1 Ih henai nnuide peu kebam ajadung pelane kainzeu lu, iciude nnui ring luzie nah hingpet luzie, nah lüt luzie nah nnui peime dage RAMPAUBE sampet kebeu hangdeu* de gum luzie. 2 Nnui nsung luzie RAMPAUBE nnui Tinggwang nnuide hetaideu gade mmi riakdai aidungde nnuide teuswa la kecu, pa nnuide peu henah mielu kerane, iciu eh pa nnuide kedakpie kerane nnui lung ga dai labi kecu cilu kerane, nnui pe sam kainzeu ziemi lakbi kecu. 3 Pa nnuide teihenah beu, nah nnuide tei nzeu gai, nah manna le nnui pok teibeu,* cide nnui nah nnui peime daibi kecu cima. Pa cide tei kegaide au peu nnuide mina tangku rünne teu eh lungh gailak kecude cilu kerane; dede, RAMPAUBE mui gade kepet leune gade mina ring lubui.* 4 Mmi riakdai cidau ting dega nnui paini hegwa dima nah nnui dade nghai dima, nah nnui pi mma dima. 5 Nnui nnui mlung gage kai luzie, dainzwa, mige pe na de ledeu labi kecunzwa, cinzwa RAMPAUBE nnui Tinggwang nnuide ledeu lala.✝ 6 Nnui RAMPAUBE nnui Tinggwang ajadung mzai zie, iciu eh nnui pe lampui ga tetlu kerane nah pecu herüt peuzie. 7 Kedanemene RAMPAUBE nnui Tinggwang nnuide hangdeu keyi gage ngngwa gwangla, dui lwa kebam hangdeu, duirwakdung nah duilet, langkamdung nah hangdeutudung kakga lwagai kebam gage; 8 hangdeu wheat nah barley kebam, kubetsi bangdung, tangzüttsi bangdung, nah kuraletsidung; olive bangdung nah heliadui deudung. 9 Cipau deu dega nnui tangku tyei kedui tei dilak, nah nnui cika magede dui di kecu tei dilak; hangdeu aika tangtsudung hegeu le teikelube, nah hangdeutu cikade nnui copper geu kuimpet lubui. 10 Nnui matyei zie nah nggei luzie, nnuide hangdeu keyi peu kebeude ziemne nnui RAMPAUBE, nnui Tinggwang de samlam beuzie.

11 Pe ajadung nah pa tei lulo kebeudung, nah pe zaidung Ih nnui dage henai rangkebam dungde teilu tadi eh, RAMPAUBE nnui Tinggwang de nsungtadi kera gade mriaklu. 12 Iciu mecai, nnui tyeilu eh pui kebamdau, nah nnui ki keyi teilu nah cika lungh kecudau, nnui mlung di dizie. 13 Mriaklulo nnui kaunehaudung nah kauruine hingpet keludau nah nnui rangkanggeu nah kecak kiee reureu keludau, nah nnuida kebamdung hingpet lude, 14 cidau nnui mlung ngang dila nah nnui RAMPAUBE nnui Tinggwang de nsungta di, Egyptme deu gade nnuide ngngwampet kebeube de, hebaang ketei ki gade. 15 Pecu nsungta diso hetaideu kedi nah kengngi gade nnuide nzang gwang kebeube de, henei kerabedung nah heruingapuidung kebam gade nah hangdeu cangh eh dui de kegah gade, tsura gade nnuide dui punggwang kebeube de.* 16 Pa hetaideu gade nnui paume madaude cikemakbe manna le nnui pok teibeu, iciu eh pa nnuide tei henah nah nnuide kedeilu kerane, nnuide kekamle keyibe tei beulu kerane, 17 dede nnui mlung ga nnui rang lubui bam, ‘A kengkieng nah a pumci le mabam aidung pelane teilu.’ 18 Dede nnui nsungla lu RAMPAUBE nnui Tinggwang de, kedanemene pa ne nnuide mahei ngaulu kera kengkieng peu; iciu eh pa samkakkelu de tei canglu kerane pa nnui peime dage sampet kebeude, henai nzwa kelade nzwa eh. 19 Ainzwa gwang zie, magade nnui RAMPAUBE nnui Tinggwang de nsung tadi eh nah hera keda caisui, penuide reca, nah penuide herüt peu dicai, Ih nnui dage henai a sam pet gaila nnui kap eh gah dizie. 20 RAMPAUBE nnui dwade heleuhdung de ngkapdi kebam nzwa, cinzwa nnuide de ngkap dizie, kedanemene nnui RAMPAUBE nnui Tinggwang kwa kingneilu melu.