE nnui Tinggwang, pa nnui dwa rai gwang zie; pa nnui dwa gade heleuh aidungde de ngkapdi zie, nah nnui penui deu gum luzie. Joshua, pa nnui dwa kahpet zie, RAMPAUBE ne rang kebeu nzwa. 4 RAMPAUBE penui dage teigai zie pa Sidon dage nah Og, Amoritme gwangpei dage tei kegai nzwa, nah penui deu, pa ngkap kedide de. 5 Nnui penuide hereu ga redau keludau RAMPAUBE penui reu ngkieng kelu nnuide peu zie, nah Ih nnui dage rang kebeu leune kesiakge penui dage teizie. 6 Nnui lung ntiplu nah kuulu, ngngi so, nah penuide hing so; kedanemene RAMPAUBE nnui Tinggwang, pa nnuide ngngwa la delie; pa nnui dade canglu tadi mede nnuide gidi laklie."✝ 7 Moses Joshua de qu lwe Israelme pelane kebam gade peda rangdi, "N lung ntiplu nah kuulu, kedanemene nang mina aidungde de ngngwa lwe mie zie penui paume dage penuide hangdeu de peu zie lie eh RAMPAUBE pe sampet kaibeu ga; nangne penuide gumlu kera mzibeu zieda.✝ 8 RAMPAUBE, pa n dwa lampui sau kelabe delie; pa ncu ngngwa lazie; pa n dade canglu tadi mede ncu pütdi lak; ngngi so, n sui ceu diso."✝

9 Moses hezai aide rau lwe cingkume, Levime namedung, RAMPAUBE samkak Bung pwa kelame de cide pwapeu; pa Israel hangkiamedung pelane de de kwak ge ge peudi. 10 Moses penuide aja kaibeu eh rangdi, "Mmi hena cangdi de, hepau ngga kebeu ting de ga, Paiki Ngyi dau, 11 Israelme pelane RAMPAUBE nnui Tinggwang dwa gwang kelu dau pe kemci ni ziemne pa kedet kera heni de ga, nang Israelme pelane dwa de hezai aide pei eh penui kingnei zie. 12 Mina, mipei, mipui, nah hename, nah nnui sangme nnui namdi herieki ga lungh kebamme de qu hekwalu, ciu eh penui siulu nah ci lu kerane, nah ciude penui RAMPAUBE nnui Tinggwang de herüt peulu kerane nah hezai aide samdung pelane mzailu kerane. 13 Aide teilu ciude penui leuhme, cila kemakme, siulu zie nah RAMPAUBE nnui Tinggwang de rüt kera cilu zie, nnui Jordan reuki kahgwang gumlu kera hangdeu ga nnui lungh kelatane."

14 RAMPAUBE Moses dage rangdi, "Pielo, nang tsaidi kera tingba de gwangzeu; Joshua de qu lwe nkatei kengkwa paiki gade pecu mpaulu, ciude Ih pecu aja kailu kerane." Moses nah Joshua mie nah penaikatei kengkwa paiki gade kempau. 15 RAMPAUBE paiki ga hemwa tsia ge gade pecu peu ngau; hemwa tsia de paiki kimui reu ga sap bam. 16 RAMPAUBE Moses dage rangdi, "Pielo, nang tsai dizie nah n paume de ngngwa ncüt dizie; mina aidungde cuhlu zie nah helipuidung nzwa zie hera kedadung cai zui eh penui mie kecu deu ga penui kakga kebam. Penui acu gidi zie nah a samkak penuide ngngwa tei kelude gikah dizie. 17 Pecai, cipau tingdau, penuide a rata süt dizie nah Ih penuide pütdi zie. Ih penui dade a zu mbai dizie nah penuide ngkapdi zie. Kengkap kehing kekieege nah keherei penui da gwang zie ciude penui cipau tingdau rang zie, ‘Anui Tinggwang anuida ngngwala sita kedine anui reu ga kengkap kehing aidungde gwang meni?’ 18 Ih kesangde penui dade a zu mbai dizie cipau tingdau kedanemene penui kemau leune tei, nah penui keda rabedung de reca kedine. 19 Cu ciziemne lei aide raulu nkatei ziemne nah cide Israelme dage ledeu beulo. Cide penuide peu cilu, iciude lei aide aziemne zierang ge lubui Israelme de kemmau. 20 Kedanemene Ih penuide ngngwa gwang keludau tungdui nah heliadui lwa kebam deu* de, penui paume dage peu zielie Ih sampet kaibeu kecu deu ga, nah penui taktyei eh tyei mnunglu nah puilu keludau, pecai penui keda rabedung da nreu dizie nah penui gwatei zie nah penui acu mlai dizie nah penui a samkakkelu de gileu dizie. 21 Mina aipaudung de reu ga kengngi kengkapdung nah keherei kekieege gwang kelu dau, lei aide penui dwa de zierang teila dizie (kedanemene penui leuhme mui gade cide nsungta di laklu). Kedanemene Ih penuide a sampet kebeube deu ga Ih penuide ngngwa kegwang dwa liede, Ih henai penui daipai cet labi Ih cibam." 22 Cine cipau nai Moses lei aide raulwe cide Israelme de ledeubeu. 23 RAMPAUBE Nun napei Joshua dage aja kai nah ranggai, "Kuu nah n lung ntiplu; kedanemene nang Israelme de Ih penuide sampet kebeu deu ga ngngwa lüt zie, nah Ih ncu ngngwa lazie." 24 Cinzwa eh Moses hezai samdung aide laisiukwak gage rau canglu ge, 25 pa Levime RAMPAUBE samkak bung pwa kelame de aja kaibeu, nah pa rangdi, 26 "Hezai laisiukwak aide pwalu delwe RAMPAUBE nnui Tinggwang samkak Bung dwaga ge kailu, ciude peu cide nnui reu kemmau zierang bam lu kerane.✝ 27 Kedanemene nnui samzai tei kerau nah nnui zai dai kenzwa gede siabi Ih cibam; pielo, henai kecang de Ih nnuide ngngwa lungh bam kecu dau, nnui RAMPAUBE de ngngwa renia dida; Ih tsai kedi caide dai kiee ge zieno? 28 Nnui leuhme hangkiamedung, nah nnui kedime pelane de a dwa gage hekwalu, ciude Ih sam aidungde penui kwen gage ranggai luzie nah tinggim nah kideu de penuide kemmau zierang tei kera qu gaizie. 29 Kedanemene Ih tsai kedi cai de nnui nnuikatei de nlien dizie nah Ih nnuide rang kebeudung lampui ga nreu tet gidi kera Ih cibam; ipaucai kengkap nnui da gwang zie. Aide gwang zie kedanemene nnui RAMPAUBE miakngau gade dai mau bi kecube tei zie, nnui bata gade pe rata teigai zielu."

30 Moses Israelme ngkwa kebam pelane dage lei aide samdung teigai teicanglu kemaktane.