1 Nnui au RAMPAUBE nnui Tinggwang gu minadung. Nnuikatei nnuide rezam diso, mede ketsaime ziemne nnui zu keheiga de tai diso.✝ 2 Kedanemene nnui au RAMPAUBE nnui Tinggwang ziemne keu ntsam kelu leuh ge, nah kideu ga kelung mina pelane swa de, RAMPAUBE nnuide peu pegu mina tei kera kedetlu.

3 Nnui ngkaukela ma keheibe de tyei so. 4 Nnui makaune aidung de tyei lubui: hetumseu, meurün, nah hemeu, 5 heti, helung, hetiseu, renaam meu, nah lamlwa meu, nah hetidung, nah renaam meurün. 6 Makaunedung keheibe de cide cai, pengienglwak pang kena keteibe nah tanglit tyei kelabe nnui tyei lubui. 7 Iciuliede, makaunedung kesabe tanglit tyeila mede pengienglwak pang kena tei kelabe de nnui tyei kerabe ma: ut, rabbit, nah baktwak tyeilak; kedanemene penui tanglit tyeila dede pengienglwak de pang lama, cidungde nnui ziemne mci ma. 8 Hebak de nnui ziemne de mci ma kedanemene pa pengienglwak pang dede tanglit tyeila kemakbe; pa nnui ziemne mci ma. Hebak tei tyei so, nah penui ketsaipau tung so.

9 Dui ga kebam ma aidung nnui tyei lubui: penlangdung nah peliepdung kebam leune. 10 Dede penlangdung nah peliepdung kegahbe leune nnui tyei so; penui au nnui ziemne mci ma.

11 Nnui nruine kemcibe leune tyei lubui. 12 Dede aipau nruinedung nnui tyei so: helie, herarui, dui liengrie, 13 liengcingna kegiebe nah liengcingna ketiakbe, keta keheibe helie. 14 Nnui keta keheibe hegak tyei so, 15 nah ruitie, nah tingmui biangkang, duiruine, liengrie keheibe, 16 biangkang keceube, biangkang kedibe, biangkang kehabe, 17 pelican, dui liengrie, cormorant. 18 Nnui duirui, heron ruine keheibe, regwabentwa nah takla tyei so. 19 Kaucitna pe hesiu kepungbe leune nnui ziemne mci ma; penuide tyei kerabe ma. 20 Nnui lim keladung kemcibe leune tyei lubui.

21 Nnui makeheibe pekatei tsai kebambe tyei so; nnui cide sangme nnui namceu ga kebamme de peu lubui, iciu eh pa cide tyei lubui; mede nnui cide sangme dage zwa beu lubui. Kedanemene nnui au RAMPAUBE nnui Tinggwang ne keuntsam kelu leuh lu. Nnui hemeuna de pepui tungdui gage lang diso.

22 Nnui nnui luh meitsi buikebeu pelane gade kereizige kai bi maisia, nnui luh gade mmi ramsang gwang lu kela gade. 23 Nnui RAMPAUBE nnui Tinggwang dwa gade tyei zie, pane kedet kelu pe kemci bam gade, nnui mei, nnui zau keheci, nah nnui olive ca, nah nnui tumdung nah nnui meuründung mciu raitube gu kereizige; ciude nnui RAMPAUBE nnui Tinggwang de herüt peu bam muilu kerane. 24 Magade hebeuh de nnui ziemne dei hamdi eh nnui cide punglu tadi cai, kedanemene cipau ni de RAMPAUBE nnui Tinggwang ne kedet kelu pe kemci bam de nnui dade dei hamdi cai, ciude, RAMPAUBE Tinggwang nnuide samlam süt kebeu dau, 25 nnui makai cidungde tei kedet pwa rangkang teilu, rangkang cide nnui ba gage herak ntiplu, nah RAMPAUBE nnui Tinggwang ne kedet kenzeu bam ga mielu. 26 Cikade nnui rangkang mpetgai keneube keheibe gage mpetlu: hetumseu ziemne, mede meurün ziemne, mede zau ziemne, mede kengkieng zau ziemne, mede keheibe nnui keneube ziemne; nnui cika RAMPAUBE nnui Tinggwang dwa gade tyei zie, nah nnui renga zie, nnui nah nnui kelak de. 27 Levime nnui namdi lungga kebamme, pecu gi diso, kedanemene pa au nnuide ngngwa peqwa mede gumlu kera gahlu.

28 Mmi kecum cang kedi ramsang cipau kum de nnui ngau kelu leune gu kereizige pwa gwang zie, nah nnui cide nnui namdidung gage hekwa luzie; 29 Nah Levime, pa au nnuide ngngwa peqwa mede gumlu kera kegahne, nah sangme, nah nggiana nah hemipui cika nnui namdidung ga kebam medung, gwang zie nah tyei zie nah mnung luzie. Aide teilu iciude RAMPAUBE nnui Tinggwang nnui ba le nnui heta tei kegai leune gage nnuide samlam beu zie.