1 Levime cingkumedung, nah Levi leuh pelane, Israelme deu ga pe qwa mede pe magum bam lak; penui RAMPAUBE de kepeu recadung mi le tei kelube de penui magum delie de eh tyeilu maisia. 2 Penui sinamedung kakga penui magum bamlak; RAMPAUBE au penui magum, pa penui dage rang kebeu nzwa.* 3 Mzi aide cingkumedung de peula, ratak tei kegai minadung ne penuide peula, cide hetumseu ge mede meurünna ge lubui: pe bakwak, pe bia kenana, nah pe lungnetdung. 4 Nnui gu meitsi raitube, nnui gu zau keheci, nah nnui gu maca, nah meurün mai pet raitube, nnui pecu peu maisia. 5 Kedanemene RAMPAUBE nnui Tinggwang nnui leuhme pelane kakgade pecu nah pe namedung de peu RAMPAUBE zi gade sap eh kelungta pe gwa tei kerane kedetlu.

6 Magade Levime ge Israel ga pa lungh kebam ni nnui namceudung gade gwang cai, nah pa pe keringria pelane teu RAMPAUBE ne kedet lai kebam ga reca kerane gwang neu lacai, 7 iciu cai pa RAMPAUBE pe Tinggwang zi gade hegwa tei zie Levime pe siname pelane tei kebam nzwa, RAMPAUBE dwa ga sap kebamme. 8 Penui tyei kera qwadung nsam maisia, pe kilungme magum zwa kelu gade ngaukelu de si eh.

9 Nnui RAMPAUBE nnui Tinggwang nnuide peu lai eh kebam deu ga gwang lude, nnui cika kebam heleuhdung zai kengkaube mnei so. 10 Nnui kakga mi keheibe de pe napei mede pe napui de mi gage ratak tei kecume bam kerabe ma, mi keheibe de reka tah tei mede caiha kerangme, mede hepiak ga marengei kebam de pei lia kelame, mede kehemeu ta keteime, 11 hekuhei keteume, keheibe rabedung de qu kelame, mede kehemeu tah tei kelame, mede ketsai rabedung de mpau kelame. 12 Kedanemene caugame ma aidungde tei labi penuide RAMPAUBE ngkaula; ma kengkau aidungde ziemne RAMPAUBE nnui Tinggwang nnui dwa gade penuide gwa gidi zeu da. 13 RAMPAUBE nnui Tinggwang dwa gade nnui mci cangsiak kerabe.✝

14 Kedanemene nnui gwadi lai eh kebam heleuhdung de kereka ta nah kereka ciem tei kelame kwa kingnei; dede RAMPAUBE nnui Tinggwang nnuide au aide peu tei lak lie zeu.

15 RAMPAUBE nnui Tinggwang nnui kakgade caihakecime ge de teu cuh beuzie, nnui siname hangge de, Ih kenzwa. Nnui pekwa kingnei bizie.* 16 Nnui Horeb ga ngkwa kelu benai nnui RAMPAUBE nnui Tinggwang dade aide kiegai, rang eh, ‘Peu anuide RAMPAUBE anui Tinggwang kwa kingnei dai tadi lulo, mede aipau miheu kedi de ngaudai tadi lulo, meliecai anui tsai dizie.’* 17 RAMPAUBE a dage rangdi, "Penui kerang de au yi. 18 Ih penui ziemne penui siname kakgade caihakecime gede teu cuh luzie, nang nzwa eh. Ih a samdung pecu peu zie, nah pa penui dage Ih sam kai kebeu leune de paubeu zie.* 19 Keheibe de magade pa a zi gade sam pau kebeudung de kingnei tadi zie liecai, Ih penuide saja peu zie.✝

20 Dede caihakecime a zi teu ngang kela sam rang kelame, Ih ne ranglo de aja kai kemak sam, mede hera kedadung zi teurang kelabe, cipau caihakecibe de tsai zie." 21 Aide nnui mlung gade rang lu maisia, ‘RAMPAUBE ne sam rang kemak de anui dainzwa cilu zie no?’ 22 Caihakecime ge RAMPAUBE zi teu delwe sam pau kecudau, nnui cide RAMPAUBE sam lie de ci luzie. Magade cide gwang kesang mede tei mecai ge, iciu cai cide RAMPAUBE ne rangbeu meda nah cide caihakecibe ngang eh rang dida, nah nnui pecu hing di kerabe ma.