1 Cu, Israel, Ih nnuide hezaidung nah zaisiedung ledeu beulai eh kebam cidungde teilu kerane, kingnei lu; ciude nnui ring luzie nah lütlwe RAMPAUBE, nnui paume Tinggwang, nnuide peulai eh kebam deu de gum luzie. 2 Ih nnuide aja kaikebeu samdungde ga kaisi delak, mede nnui cidungde keugidi delak, ciude nnui RAMPAUBE nnui Tinggwang ajadung Ih nnui dage aja kaibeu lai eh kebamde mzailu kerane.✝ 3 RAMPAUBE Baal Peor ziemne daipai teigai bi nnui miak le ngauda; kedanemene mina pelane Baal Peor caisui kedime de, RAMPAUBE nnui Tinggwang nnui kakgade teingkap dida. 4 Dede RAMPAUBE nnui Tinggwang da samsang la kecume au henai de ringbam, nnui pelane de. 5 Pielo, Ih hezaidung nah zaisiedung nnuide ledeu beu dida, RAMPAUBE a Tinggwang acu aja kaikebeu nzwa, cide nnui gum lai eh nnui lüt kela deu gade mzailu kera. 6 Ciziemne cidungde teimzai jüja lu; kedanemene hezai aidungde pelane siukelu minadung dwagade aide nnui gu maci nah nnui kecikecet zie nah penui rangzie, ‘Kesangda aipau heleuh kedi de au maci nah kecikecet medung da.’ 7 Kedanemene RAMPAUBE anui Tinggwang keheidaude anui pecu qu kegaidau nzwa, heleuh kedi keda da daipai tinggwang penuide nnasüt kecuge bamno?✝ 8 Daipai heleuh kedi keda masangsüt kecu hezaidung nah zaisiedung tei pwa bamno nnui dwa gage Ih henai hezai aidung pelane kaibeu kecudungde nzwa?

9 Mriaklu nah nnuikatei nnuide regum sünne lalu, iciu eh nnui miak le ngaukelu dungde nnui nsungtadi melu kerane, iciu eh cidungde nnui teilung kebam tane nnui mlung gade mpetdi melu kerane. Meliene, nnui namedung nah nnui tsamedung dage cidungde peu cilu. 10 Nnui Horeb ga RAMPAUBE nnui Tinggwang dwaga kesap benai, RAMPAUBE a dage kerangdau, "Minadungde a ziemne qu hekwalu beulo, nah Ih penuide peu a samdung siu zie, ciude penui kideu ga kelungh tane acu hing eh lungh kera peu cilu kerane, nah cide penui penui namedung de ledeu beulu kerane." 11 Nnui lüt nna eh lamlwatu pi ga sapdi. Lamlwatu cika mi heu eh tinggim ga heucuh bam, hemwa de tiak, nah muiting eh.✝ 12 RAMPAUBE mi gade nnui dage rang; nnui pe kwa pe samdung de si eh siu da, dede nnui pe rehi ngau ma; nnui pe kwa rünne siu. 13 Pa nnuide teimzai lulo aja kaikebeu pe samkak kelude nnuida rang beuda, ajadung kerei de. Pa cide tangtsukwak kena gage raubeu. 14 RAMPAUBE cidau a dage nnuide hezaidung nah zaisiedung ledeu beulo aja kai beuda, ciude nnui kahpetlwe gum lai eh kebam deu de gade tei mzailu kerane.

15 Cine mriak eh cisiaktelu nnuikatei ziemne, kedanemene nnui marehi gede ngau ma RAMPAUBE nnui dage mi gade Horeb gade marang kecudau,✝ 16 ciu eh nnui nnuikatei de tei mmaudi melu kerane mamie tei eh nah marehi gage, mipei nah mipui kenzwa gage, 17 makaune gede kideu ga kebam kenzwa gage, nruine pe hesiu pung eh tinggim ga limkela keheibe kenzwa gage, 18 hangdeu ga bwa kela kaune keheibe kenzwa gage, mede kideu ga heka dui ga kebam keheibe kenzwa gage tei eh. 19 Nnui tinggim ga ngang cuh eh tingnaimiak, hekei, mede hegidung de pie lak, tinggim ga kebam pelane, iciu eh nnuide kemeu teu eh penuide reca nah herüt peu ladi melu kerane, cidungde RAMPAUBE nnui Tinggwang ting kangga lung kebam mina pelane de mzi eh peu dida. 20 Dede RAMPAUBE nnuide kelilu eh hegeu heukebam gade nnuide ngngwa mpet beuda, Egypt gade, nnuide pe minadung tei kerane, henai gade nnui pegu teikedi nzwa. 21 RAMPAUBE acu pe rata di nnui ziemne; pa deiga eh rangdi acu peu Jordan kahpet laklie kecu, nah hangdeu keyi, RAMPAUBE nnui Tinggwang nnuide gum kera peulai eh kebam deu dega peu acu lütlak lie di. 22 Meliene, Ih hangdeu aika de tsai bizie; Ih Jordan kahpet tadi bi maisia da; dede nnui kahpet zie nah cipau hangdeu keyi de gum luzie. 23 Cisiakte lu nnuikatei nnui ziemne, ciude nnui RAMPAUBE nnui Tinggwang samkak kelude nsungtadi melu kerane, pa nnuide ngngwa samkakkelu de, nah nnuikatei nnui ziemne mamie gede tei eh marehi keheibe de RAMPAUBE nnui Tinggwang nnuide kaam kedi de teiso. 24 Kedanemene RAMPAUBE nnui Tinggwang au tei ngkapdi kela miheu ge, periak ketei Tinggwang gelie.✝

25 Nnui nnui namedung nah nnui tsamedung lungh dide, nnui hangdeube ga lungh kedi ketiege di liede, nah magade nnuikatei nnuide tei mmau nah mamie ma rehi gede teicai, nah RAMPAUBE nnui Tinggwang dwa gade kemau tei, pe rata teicai, 26 Ih henai tinggim nah kideu de nnuide kemmau zierang lie qula nah matie mene nnui Jordan kahpet gumlai kebam deu gade gah dizie; nnui kelungh ting cika tielak, dede nnuide ngkap ciau dizie. 27 RAMPAUBE nnuide minadung kakgage teizang dizie, nah nnui heleuh kakgade mina kecam nage dizie, RAMPAUBE nnuide teuzang kegai ga. 28 Cika nnui keda rabedung ta teizie, mina badung tei keludung, tsing nah tangtsu, mangau liede, masiu, matyei, mede manghui gai kelakdung. 29 Dede cikade nnui RAMPAUBE nnui Tinggwang de peei zie, nah nnui pecu ngau luzie, nnui nnui mlung nah nnui rabe pekiene le pwa pecu peei kecudau. 30 Nnui kengngi ga la kedidau, nah ma aidung pelane nnuida gwang kecudau, pecai nnui RAMPAUBE nnui Tinggwang da cailigwang eh pe kwa kingnei luzie. 31 Kedanemene RAMPAUBE nnui Tinggwang au mide ngaunggia kela Tinggwang; pa nnuide gi dilak mede nnuide ngkap dilak, mede pa nnui paume de sampet kebeu samkak kelude nsungta dilak.

32 Cu gwangkedi lebie ha keteu lulo, nnuide mna kemakdwa, Tinggwang kideureu gage mina de damkegai ting de, tinggim tu ge lamde keda tu de keteu lulo, aikenzwa lang ge magede bam mi gah bi kecu, mede aikenzwabe siu mi siu mebi kecu? 33 Madaugede minadung mi gade Tinggwang marang kegai, nnui siu kecunzwa, siulu eh ringlu dini? 34 Mede Tinggwang mie delwe heleuh gede heleuh keda kakgade keupwa pegu kera madaugede teini, kehedeidung, marehidung, nah mimakecangh batadung, nah hereu, nah kengkieng ba, nah nzang kepet ba, nah ngau kehingdung ne, RAMPAUBE nnui Tinggwang Egypt ga nnui miakdwa gade nnui ziemne teikegai pekiene nzwa? 35 Nnuide ma aidungde liada, ciude nnui RAMPAUBE au Tinggwang kecu cilu kerane, nah pa gwale mi kedage de gah lie kecu. 36 Pa tinggim gade peu nnuide pe kwa siu kera teigai, ciu eh pa nnuide ledeu beulu kerane; kideu ga pa pe mi kedide peu nnuide ngauda; nnui mi gade pe samdung siuda. 37 Kedanemene pa nnui paume de keku ne, pa penuicai penui leuhme de kedetlu, nah pa kebam nnuide Egypt gade ngngwa mpetlu, pe kengkieng kedi le; 38 heleuh diki nah nnui swa ngkieng kecudung de nnui dwagade gwa mpetdi kerane, nnuide ngngwa lütlwe, henai gade penui deu nnuide gum kera peulu kerane. 39 Cine henai tingba gade cilu, nah nnui mlung gage kailu, RAMPAUBE au tinggim nreule nah ngkangle kideu gu Tinggwang lie kecu; mi keda gede gah. 40 Nnui pe zaidung nah pe ajadung Ih nnuide henai aja kaikebeu dungde mzailu, ciude nnui nah nnui cai nnui leuhme yilu kerane, nah RAMPAUBE nnui Tinggwang nnuide kelungta nnui gu tei kera kepeu deu de ga lungh tielu kerane.

41 Pecai Moses Jordan naimiak kepetle tu namdi kecum kedetlu, 42 ciude cipau nam ket ga keheibede nsiulu kerane magade pa teimaudi eh mi kedame, pe ngauraume kemakme de teitset dicai. Namdi aidungde ket gage pakgai lucai, pa ring de lubui. 43 Cidungde cai: hetaideu ga kebam Bezer, langkie deudi de, Reubenme ziemne; Ramoth Gilead deu ga, Gad leuhme ziemne; nah Golan Bashan deu ga, Manasseh leuhme ziemne.

44 Aide Moses hezaidung Israelme dwa gage kaikebeu deda; 45 aidungde samkakkelu zaisiedung, hezaidung, nah keda zaidung pa Israelme penui Egypt gade kempet dau penui dage rang kecude da, 46 penui Jordan naimiak kepetle ga kebamdau, Beth Peor de kemcwa langkam ga, Sihon deu ga, Amorme gwangpei, Heshbon ga kelunghbe, Moses nah Israelme penui Egypt gade mpet keladau pecu ngamlu. 47 Penui pe deu gumkera keu pwadi, nah Bashan gwangpei Og deu de, aidungde, Amoritme gwangpei kena, Jordan gwale naimiak kepetle ga kebam. 48 Deugumrai aide Aroer gade gwang, Arnon langkam tu ga kebam gade, Siyon Deutu (mede Hermon Deutu) kecang, 49 nah Jordan Reuki langkam gu langkie pelane de si eh, Jordan kahpet eh naimiak kepetle, Arabah Jaaidi ga, Pisgah Deutu pi ga kecang.