1 Moses nah Israel ga hangkiamedung minadung dage aja kai nah rangdi, "Henai Ih nnuide tei lulo aja kai kebeudung de tei mzailu. 2 Cidau nnui Jordan reu kahlwe RAMPAUBE nnui Tinggwang ne nnuide peu lai eh kebam deu ga gwang kelu benai, nnui tangtsu kedige kesa sumlu nah keheniak nia le cidungde keniakdi. 3 Nnui tet kahkegwang dau nnui cidung reu gage aipau hezai gu samdung pelane raulu; ci nzwa eh RAMPAUBE nnui Tinggwang ne nnuide peu lai eh kebam deu ga mielu kerane, tungdui nah heliadui lwa kebam deu ga, RAMPAUBE nnui paumedung Tinggwang, nnui dage sampet kebeu nzwa. 4 Nnui Jordan reu kah keludau, Ih henai nnuide tei lulo rang kebeu nzwa tangtsu aidungde sumlu, Ebal Deutu* reu gage, nah keheniak nia le cidungde keniaklu. 5 Cika RAMPAUBE nnui Tinggwang ziemne nnui recabam teilu, tangtsudung le teikelu recabam; dede nnui tangtsudung hegeu nia le keu heta tei lak. 6 Nnui RAMPAUBE nnui Tinggwang recabam tangtsudung pang kemak be le teilu; nnui cikage keru ratakdung RAMPAUBE nnui Tinggwang de pwapeulu, 7 nah nnui kangbau ratakdung tei zie nah cikade tyei zie; nnui RAMPAUBE nnui Tinggwang dwa gade nnui suiyi zie.* 8 Nnui tangtsudung reu gage aipau hezai samdung pelane rau mcigi luzie."

9 Moses nah Levime cingkumedung, Israelme pelane de mpau eh rangdi, "Zing delu nah kingnei lu, Israelme: Henai nnui RAMPAUBE nnui Tinggwang gu minadung tei dida. 10 Ciziemne nnui RAMPAUBE nnui Tinggwang kwa de mzailu nah hezai kai kebeubedung nah pe ajadung mzailu Ih henai nnui dage tei lulo rang kebeudung de."

11 Moses cipau benai minadung dage aja kai eh rangdi, 12 "Nnui Jordan reuki kahgwang lu caine aipau leuhdung Gerizim Deutu ga saplu maisia minadung de samlam beu kerane: Simeon, Levi, Judah, Issachar, Joseph, nah Benjamin. 13 Heleuh aipaudung de Ebal Deutu ga sapzie reset samdung rangbeu kera: Reuben, Gad, Asher, Zebulun, Dan, nah Naphtali. 14 Levime samkeli zie nah Israel minadung leune dage sahbak eh rang zie:

15 ‘Keheibe de mamie reki mede tei kegaibe, RAMPAUBE ngkau kela, hebaciem keyime badung bata, nah cide ngkim eh tei kegaibe de peu reset punglu.’ Pecai minadung pelane* samli peu eh ‘Amen’ rangzie.

16 ‘Pepei mede pepui de rütla kemakme keheibe de peu reset punglu.’ Pecai minadung pelane ‘Amen’ de rangzie.

17 ‘Keheibe de pe kidabe deurai keumzia kedibe de peu reset punglu.’ Pecai minadung pelane ‘Amen’ de rang zie.

18 ‘Keheibe de miakcitme gede lampui kemak lege ngngwa kegaibe de peu reset punglu.’ Pecai minadung pelane ‘Amen’ de rang zie.*

19 ‘Keheibe de sangme, pepei kegahme, mede hemipui ge kecune penui mzeu tei nggah kedime de peu reset punglu.’ Pecai minadung pelane ‘Amen’ de rang zie.

20 ‘Keheibe de pepei nau de ngngwa ngkop kedime de reset punglu, kedanemene pane pepei nzeudung keu kedine.’ Pecai minadung pelane ‘Amen’ de rang zie.

21 ‘Mige makaune keheibe de ngngwa mmha kecume de peu reset punglu.’ Pecai minadung pelane ‘Amen’ de rang zie.*

22 ‘Keheibe de pe tipui de, pepei napui de, mede pepui napui de ngngwa ngkop kedibe de peu reset punglu.’ Pecai minadung pelane ‘Amen’ de rang zie.*

23 ‘Keheibe de pe nau pui de ngngwa ngkop kedibe de peu reset punglu.’ Pecai minadung pelane ‘Amen’ de rang zie.*

24 ‘Keheibe de ngkim eh pe kidabe de teitset kedibe de peu reset punglu.’ Pecai minadung pelane ‘Amen’ de rang zie.

25 ‘Keheibe de kemau tei kemakme gede teitset zie lie hetau henim luu teu kelume de peu reset punglu’. Pecai minadung pelane ‘Amen’ de rang zie.*

26 ‘Keheibe de aipau hezai samdung penui cidungde mzai lu zie lie kemakme de peu reset punglu.’ Pecai minadung pelane ‘Amen’ de rang zie.*