1 Magade nnui kakgade caihakecime mede hemang kemmi medung cuhdi, nah pa marehi ge mede miswakegah ge nnuide peu cai,* 2 nah magade ma rehi mede miswakegah pa ncu kerang de gwang eh rang cai, ‘Anui rabe kedadung cai tet go, nnui ci kemakbe, nah anui penuide reca go,’ 3 cipau caihakecibe sam de kingnei so, mede cipau hemang kemmibe dungde de; kedanemene RAMPAUBE nnui Tinggwang nnuide kedakpie bam nnui RAMPAUBE nnui Tinggwang de nnui mlung pelane teu nah nnui keringria pelane teu pecu ku bam mi kecu ci kerane.* 4 Nnui RAMPAUBE nnui Tinggwang cai tet zie, pecu herüt peulu, pe aja kai kebeudung de tei mzailu, nah pesam mzailu, nah nnui pecu reca zie nah pecu nggei lalu. 5 Cipau caihakecibe mede cipau hemang kemmibe de ketsai ga kai dizie, kedanemene pa RAMPAUBE nnui Tinggwang de rang mlai kecune, Egyptme deu gade nnuide ngngwa mpet kebeu be de, nah kilame ki* gade nnuide teu mpet kebeu be. Cipau caihakecibe RAMPAUBE nnui Tinggwang nnuide aja kai eh tet lulo kebeu gade teu mpetdi neu la. Cine nnui kakgade herakesia keu mzia dilu.

6 Magade n sinabepei, n pui napei, mede n napei, mede n napui, mede nang hung kela n nau de, mede n dade n zangpei n keringria nzwa kelabe de, ncu ngkim kecung eh rang, ‘Anui mie delwe hera keda dungde reca go nnui ci kemak be de, nnui mede nnui paumedung liede,* 7 mina rabedung keheibe nnuide twagwa eh kebam dung, n taiga kebam, mede n dade mdei kebam, kideu ket lambie tu penli gade gwang kideu keda lambie tu penli ga kecang.’ 8 Nang pecu peudi kerabe ma mede pe kwa kingnei kerabe ma, nah nang n miak de peu pecu ngaunggia di kerabe ma, nah nang pecu püt kerabe ma mede pecu gum kerabe ma. 9 Meliene, nang pecu teitset bi di kerabe; pecu ketsai ga kai kera n ba peda raitu kerabe, nah cipaucai mina pelane ba gade.✝ 10 Nang pecu tangtsudung le samtset zie, kedanemene pa nnuide RAMPAUBE nnui Tinggwang dade teu mdei di kera ciem ketei ne, Egyptme deu gade nnuide teu mpet kebeu be dade, hebaang tei kela ki gade. 11 Israelme pelane siu lwe ngngi dizie, nah nnui kakgade kemau ci kenzwa gede teisi dai lak.

12 Magade nnui RAMPAUBE nnui Tinggwang ne nnuide lungh kera kepeu ga, keheibe de nnui namdidung ket ha rang eh nnui siu cai: 13 Kemaume midung ge nnui kakgade tet mpet nah penui namdi ga lungh kebammedung de teu mpet eh rangdi, ‘Anui mie delwe nnui ci kemak rabe kedadung de reca cugo.’ 14 Cipaucai nang makesangbe pie zie, peei eh, nah cide peei ncwak zie. Nang cide kesang nah cinzwa delie kecu ngau kelu dau, cikenzwa makesia nnui kakgade tei gai kecu, pecai nang n ta tei gaizie. 15 Nang namdi cika lungkebamme de kingtie tün le gwaketang bizie, ma pelane tei ngkap dizie nah cika mina lungh kebam pelane de de, penui kauruine pelane de si eh, kingtie tün le. 16 Nnui mania tuikelu pelane lampui sum ga hekwa luzie, nah namdi de ru dizie, mania tuikelu pelane de si eh, RAMPAUBE nnui Tinggwang ziemne. Namdi kelungta ziemne ngkap kedi ge dizie; cide madaude tei ncuh dai lak. 17 Ma cidungde ngkap di kera ziemne keu ntsam kelu n ba ga peu bam kerabe ma. Aide ainzwa kerabe, iciude RAMPAUBE pe lunghop gade nreu tetlu kerane, ncu ngaugia keulia eh, ncu ngaukenggia kecu, nah ncu heleuh tei kiee beuzie, pa n paumedung da pe sampet kegai de nzwa. 18 Pa aidungde tei beuzie kedanemene nang RAMPAUBE nnui Tinggwang sam kingnei kebam ne, Ih henai nnuide pe aja kai kebeu pelane mzai lulo eh rang kebeu de, RAMPAUBE nnui Tinggwang miakngau gade dai petau bi teilu kerane.