1 RAMPAUBE nnui Tinggwang nnui mie gumlai eh kebam deu de gage nnuide ngngwa gwang kebeudau, pa heleuhdung kekieege de nnui dwagade gwagi dizie, Hittitme, Girgashitme, Amoritme, Canaanme, Perizzitme, Hivitme, nah Jebusitme, heleuhdung kedi hena nnui swade ngkiengki and diki kecudung.✝ 2 RAMPAUBE nnui Tinggwang ne penuide nnui kang gage kaibeu nah nnui penuide ngam keludau, nnui penuide teingkap ciaudi maisia. Nnui penuide ngngwa samting samkakkelu teilak, nah penuide ngaugia gede keulia lak. 3 Pecaide nnui penuide ngngwa kelak ketei kette teilak. Nnui nnui napuidung de penui napeidung de pwapeu lak, nah nnui penui napuidungde de nnui napeidung ziemne keulak. 4 Kedanemene a caisui kecu gade penui nnui napei dungde teunreu dizie, ciu eh penui hera keda de recadi kera. Cine RAMPAUBE nnuida pe rata heupet zie, nah pa nnuide teingkap zette dizie. 5 Ainzwa eh nnui penuide tei beulu maisia: Nnui penui racabamdung de teukau dizie, penui tangtsu tsiadung de teipang dizie, penui Asherah rabepui miedung bi ngkau dizie, nah penui rabe miedung ru dizi.

6 Kedanemene nnui au RAMPAUBE nnui Tinggwang ziemne keuntsam kelu heleuh ge. Kedamedung kideu reu lung kebamme kakga swade, pa nnuide peu pe minadung pegu teilu kerane kedetlu. 7 RAMPAUBE au pe keku de nnui reu gage kai ma mede nnui mi kedame swade kieeki kecune nnuide kedet ma, kedanemene nnui minadung kakgade camtu kecume ziemne, 8 dede pa nnuide keku ziemne, nah pa reset de nnui paume dage pa sampet kebeude teicang neula. Aide ziemne RAMPAUBE pe ba kengkieng le nnuide ngngwampet beu nah Egyptme gwangpei Pharaoh ba gade, hebaang teikela ki gade nnuide kelilu. 9 Ciziemne cilu RAMPAUBE nnui Tinggwang, pa au Tinggwang lie kecu, kesamsang Tinggwang, pa samkakkelu nah samsang ceheu pecangdung ziemne pe sam mzai kelame nah pecu hung kelame da kainzeu la, 10 dede pecu ngaurau kecume de saja peula, penuide ngkapdi kerane; pa pecu ngaurau kecume de pe zai keyi lia lak; pa penui dage saja peuzie. 11 Nnui cine pe samdung kainzeu lu, hezaidung, nah ajadung Ih n dage henai kai kebeude, iciu eh nnui cide teilu kerane.

12 Magade nnui ajadung de kingnei, nah kainzeu nah cidungde tei lucai, RAMPAUBE nnui Tinggwang nnui paume da samkakkelu nah pa pe samsang sampet kebeude nnui dage kaipwa teicang beuzie. 13 Pa nnuide ku zie, nnuide samlam beuzie, nah nnuide teingkiee beuzie; pa n pum gade lungh kegwang tsi nah n deu gade lungh kegwang tsi, n mei, n zau keheci, nah ngu maca, n kauhaudung nah n hetumnadung kekiee ge peu eh, pa nnuide peuzie lie eh n paume dage pe sampet teikelu deu gade nnuide samlam beuzie. 14 Nnuide mi kedame swade samlam kiee beuzie; mipei pe na kegah bamlak mede nnui kakga mipui pe na lunghgai kelak bamlak mede nnui kauhaudung kakgade. 15 RAMPAUBE n dade keteei keneei pelane keunzia dizie; Egypt gade rapia kesia nnui ci kebamde pa magede nnui reuga kailak, dede pa nnuide ngau keraume dage cidungde kai beuzie. 16 RAMPAUBE nnui Tinggwang nnuida pwapeu kecume leune de nnui ngkap dizie, nah nnui miak gade penuide kenggia dau gailak. Nnui penui rabedung de reca lak, kedanemene cide nnui ziemne hetak ge zie.

17 Magade nnui mlung gade nnui, ‘Heleuh aidungde a swa digwa; dainzwa Ih penuide gwagi lulai?’ de eh rangcai, 18 penuide hing so; nnui nsung lulo RAMPAUBE nnui Tinggwang Pharaoh nah Egyptme pelane dage tei kegaidung; 19 kehereisüt kedi nnui miak gade ngau da, marengeidung, mimakecang batadung, kengkieng ba, nah RAMPAUBE n Tinggwang ba nzangpet eh nnuide ngngwampet kebeube de. RAMPAUBE nnui Tinggwang nnui hing kelame mina pelane dage cide nzwa teigai zie. 20 Cipau reude, RAMPAUBE nnui Tinggwang tangkuidung* penui kakgage langgai zie, bang eh kebamme de nah nnui dade mbai kelame de nnui dwagade ngkapdi kemaktane.* 21 Nnui penuide hing lak, kedanemene RAMPAUBE nnui Tinggwang nnui kakga lalu, di nah hinglu kebui Tinggwang ge. 22 RAMPAUBE nnui Tinggwang nnui dwa gade heleuhdung miet miet eh gwa dizie. Nnui piage gage penuide ngamdi gailak, mecai renaam kaunedung nnui taiga kieesüt dizie.* 23 Dede RAMPAUBE nnui Tinggwang nnui penuide hereu ga redau kecudau nnuide penui reu kengkieng pwapeu zie; pa penuide teimang dizie penui de teingkapdi kemaktane. 24 Pa penui hegwangme de nnui kengkieng kang gage kai dizie, nah nnui penui zi tinggim kang gade teinggah dizie. Migede nnui dwa sap gailak, nnui penuide teingkap cangdi kemaktane. 25 Nnui penui rabe miedung ru dizie, penui gu hengin so rangkanggeu mede kecak penuide gum kelabe nah nnuikatei ziemne keuso, kedanemene nnui cinzwacai, nnuide cide ne kang luzie, RAMPAUBE nnui Tinggwang ziemne cide kengkau ta ge lu. 26 Nnui kengkau gede nnui kidung ga pung gwanglak nah reca teicuh dilak. Nnui cidungde ngaurau eh keugi dizie, kedanemene cide au kengkap ziemne teutsam pwa bam lu.