1 Aidung de RAMPAUBE ne Moses dage Moab deu gage Israelme de rang beu lulo aja kai kebeu samdung, cide pa penuide ngngwa Horeb lamlwa gade samkakkelu tei kecu gage kai si kecu samdung.

2 Moses Israelme pelane de qulu delwe penui dage rangdi, "Nnui RAMPAUBE ne Egypt deu gade Pharaoh dage, pe kilame leune dage, nah pe deu pelane ga nnui dwa gade tei kegai leune ngau da, 3 keherei süt kecudung nnui miak le kengau, ma rengeidung, nah miswakegah bata kedidung. 4 Dede henai kecang RAMPAUBE nnuide cilu kera mlung, ngaulu kera, mede siulu kera kwendung peu ma.✝ 5 Ih nnuide mmi riakdai ge hetaideu ga nnui mapie gwang; nnui painidung nnui kai kela gade hak dima, nah nnui picumdung nnui pi gade sia dima. 6 Nnui tangku gede tyei ma, nah nnui zau gede sak ma mede keda zaudung liede, ciu eh Ih nnui RAMPAUBE nnui Tinggwang lie kecu cilu kerane. 7 Nnui aipau heni ga kegwang dau, Sihon, Heshbon gwangpei, nah Og, Bashan gwangpei, anuide regi kera pet, nah anui penaide ngamlu. 8 Anui penui deu luulu nah cide gumlu kera Reubenme, Gaditme, nah Manasseh leuh pempie de peudi. 9 Ciziemne aipau samkakkelu samdung kai nzeulu nah cidungde teilu, cinzwa lucai nnui makeheibe ketei ga kwak luzie.

10 Nnui pelane, nnui RAMPAUBE nnui Tinggwang dwa ga saplu; nnui muiteumedung, nnui leuhdung, nnui hangkiame, nah nnui kedimedung, Israel ga mina leune, 11 nnui namedung, nnui naudung, nah sangme nnui kakga nnui ramzeuki ga kebam, nnui tsing ria kecume gade nnui dui kepwame kecang liede. 12 Nnui aika kebam au RAMPAUBE nnui Tinggwang samkakkelu ga lütlu kerane nah sampet RAMPAUBE nnui Tinggwang henai nnuide ngngwa tei kebeu de ga lütlu kerane, 13 cinzwa lude pa henai nnuide pe minadung lie teilu kerane, nah pa nnui Tinggwang de lie kecu, pa nnuide rang kebeu nzwa, nah pa nnui paumedung, Abraham dage, Isaac dage, nah Jacob dage sampet kebeu nzwa.

14 Kedanemene Ih samkak aide nah sampet aide nnui dage rünne teigai ma, 15 henai aika RAMPAUBE anui Tinggwang dwa ga anuide ngngwa sap kebam pelane de si, henai anuide ngngwa bam kemakmedung de de si.

16 Anui dainzwa Egypt deu ga lungh gwang bi, nah nnui anui dainzwa heleuhdung kakgade tet kahgwang bi kecu nnui cibam. 17 Nnui penui gu mamie kemneubedung tsing nah tangtsu, rangkanggeu nah kecakdung le tei kelu penui kakga kebam ngauda. 18 Keheibe de nnui kakga mipei, mipui, pautsa, mede heleuhdung RAMPAUBE anui Tinggwang dade henai penui mlung tet nreudi kelak cet bi lulo, cinzwa eh mie heleuh cidungde rabedung de reca melu kerane. Nnui kakgade peu migede tsingmah lungpwa kaa kecu nah heiring bang ge tei di kelak cet bi lulo.✝ 19 Cipau mina de aipau reset samdung siu keludau, pa pekatei pecu pe mlung gade samlam zie nah rangzie, ‘Ada kezuyi bam zie, Ih a mlung ketak de ga tet la liede.’ Aide ne kehwa nah kecangh ncüt kecu tei ngkap dizie. 20 RAMPAUBE pemau gibeu lak, dede cinzwa meliene, RAMPAUBE rata nah periak kecu cipau mina de mmau eh heucuh zie, nah reset pelane laisiukwak aide gage rau pwa keladung peda gwang zie, nah RAMPAUBE tinggim kang gade pezi mai ngga dizie.✝ 21 RAMPAUBE Israel leuhdung pelane kakgade, samkakkelu resetdung pelane aipau hezai laisiukwak ga rau pwa keladung si eh makehung kai kerane pecu kai ntsam beuzie.

22 Gwang kera ceheu, nnui namedung nnui cai lung leu cuh keramedung, nah sangme deu kemdei gade kegwangme, penui rang zie mateeidung aipau deu gade ngau kecudau nah rapiadung RAMPAUBE ne peu nra kera tei kebeu, 23 nah penui hangdeu pelane sulfur nah keru cai kedi ngau keludau, cika magede ling gailak mede petsi bui kemak, cika mabangdung lung kemak, Sodom nah Gomorrah namdi, Admah nah Zeboyim de ngkap zing kedi nzwa, RAMPAUBE rata nah lunghop gade ngkap kedi,* 24 heleuh kedadung ngngwa ncüt le penui rang zie, ‘Daitei eh RAMPAUBE aipau deu ga cinzwa tei gai no? Aipau rata di süt kedi cui de pekie dai no?’ 25 Cipau cai mina rang zie, ‘Kedanemene penui RAMPAUBE samkak de mlai kedine, penui paumedung Tinggwang de, cide pa penuide Egyptme deu gade ngngwa mpet kecudau pa ne penuide ngngwa teilu, 26 nah kedanemene penui mie lwe hera kedadung gwa teidi nah penui da keumie, penui ci kemak rabedung dage nah pa ne penuide peu kemakbe. 27 Ciziemne RAMPAUBE rata aipau deu ga heu cuh kedi teidi, cinzwa lu eh peu reset pelane Tinggwang hezai laisiukwak aipau gage rau pwa kela teugwang gai beu kerane. 28 RAMPAUBE pe rata le penuide penui deu gade penui mah pai mpet dida, lunghop, nah perata süt eh, nah penuide hangdeu keda gage kelien gai dida, henai nzwa.’ 29 Ma ngkim kecudung RAMPAUBE anui Tinggwang da rünne bam; dede ma dung ge keulia gai kebeudung anui da nah anui leuhme da kelungta bam la, iciude anui aipau hezai samdung pelane teilu kerane."